MATTHAÏOS 10

Ki khat-ar ngut ki apostol

(Mrk. 3:13-19; Luk. 6:12-16)

1U Jisu u la khot ïa ki khat-ar ngut ki synran jong u bad u la ai ha ki ka iktiar ban beh noh ïa ki mynsiem bymman bad ban pynkhiah ïa kawei pa kawei ka jingpang bad ïa kawei pa kawei ka jingshitom. 2Kine ki long ki kyrteng jong ki khat-ar ngut ki apostol: uba nyngkong, U Simon (ïa uba la khot u Petros) bad u para jong u, u Andriw; u Jakob bad u para jong u, u Ïoannis, ki khun jong u Sebedi; 3u Philip bad u Bartholomai; u Thomas bad u Matthaïos, u nonglum khajna; u Jakob u khun jong u Alphaïos bad u Thaddaïos; 4u Simon u Riew-ieit ri, bad u Judas Iskariot uba la die noh ïa U Jisu.

Ka mission jong ki khat-ar ngut

(Mrk. 6:7-13; Luk. 9:1-6)

5Ïa kine ki khat-ar ngut ki rangbah, U Jisu u la phah noh lem bad kine ki jingbthah harum: “Wat leit sha kano kano ka thain jong ki Jentil lane sha kano kano ka shnong ki nong Samaria. 6Pynban, phi dei ban leit sha ki langbrot kiba la jah noh jong ki paid Israel. 7Khie leit bad ïalap, ‘Ka Hima ki bneng ka la jan!’ 8To pynkhiah ïa kiba pang, to pynim pat ïa kiba ïap, to pynkhiah ïa kito kiba shitom na ki jingpang 'ñiangthohlieh, bad to beh noh ïa ki ksuid. Phi la ïohpdiang ei, kumta to ai ei. 9Wat rah ïa kano kano ka ksiar, ka rupa, lane ka pisa tama ha ki pla jong phi; 10#1 Kor. 9:14; 1 Tim. 5:18wat rah ïa ka pla khrong na ka bynta ka jingleit lane ka sopti bujli lane ka juti bujli lane u diengduh. Ïa u nongtrei dei ban ai ïa kaei kaba u donkam.

11“Haba phi poi sha ka nongbah ne ka nongrit, leit rung shapoh bad wad ïa uno uno uba mon ban pdiang sngewbha ïa phi, bad sah bad u tad ynda phi mihnoh na kata ka jaka. 12Haba phi rung shapoh ka ïing, to ong, ‘Ka jingsuk lem bad phi.’ 13Lada ki briew hapoh kata ka ïing ki pdiang sngewbha ïa phi, ai ba ka jingkhublei jingsuk jong phi kan neh; hynrei lada kim pdiang sngewbha ïa phi, to shim noh pat ïa ka jingkhublei jong phi. 14#Ki Kam. 13:51Bad lada kano kano ka ïing ne ka shnong kam pdiang sngewbha ïa phi lane pynshahshkor ïa phi, te mihnoh na kata ka jaka bad kynther noh ïa u pui pui na ki kjat jong phi. 15#Mat. 11:24; Jen. 19:24-28#Luk. 10:4-12Nga pynthikna ïa phi ba ha ka Sngi ka Jingbishar, U Blei un pyn-i kham bun ka jingisynei ïa ki briew ka Sodom bad Gomorrah ban ïa ki briew jong kata ka nongbah!

Ki jingpynshitom beiñ ki ban wan

(Mrk. 13:9-13; Luk. 21:12-17)

16 # Luk. 10:3 “To shahshkor! nga phah noh ïa phi kum ki langbrot sha ka kynhun ki suri. Phi dei ban phikir kum ki bseiñ bad kiba jemnud kum ki paro. 17#Mrk. 13:9-11; Luk. 12:11,12; 21:12-15To sumar, naba kin don ki briew ki ban kem ïa phi bad ïalam ïa phi sha ka ïingbishar, bad kin sympat ïa phi ha ki synagog. 18Na ka bynta jong nga phin shah tian bishar ha khmat ki nongsynshar bad ki syiem, ban ïathuh ïa ka Khubor Babha ha ki bad ha ki Jentil. 19Haba ki tian bishar ïa phi, wat khuslai shaphang kaei kaba phin ong lane kumno phin ong; haba ka por ka poi, yn sa ai ha phi ïa kaei kaba phin ong. 20Naba ki ktien kiba phin kren kim dei ki jong phi; kin wan na U Mynsiem jong U Kpa jong phi uba kren lyngba jong phi.

21 # Mrk. 13:12; Luk. 21:16 “Ki rangbah kin aiti noh ïa la ki jong ki hynmen bad para ïa ka ban pynïap ïa ki, bad ki kpa kin leh kumjuh ïa la ki khun; ki khun kin phai ïaleh pyrshah ïa la ki kmie ki kpa bad kin phah pynïap ïa ki. 22#Mat. 24:9; Mrk. 13:13; Luk. 21:17; Mat. 24:13; Mrk. 13:13Baroh kin isih ïa phi namar jong nga. Hynrei uno uno uba ïeng skhem haduh kaba kut un lait im. 23Haba kin pynshitom beiñ ïa phi ha kawei ka shnong, to phet sha kawei pat. Nga pynthikna ïa phi ba phin ym pat lah ban pyndep ïa ka kam jong phi ha baroh ki shnong jong ka Israel ha shuwa ba U Khun U Briew un wan.

