MATTHAÏOS 23

U Jisu u maham pyrshah ïa ki nonghikai ka Hukum bad ki Pharisi

(Mrk. 12:38-39; Luk. 11:43,46; 20:45-46)

1Nangta U Jisu u la kren ha ki paidbah bad ha ki synran jong u. 2“Ki nonghikai ka Hukum bad ki Pharisi ki long kiba la pynkupbor ban batai ïa ka Hukum u Moses. 3Kumta phi dei ban kohnguh bad leh ïa kiei kiei baroh kiba ki ong ïa phi ban leh; pynban, wat pyrthuh bud ïa ki jingleh jong ki; namar ba kim leh ïa kaei kaba ki ïalap. 4Ki teh pynbah ha ki met jong ki briew ïa ki jingkit kiba khia bad kiba eh ban kit, pynban kim mon bad rah la ki kti ban ïarap ïa ki ban kit ïa kito ki jingkit. 5#Mat. 6:1; Deut. 6:8; Jkhñ. 15:38Ki leh ïa kiei kiei baroh khnang ba ki briew kin ïohi ïa ki. Peit ïa ki jingteh 'sai snieh kiba don ki jingthoh bakhuid ïa kiba ki teh ha ki shyllangmat bad ki ksang'ti jong ki, bad khmih haduh katno ki long kiba heh! Khmih ruh katno kiba jrong ki ksai jyrthiaw ha ki jaiñkup jong ki! 6Ki ieit ïa ki jaka bakor tam ha ki jingkhawai bad ïa ki jaka shong ba la buh kyrpang ha ki synagog; 7ki ieit ban shah khublei da ka jingburom ha ki jaka ïew bad ban shah khot ha ki briew ‘ko Nonghikai.’ 8Ïa phi ym dei ban khot ‘ko Nonghikai,’ namar ba phi baroh phi ïalong mar ryngkat bad don tang uwei U Nonghikai. 9Bad phim dei ban khot ïano ïano ha kane ka pyrthei ‘u Kpa,’ namar ba phi don tang uwei u Kpa ha bneng. 10Lymne ba yn khot ïa phi ‘u Nongïalam,’ namar ba u nongïalam jong phi uba tang ma u hi u long u Messaïah. 11#Mat. 20:26,27; Mrk. 9:35; 10:43,44; Luk. 22:26Uba khraw tam hapdeng jong phi u dei ban long u shakri jong phi. 12#Luk. 14:11; 18:14Ïa uno uno uba pynkhraw ïa lade yn pynrit, bad ïa uno uno uba pynrit ïa lade yn pynkhraw.”

U Jisu u pynrem ïa ka jingarsap jong ki

(Mrk. 12:40; Luk. 11:39-42,44,52; 20:47)

13“A katno ka long kaba shyrkhei ïa phi, ki nonghikai ka Hukum bad ki Pharisi! Phi kiba arsap! Phi khang ïa ka jingkhang sha ka Hima ki bneng na khmat ki briew, hynrei ma phi da lade hi phim leit rung shapoh, lymne ba phi shah shapoh ïa kito kiba pyrshang ban rung! 14A katno ka long kaba shyrkhei ïa phi, ki nonghikai ka Hukum bad ki Pharisi! Phi kiba arsap! Phi shim kabu ïa ki riewkynthei bad phi knieh noh ïa ki ïing jong ki, bad nangta phi pyn-i ïa ka jingduwai bajlan! Namar kane, ka jingpynshitom ïa phi kan long kaba kham sniew!

15“A katno ka long kaba shyrkhei ïa phi ki nonghikai ka Hukum bad ki Pharisi! Phi kiba arsap! Phi leit lyngba ki duriaw bad phi ïaid sha kylleng ki ri baroh ban pynkylla ïano ïano; bad haba phi lah, phi pynlong ïa u ar shah uba dei ban leit sha dujok kumba phi hi, phi long!

