MATTHAÏOS 22
22
Ka pharshi ka jingkhawai shongkurim
(Luk. 14:15-24)
1U Jisu u pyndonkam biang ïa ki pharshi ha kaba kren ïa ki briew. 2“Ka Hima ki bneng ka long kumne. Shisien la don u syiem uba la pynkhreh ka jingkhawai shongkurim na ka bynta u khun jong u. 3U la phah ïa ki shakri jong u ban ïathuh ha ki nongshahkhot sngewbha ban wan sha ka jingkhawai, hynrei kim kwah ban wan. 4Kumta u la phah ïa kiwei pat ki shakri lem bad kane ka khubor ïa ki nongshahkhot sngewbha: ‘La dep khreh ïa ka jingkhawai jong nga mynta, la dep shohdoh ïa ki masi dab bad ïa ki khun masi bakynsai jong nga, bad la khreh ïa kiei kiei baroh. To ale sha ka jingkhawai shongkurim!’ 5Hynrei kiba la shah khot sngewbha kim suidñiew bad ki la leit sha la ki kam ki jam: Uwei sha ka lyngkha jong u, uwei pat sha ka dukan jong u, 6katba kiwei pat ki bat trait ïa ki shakri, ki shoh ïa ki, bad ki la pynïap ïa ki. 7U syiem u la bitar tyngeh; kumta u la phah ïa ki shipai jong u, kiba la pynïap ïa kito ki nongpynïap briew bad ki la thang duh ïa ka nongbah jong ki. 8Nangta u la khot ïa la ki shakri bad u la ong ha ki, ‘La dep khreh ïa ka jingkhawai jong nga, hynrei ki briew kiba nga la khot sngewbha kim don hok ban ïoh ïa ka. 9Mynta to khie leit sha ki surok bah bad khot sngewbha sha ka jingkhawai ïa ki briew katba phi lah ban ïashem.’ 10Kumta ki shakri ki la ïaleit sha ki lynti bah bad ki la ïalumlang ïa ki briew baroh kiba ki lah ban ïashem, kiba bha bad kiba sniew kumjuh, bad ïa ka kamra khawai shongkurim la pyndap da ki briew.
11“U syiem u la leit rung shapoh ban khmih ïa kiba shah khot sngewbha bad u la ïohi ïa u briew uba khlem phong ki jaiñ shongkurim. 12‘Ko paralok, kumno phi ïohrung hangne khlem ki jaiñ shongkurim?’ u syiem u la kylli ïa u. Hynrei uta u briew um shym ong ei ei. 13#Mat. 8:12; 25:30; Luk. 13:28Nangta u syiem u la ong ïa ki shakri jong u, ‘To khum ïa u bad kti bad kjat, bad bret ïa u shabar ha kaba dum. Hangta un lynñiar bad kyr-iat la ki bniat.’ ”
14Bad U Jisu u la pynkut, “Shibun la khot sngewbha, hynrei khyndiat la jied.”
Ka jingkylli shaphang ka jingsiew khajna
(Mrk. 12:13-17; Luk. 20:20-26)
15Ki Pharisi ki la leit noh bad ki la pynlong ka jingthmu ban riam ïa U Jisu da ki jingkylli. 16Nangta ki la phah sha u katto katne ngut na ki synran jong ki bad katto katne ngut ki dkhot jong ka kynhun u Herod. “Ko Nonghikai,” ki la ong, “ngi tip ba me ïathuh ïa ka jingshisha. Me hikai ïa ka jingshisha shaphang ka mon U Blei na ka bynta u briew, khlem da khuslai shaphang kaei kaba ki briew ki pyrkhat, namar ba mem pyrkhat ïa ka kyrdan jongno jongno. 17To ïathuh ïa ngi, te, kaei kaba me pyrkhat? Hato ka long pyrshah ïa ka Aiñ jong ngi ban siew khajna sha u Patsha ka hima Rom, ne kam long?”
18U Jisu pat, u la sngewthuh ïa ka jingthmu basniew jong ki, bad kumta u la ong, “Phi kiba arsap! balei phi ïapyrshang ban riam ïa nga? 19To pyn-i ha nga ïa ka pisa na ka bynta ban siew ïa ka khajna!”
Ki la wanrah ha u ïa ka pisa, 20bad u la kylli ïa ki, “Kane ka dur bad ka kyrteng ki dei ki jongno?”
21“Ki jong u Patsha,” ki la jubab.
Kumta U Jisu u la ong ha ki, “Kumta, te, to siew sha u Patsha ïa kaei kaba dei ka jong u Patsha, bad siew sha U Blei ïa kaei kaba dei ka jong U Blei.”
