MATTHAÏOS 9

U Jisu u pynkhiah ïa u briew uba ïapshiliang

(Mrk. 2:1-12; Luk. 5:17-26)

1U Jisu u la kiew halor ka lieng bad u la leit phai pat sha shiliang ka duriaw sha la ka jong shnong, 2ha kaba katto katne ki briew ki la wallam sha u ïa u briew uba ïapshiliang, uba thiah ha ka jingthiah. Haba U Jisu u la ïohi haduh katno ka jingngeit ki don, u la ong ha u briew uba ïapshiliang, “To long shlur, ko khun jong nga! Ïa ki pop jong me la map.”

3Nangta katto katne ki nonghikai ka Hukum ki la ïa-ong para ma ki, “Une u briew u krenbeiñ Blei!”

4U Jisu u la tip ïa kaei kaba ki pyrkhat, kumta u la ong, “Balei phi ïa-pyrkhat ïa kine kiei kiei kiba sniew? 5Hato ka kham suk ban ong, ‘La map ïa ki pop jong me,’ lane ban ong, ‘To ïeng joit bad to ïaid?’ 6Ngan pynshisha ha phi, te, ba U Khun U Briew u don ka iktiar ha ka khyndew ban map ïa ki pop.” Kumta u la ong ha u briew uba ïapshiliang, “To ïeng joit, to rah ïa la ka jingthiah, bad leit sha ïing!”

7Uta u briew u la ïeng joit bad u la leit sha ïing. 8Haba ki briew ki la ïohi ïa kata, ki la sheptieng, bad ki la ïaroh ïa U Blei uba la ai kum kata ka iktiar ha ki briew.

U Jisu u khot ïa u Matthaïos

(Mrk. 2:13-17; Luk. 5:27-32)

9U Jisu u la mihnoh na kata ka jaka bad katba u dang ïaid, u la ïohi ïa u nonglum khajna, uba kyrteng u Matthaïos, uba shong ha ka jaka treikam jong u. U la ong ha u, “To bud ïa nga.”

U Matthaïos u la ïeng joit bad u la bud ïa u. 10#Luk. 15:1,2Katba U Jisu u dang bam ha ka ïing u Matthaïos, shibun ki nonglum khajna bad kiwei pat kiba la shah kyntait ki la ïawan bad shong bad U Jisu lem bad ki synran jong u ha ka miej bam. 11Katto katne ki Pharisi ki la ïohi ïa kane bad ki la kylli ïa ki synran jong u, “Balei u nonghikai jong phi u ïabam lem bad kiba kum kine ki briew?”

12U Jisu u la ïohsngew ïa ki bad u la jubab, “Ki briew kiba koit bakhiah kim donkam ïa u nongsumar, hynrei tang kito kiba pang. 13#Mat. 12:7; Hos. 6:6Khie leit bad to wad kaei ka jingmut ha ka Jingthoh Bakhuid kaba ong: ‘Dei ïa ka jingsbun ba nga kwah, ym ki jingkñia ïa ki mrad.’ Ngam shym la wan ban khot ïa ki briew badonburom, hynrei ïa kiba la shah kyntait.”

Ka jingkylli shaphang ka jingshah jingit

(Mrk. 2:18-22; Luk. 5:33-39)

14Nangta ki nongbud jong U Ïoannis u Nongpynbaptis ki la wan sha U Jisu, ki da kylli, “Balei ba ma ngi bad ki Pharisi ngi shahjingit bunsien, hynrei ki synran jong me kim ju shahjingit da lei lei?”

15U Jisu u la jubab, “Hato phi khmih lynti ba kiba shah khot sngewbha sha ka jingkhawai shongkurim kin sngewsih katba u nongleitkurim u dang don lem bad ki? Em kam long kumta! Hynrei ka sngi kan poi haba ïa u nongleitkurim yn shim noh na ki, bad kumta keiñ kin sa shahjingit.

16“Ym don mano mano ba syrdep ïa ka jaiñkup kaba rim da ka lyngkhot jaiñ kaba thymmai, naba kata ka syrdep bathymmai kan ran bad kan pynlong ka thliew kaba kham heh ha ka jaiñkup. 17Lymne ym don uno uno u ban theh ïa ka waiñ bathymmai hapoh ki lwa snieh kiba la pyndonkam, namar ki snieh kin pdang bad ka waiñ kan tuid shabar, bad ïa ki lwa snieh yn pynsniew. Hynrei, ïa ka waiñ kaba thymmai la theh noh ha ki lwa snieh bym pat ju pyndonkam, bad baroh ar kin neh.”

