MATTHAÏOS 8

U Jisu u pynkhiah ïa u briew

(Mrk. 1:40-45; Luk. 5:12-16)

1Haba U Jisu u la wan hiar na u lum, ki paidbah babun ki la bud ïa u. 2Nangta u briew uba shitom na ka jingpang 'ñiangthohlieh u la wan sha u, u la dem khohsiew ha khmat jong u, bad u la ong, “Ko Kynrad, lada me mon, me lah ban pynlong khuid ïa nga.”

3U Jisu u la kner ïa la ka kti bad u la ktah ïa u. “Nga mon,” u la jubab. “To men long khuid!” Shisyndon la pynkhiah ïa u briew na ka jingpang jong u. 4#Leb. 14:1-32Nangta U Jisu u la ong ha u, “To shahshkor! Wat ïathuh hano hano, hynrei khie leit beit beit sha u lyngdoh bad ai un khmih bniah ïa me; te khnang ban pynshisha ha uwei uwei baroh ba me la khiah, ai ïa ka jingkñia kaba u Moses u la hukum.”

U Jisu u pynkhiah ïa u shakri jong u rangbah pynïaidkam jong ka hima Rom

(Luk. 7:1-10)

5Haba U Jisu u la rung shapoh Kapernam, u rangbah pynïaidkam ka Hima Rom u la wan ïakynduh ïa u bad u la kyrpad jingïarap: 6“Ko Kynrad, u shakri jong nga u thiah pang ha ïing, um lah ban khih bad u da shitom jur eh.”

7“Ngan leit bad pynkhiah ïa u,” U Jisu u la ong.

8“O em, ko Kynrad,” la jubab u rangbah pynïaidkam. “Ngam long uba dei hok ba phin wan shapoh ka ïing jong nga. Shu ai hukum, bad u shakri jong nga un ïohkhiah. 9Ma nga ruh, nga long u briew hapoh ka iktiar jong ki rangbah pynïaidkam kiba kham halor, bad nga don ruh ki shipai hapoh jong nga. Nga hukum ïa une uwei, ‘Khie leit!’ bad u leit; bad nga hukum ïa utai uwei, ‘Ale!’ bad u wan; bad nga hukum ïa u mraw jong nga, ‘Leh ïa kane!’ bad u leh ïa kata.”

10Haba U Jisu u la ïohsngew ïa kane, u la lyngngoh bad u la ong ha ki briew kiba bud ïa u, “Nga ong ha phi, ngam pat ju shem ïano ïano ha Israel lem bad ka jingngeit kaba kum kane. 11#Luk. 13:29Nga pynthikna ïa phi ba shibun kin ïawan na mihngi bad na sepngi bad kin ïashong lem bad u Abraham, u Isaak bad u Jakob ha ka jingkhawai hapoh ka Hima ki bneng. 12#Mat. 22:13; 25:30; Luk. 13:28Hynrei ïa kito kiba dei ban don hapoh ka Hima yn bret noh sha ka jingdum, ha kaba kin lynñiar bad kyr-iat la ki bniat.” 13Nangta U Jisu u la ong ha u rangbah pynïaidkam, “Khie leit noh sha ïing, bad ïa kaei kaba me ngeit yn sa leh na ka bynta jong me.”

Bad ïa u shakri jong u rangbah pynïaidkam la pynkhiah ha kata hi ka khyllipmat.

U Jisu u pynkhiah shibun ki briew

(Mrk. 1:29-34; Luk. 4:38-41)

14U Jisu u la leit sha ka ïing jong u Petros bad hangta u la ïohi ïa ka kiaw kurim u Petros ba ka thiah pang lem bad ka jingshit. 15U la ktah ïa ka kti jong ka, ka jingshit ka la iehnoh ïa ka, bad ka la khie joit bad ka la sdang ban shakri ïa u.

16Haba ka janmiet ka la poi, ki briew ki la wallam sha U Jisu shibun kiba la don ki ksuid hapoh jong ki. U Jisu u la beh noh ïa ki mynsiem bymkhuid da ka ktien bad u la pynkhiah ïa baroh kiba la shitom. 17#Isa. 53:4U la leh ïa kane ban pynurlong shisha ïa kaei kaba u Isaïah u nongïathuhlypa u la lah ong, “Ma u da lade hi u la shim ïa ki jingshitom jong ngi bad u la bah noh ïa ki jingpang jong ngi.”