22Haba ki la ïohsngew ïa kane, ki la lyngngoh; bad ki la iehnoh ïa u bad ki la leit noh.
Ka jingkylli shaphang ka jingmihpat na kiba ïap
(Mrk. 12:18-27; Luk. 20:27-40)
23 #
Ki Kam. 23:8
Ha kata kajuh ka sngi don na ki Saddusi ki la wan sha U Jisu bad ki la kam ba ki briew kin ym mihpat na ka jingïap. 24#Deut. 25:5“Ko Nonghikai,” ki la ong, “u Moses u la ong ba lada u briew u bym don khun u ïap, u para jong u, u dei ban shongkurim ïa ka tnga jong une uba la ïap khnang ba ki lah ban ïoh khun ïa kiba yn lah ban ñiew kum ki khun jong une u briew uba la ïap. 25Mynta, la don hynñiew ngut ki shynrang ba shi para kiba la ju shong ju sah hangne. Uba heh duh u la shongkurim bad u la ïap khlem don khun, kumta u la iehnoh ïa ka tnga jong u ha la u jong u para. 26Kajuh ka jingjia ka la wan jia ha u para uba ar, uba lai, bad khatduh ha baroh hynñiew ngut. 27Ha kaba khatduh eh, ka kynthei ka la ïap. 28Mynta, ha ka sngi ha kaba kiba ïap kin mihpat, kan long ka tnga jongno? Ma ki baroh ki la shongkurim ïa ka.”
29U Jisu u la jubab ïa ki, “A katno phi long kiba bakla! Ka long namar ba phim tip ïa ki jingthoh bakhuid lane ïa ka bor U Blei. 30Naba haba kiba ïap ki mihpat, kin long kum ki angel ha bneng bad kin ym ïashongkurim. 31Mynta, ha kaba ïadei bad ka jingmihpat kiba ïap: Hato phim pat ju pule ïa kaei kaba U Blei u la ïathuh ha phi? U la ong, 32#Eks. 3:6‘Nga long U Blei jong u Abraham, U Blei jong u Isaak, bad U Blei jong u Jakob.’ U long U Blei jong kiba im bad ym jong kiba ïap.”
33Haba ki paidbah ki la ïohsngew ïa kane, ki la sngewphylla ïa ka jinghikai jong u.
Ka Hukum kaba khraw
(Mrk. 12:28-34; Luk. 10:25-28)
34Haba ki Pharisi ki la ïohsngew ba U Jisu u la pynsngap jar ïa ki Saddusi, ki la ïawanlang, 35bad uwei na ki, u nonghikai ka Hukum, u la pyrshang ban riam ïa u da ka jingkylli. 36“Ko Nonghikai,” u la kylli, “kano ka hukum kaba khraw tam hapoh ka Hukum?”
37 #
Deut. 6:5
U Jisu u la jubab, “ ‘Ieit ïa U Trai U Blei jong me da la ka dohnud baroh, da la ka mynsiem baroh, bad da la ka jingmut baroh.’ 38Kane ka long ka hukum kaba khraw tam bad kaba donkam tam. 39#Leb. 19:18Kaba ar ka hukum kaba donkam tam ka long kum katei: ‘Ieit ïa u paramarjan jong me kumba me ieit ïa lade.’ 40#Luk. 10:25-28Ka Hukum u Moses baroh kawei bad ki jinghikai jong ki nongïathuhlypa ki shong halor kine ki ar tylli ki hukum.”
Ka jingkylli shaphang U Messaïah
(Mrk. 12:35-37; Luk. 20:41-44)
41Haba katto katne ngut ki Pharisi ki la ïalumlang, U Jisu u la kylli ïa ki, 42“Phi pyrkhat kumno shaphang u Messaïah? U dei u nonghiarpateng jongno?”
“U dei uba hiarpateng na u Dabid,” ki la jubab.
43“Balei, te,” U Jisu u la kylli, “ba U Mynsiem u pynshlur ïa Dabid ban khot ïa u, ‘U Trai’? U Dabid u la ong,
44 #
Salm. 110:1
“ ‘U Trai u la ong ha U Trai jong nga:
To shong hangne ha ka liang ka mon jong nga
tad haduh ba ngan buh ïa ki nongshun jong me hapoh ki kjat jong me.’
45Kumta lada u Dabid u khot ïa u ‘U Trai,’ kumno ka lah ban long ba U Messaïah un dei uba hiarpateng na u Dabid?”
46Ym don uno uno uba lah ban ai kano kano ka jubab ïa U Jisu, bad naduh kata ka sngi ym don mano mano ba nud ban kylli jingkylli shuh ïa U Jisu.
Currently Selected:
MATTHAÏOS 22: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