Ka khun jong u rangbah synshar bad ka kynthei kaba la ktah ïa ka jaiñkup jong U Jisu

(Mrk. 5:21-43; Luk. 8:40-56)

18Katba U Jisu u dang kren ïa kane, u rangbah synshar ki Jiw u la wan sha U, u la dem khohsiew ha khmat jong u, bad u la ong, “Ka khun jong nga ka dang shu ïap; hynrei wan ban buh ïa ki kti jong me halor jong ka, bad kan im pat.”

19Kumta U Jisu u la ïeng joit bad u la bud ïa u, bad ki synran jong u ki la ïaleit ryngkat bad u.

20Ka kynthei kaba la shitom na ka jingmihsnam bajur la khat-ar snem, ka la wan na shadien jong U Jisu bad ka la ktah ïa ka rmiang jong ka jaiñkup jong u. 21Ka la ong ha lade, “Lada nga tang shu ïohktah ïa ka jaiñkup jong u, ngan sa koit.”

22U Jisu u la phai sawdong bad u la ïohi ïa ka, bad u la ong, “To long shlur, ko ka khun jong nga! Ka jingngeit jong pha ka la pynkoit ïa pha.” Ha kata ka khyllipmat ka kynthei ka la koit.

23Nangta U Jisu u la leit shapoh ka ïing jong u rangbah synshar. Haba u la ïohi ïa ki nongput nongtem na ka bynta ka jingontep bad ba ki briew baroh ki la khihwin, 24u la ong, “To ïamihnoh shabar baroh! Ka khynnah rit kam shym ïap — ka shu ïohthiah!” Te ki baroh ki la ïa-rkhie ïa u. 25Hynrei mar ïa pynmih ïa ki briew shabar, U Jisu u la rung shapoh ka kamra jong ka khynnah bad u la bat ïa ka kti jong ka, bad ka la khie joit. 26Ka khubor shaphang kane ka la saphriang ha kylleng baroh jong kata ka bynta jong ka ri.

U Jisu u pynkhiah ïa ki ar ngut ki rangbah kiba matlah

27U Jisu u la mihnoh na kata ka jaka, bad katba u dang ïaid, ar ngut ki rangbah kiba matlah ki la sdang ban bud ïa u. “To isynei ïa ngi, ko khun u Dabid!” ki la pyrta.

28Haba U Jisu u la rung shapoh ka ïing, ki ar ngut ki rangbah kiba matlah ki la ïawan sha u, bad u la kylli ïa ki, “Hato phi ngeit ba nga lah ban pynkhiah ïa phi?”

“Ho-oid, Kynrad!” ki la jubab.

29Nangta U Jisu u la ktah ïa ki khmat jong ki bad u la ong, “Ai ba kan jia long, te, kumba phi ngeit!” — 30bad ïa ka jingïohi jong ki la pynïoh pat. U Jisu u la maham jur ïa ki, “Wat ïathuh ïa kane hano hano ruh!”

31Hynrei ki la leit noh bad pynphriang ïa ka khubor shaphang U Jisu ha kylleng jong kata ka bynta jong ka ri.

U Jisu u pynkhiah ïa u briew u bymnang kren

32Katba ki rangbah ki dang ïamih, katto katne ngut ki briew ki la wanlam sha U Jisu ïa u briew u bymnang kren namar ba u shongksuid. 33Hynrei mar syn beh noh ïa u ksuid, u briew u la sdang ban kren, bad uwei uwei baroh u la lyngngoh, “Ngim pat ju ïohi mynno mynno ruh kum kane ha Israel!” ki la ong.

34 # Mat. 10:25; 12:24; Mrk. 3:22; Luk. 11:15 Hynrei ki Pharisi ki la ong, “U dei u rangbah jong ki ksuid uba ai ha u ka bor ban beh noh ïa ki ksuid.”

U Jisu u sngewsynei ïa ki briew

35 # Mat. 4:23; Mrk. 1:39; Luk. 4:44 U Jisu u la leit jngoh kylleng ki nongbah bad ki nongrit. U la hikai ha ki synagog, u la ïalap ïa ka Khubor Babha shaphang ka Hima, bad u la pynkhiah ïa ki briew kiba don ki jingpang babun jait bad ki jingshitom. 36#Jkhñ. 27:17; 1 Syiem. 22:17; 2 Khrn. 18:16; Ese. 34:5; Mrk. 6:34Haba u la ïohi ïa ki paidbah, la pyndap ïa ka dohnud jong u da ka jingsngewsynei na ka bynta jong ki, namar ki la khuslai bad kim lah ban leh ei ei, kum ki langbrot khlem u nongsharai. 37#Luk. 10:2Kumta u la ong ha ki synran jong u, “Ka jingot ka khraw eh, hynrei don khyndiat ki nongtrei ban lumlang ïa ka shapoh. 38To kyrpad ïa U Trai ka jingot ba un phah ïa ki nongtrei ban ïalumlang ha ka jingot jong u.”

Currently Selected:

MATTHAÏOS 9: KHACLBSI

Highlight

Copy