Ki ban sa long ki nongbud jong U Jisu

(Luk. 9:57-62)

18Haba U Jisu u la ïohi ïa u paidbah sawdong jong u, u la hukum ïa ki synran jong u ban leit sha shiliang jong ka duriaw. 19U nonghikai Aiñ u la wan sha u. “Ko Nonghikai,” u la ong, “Nga la kloi ban leit bad me kat shaba me leit.”

20U Jisu u la jubab ïa u, “Ki myrsiang ki don ki krem, bad ki sim ki don ki skum, hynrei U Khun U Briew um don jaka hangno hangno ban dem bad ban pynjahthait.”

21Uwei pat u briew, uba la long u synran, u la ong, “Ko Kynrad, shah shuwa ïa nga ba ngan leit phai bad tep ïa i pa jong nga.”

22“Bud ïa nga,” U Jisu u la jubab, “bad ai kiba ïap kin tep ïa kiba ïap jong ki.”

U Jisu u pynjai jai ïa ka 'erïong

(Mrk. 4:35-41; Luk. 8:22-25)

23U Jisu u la kiew halor ka lieng bad ki synran jong u ki la ïaleit bad u. 24Kynsan kynsan ka 'erïong kaba jur ka la beh halor ka duriaw, bad ka lieng ka la don ha ka jingma ban sa ngam. Hynrei U Jisu u la ïohthiah. 25Ki synran ki la ïaleit sha u bad kyrsiew ïa u. “Pyllait im ïa ngi, A Trai!” ki la ong. “Ngin sa ïap!”

26“Balei ba phi sheptieng haduh katne?” U Jisu u la jubab. “Katno kaba rit ka jingngeit phi don!” Nangta u la khie joit bad u la hukum ïa ki lyer bad ïa ki jingat phyllung ban sangeh, bad ka la don ka jingjai jai kaba khraw.

27Uwei pa uwei baroh u la sngewphylla. “U briew uba kumno une u long?” ki la ong. “Wat ki lyer bad ki jingat phyllung ki kohnguh ïa u!”

U Jisu u pynkhiah ar ngut ki rangbah kiba shongksuid

(Mrk. 5:1-20; Luk. 8:26-39)

28Haba U Jisu u la wan sha ka thain Gadara ha kawei pat ka liang jong ka duriaw, la ïashem ïa u da ki ar ngut ki rangbah kiba la wan mih na ki krem jingtep kiba don hangta. Kine ki rangbah ki la don ki ksuid hapoh jong ki bad ki la long kiba itriem shikatdei ba ym don mano mano ba nud ban leit na kata ka lynti. 29Shisyndon ki la lynñiar, “Me kwah aïu bad ngi, me U Khun jong U Blei? Hato me la wan ban pynshitom ïa ngi ha shuwa ka por kaba dei?”

30Kam da jngai nangta la don ka kynhun bah ki sniang kiba dang ïabam jingbam. 31Kumta ki ksuid ki la kyrpad ïa U Jisu, “Lada men beh noh ïa ngi shabar, to phah ïa ngi sha katai ka kynhun ki sniang.”

32“Khie leit,” U Jisu u la ong ha ki; kumta ki la mihnoh bad ki la leit shapoh ki sniang. Ka kynhun ki sniang baroh kawei ka la mareh arsut ïa ka riat jong ka synrang shapoh ka duriaw bad ka la ïap jyllop.

33Ki rangbah kiba ap ïa ki sniang ki la phet noh bad ki la leit shapoh ka shnong, ha kaba ki la ïathuh ïa ka jingjia baroh kawei bad ïa kaei kaba la jia ha ki rangbah kiba shongksuid. 34Kumta uwei uwei baroh na ka shnong ki la ïamih ban ïakynduh ïa U Jisu; bad haba ki la ïohi ïa u, ki la kyrpad ïa u ba un leit noh na ka thain jong ki.

Currently Selected:

MATTHAÏOS 8: KHACLBSI

Highlight

Copy