24 # Luk. 6:40; Ïoan. 13:16; 15:20 “Ym don uba shah hikai uba kham khraw ban ïa u nonghikai jong u; ym don u mraw uba kham khraw ban ïa u kynrad jong u. 25#Mat. 9:34; 12:24; Mrk. 3:22; Luk. 11:15Kumta uba shah hikai u dei ban sngewhun ban long kum u nonghikai jong u, bad u mraw kum u kynrad jong u. Lada ïa u khlieh jong ka longïing la khot u Beelsebul, ïa ki dkhot jong ka longïing yn khot da ki kyrteng kiba kham sniew!

Ïano yn sheptieng

(Luk. 12:2-7)

26 # Mrk. 4:22; Luk. 8:17 “Kumta wat sheptieng ïa ki briew. Ïa kaei kaba la kah mynta yn weng noh, bad ïa kaei kaba la buhrieh yn pynpaw. 27Ïa kaei kaba nga ïathuh ïa phi ha kaba dum phi dei ban ïathuh ha kaba shai, bad ïa kaei kaba phi la ïohsngew ha kaba rieh phi dei ban pynbna na ki tnum ïing. 28Wat sheptieng ïa kito kiba pynïap ïa ka met hynrei ki bym lah ban pynïap ïa ka mynsiem; hynrei to sheptieng ïa U Blei, uba lah ban pynjot ïa ka met bad ka mynsiem ha dujok. 29Naba tang shi pisa phi lah ban thied ar tylli ki sim ïing, pynban ym don kawei ka sim ïing kaba hap ha ka khyndew khlem ka jingshah U Kpa jong phi. 30Kumta ruh ïa phi, wat ïa ki shñiuh ha ka khlieh jong phi la lah ñiew. 31Kumta wat sheptieng, phi kham kor bun shah ban ïa shibun ki sim ïing.

Kaba phla bad kyntait ïa U Khrist

(Luk. 12:8-9)

32“Lada uno uno u pynbna ha kaba paw ba u long u jong nga, ngan leh kumjuh ha khmat U Kpa jong nga uba ha bneng. 33#2 Tim. 2:12Hynrei lada uno uno u kyntait ïa nga ha kaba paw, ngan kyntait ïa u ha khmat U Kpa jong nga uba ha bneng.

Ym ka jingsuk hynrei ka waitlam

(Luk. 12:51-53; 14:26-27)

34“Wat mut ba nga la wan ban wanrah ka jingsuk sha ka pyrthei. Em, ngam shym la wanrah ïa ka jingsuk, hynrei ka waitlam. 35#Mik. 7:6Nga la wan ba ki khun shynrang kin ïaleh pyrshah ïa ki kpa jong ki, ki khun kynthei pyrshah ïa ki kmie jong ki, ki pyrsa kurim kynthei pyrshah ïa ki kiaw kurim jong ki; 36ki nongshun basniew tam jong u briew kin dei ki dkhot jong ka longïing jong u hi.

37“Uno uno uba ieit kham bun shah ïa la u kpa lane ka kmie ban ïa nga um long uba bit ban long u synran jong nga; uno uno uba ieit kham bun shah ïa la u khun lane ka khun ban ïa nga, um long uba bit ban long u synran jong nga. 38#Mat. 16:24; Mrk. 8:34; Luk. 9:23Uno uno u bym shim ïa la ka diengphna bad bud ha dien'jat jong nga um long uba bit ban long u synran jong nga. 39#Mat. 16:25; Mrk. 8:35; Luk. 9:24; 17:33; Ïoan. 12:25Uno uno uba pyrshang ban pynïoh myntoi ïa la ka jingim un duh noh ïa ka, hynrei uno uno uba duh noh ïa la ka jingim na ka bynta jong nga un ïoh ïa ka.

Ki bainong

(Mrk. 9:41)

40 # Luk. 10:16; Ïoan. 13:20; Mrk. 9:37; Luk. 9:48 “Uno uno uba pdiang ïa phi u pdiang ïa nga, bad uno uno uba pdiang ïa nga, u pdiang ïa uta uba la phah ïa nga. 41Uno uno uba pdiang ïa u nonglamktien jong U Blei namar ba u long u nonglamktien jong U Blei, un ïoh bynta ha ka bainong jong u. Bad uno uno uba pdiang ïa u briew uba bha namar ba u long uba bha, un ïoh bynta ha ka bainong jong u. 42Phi lah ban sngewthikna ba uno uno uba ai dih wat shi khuri ka umkhriat ha uwei uba rit tam na kine ki nongbud jong nga namar ba u dei u nongbud jong nga, un ïohpdiang da shisha ïa ka bainong.”

Currently Selected:

MATTHAÏOS 10: KHACLBSI

Highlight

Copy