16“A katno ka long kaba shyrkhei ïa phi, ki nonglam lynti kiba matlah! Phi hikai, ‘Lada uno uno u smai da ka Templ, ïa u ym shym la teh da ka jingsmai jong u; hynrei lada u smai da ka ksiar hapoh ka Templ, u long uba la shah teh.’ 17Ko ki bieit bamatlah! Kano kaba kham donkam, ka ksiar lane ka Templ kaba pynlong khuid ïa ka ksiar? 18Phi hikai ruh, ‘Lada uno uno u smai da ka duwan, ïa u ym shym la teh da ka jingsmai jong u; hynrei lada u smai da ka jingai sngewbha halor ka duwan, u long uba la shah teh.’ 19A katno phi long kiba matlah! Kaei kaba kham donkam, ka jingai sngewbha ne ka duwan kaba pynlong khuid ïa ka jingai sngewbha? 20Kumta te, haba u briew u smai da ka duwan, u smai da ka bad da baroh ki jingai sngewbha halor jong ka; 21bad haba u smai da ka Templ, u smai da ka bad da U Blei, uba don hangta; 22#Isa. 66:1; Mat. 5:34bad haba uno uno u smai da ka bneng, u smai da ka khet U Blei bad da uta uba shong halor jong ka.

23 # Leb. 27:30 “A katno ka long kaba shyrkhei ïa phi, ki nonghikai ka Hukum bad ki Pharisi! Phi kiba arsap! Phi ai sha U Blei ïa kaba shiphew wat jong ki jhur pynbang jingbam, kum u pudina, u dill, bad u kumin, hynrei phim suidñiew ban kohnguh ïa ki jinghikai badonkam shisha jong ka Hukum, kum ka jinglehhok bad ka jingisynei bad ka jingbeit. Ïa kine phi dei ban leh, khlem da klet ïa kiwei pat. 24Ko ki nonglam lynti bamatlah! Phi pjiar ïa u skain na ka jingdih jong phi, hynrei phi nguid ïa ka ut!

25“A katno ka long kaba shyrkhei ïa phi, ki nonghikai ka Hukum bad ki Pharisi! Phi kiba arsap! Phi pynkhuid ïa kaba shabar jong ka khuri bad ka pliang jong phi, katba kaba shapoh ka dap da kaei kaba phi ïoh da ka jingleh jubor bad ka jingpyrkhat tang ïa lade. 26Ko Pharisi bamatlah! To pynkhuid nyngkong ïa kaei kaba shapoh jong ka khuri, bad nangta kaba shabar kan long ruh kaba khuid!

27 # Ki Kam. 23:3 “A katno ka long kaba shyrkhei ïa phi ki nonghikai ka Hukum bad ki Pharisi! Phi kiba arsap! Phi long kum ki jingtep ba la pushara lieh, kiba itynnat ha kaba shabar hynrei kiba dap da ki shyieng bad ki metïap bapyut ha kaba shapoh. 28Ha kajuh ka rukom, ha kaba shabar phi i kumba phi bha ïa baroh, hynrei shapoh phi dap da ka jingarsap bad ki pop.

U Jisu u ïathuhlypa ïa ka jingpynshitom ïa ki

(Luk. 11:47-51)

29“A katno ka long kaba shyrkhei ïa phi, ki nonghikai ka Hukum bad ki Pharisi! Phi kiba arsap! Phi shna ki lum jingtep ba-itynnat na ka bynta ki nongïathuhlypa bad phi pynitynnat ïa ki mot sahkynmaw jong kito kiba im ka jingim kaba bha; 30bad phi kam ba lada phi la im ha kata ka por jong ki kpa tymmen jong phi, phin ym da la leh ïa kaei kaba ki la leh bad pynïap ïa ki nongïathuhlypa. 31Kumta phi phla shisha ba phi long ki khun ki ksiew jong kito kiba la pynïap ïa ki nongïathuhlypa! 32To nang ïaid, bad pyndep ïa kaei kaba ki kpa tymmen jong phi ki la sdang! 33#Mat. 3:7; 12:34; Luk. 3:7Phi ki bseiñ bad ki khun ki bseiñ! Kumno phi khmih lynti ban lait na ka jingshah pynrem sha ka dujok? 34Bad kumta nga ong ha phi ba ngan phah ha phi ïa ki nongïathuhlypa bad ïa ki briew kiba stad bad ïa ki nonghikai; phin pynïap katto katne ngut na ki, phin sahnarphna ïa kiwei pat, bad phin sympat ïa kiwei pat ha ki synagog bad beh ïa ki na kawei ka shnong sha kawei pat. 35#Jen. 4:8; 2 Khrn. 24:20,21Kaba mih na kata, ka jingpynshitom na ka bynta ka jingpynïap ïa baroh ki rangbah balui lui kan hap halor jong phi, naduh ka jingpynïap ïa u Abel balui lui haduh ka jingpynïap ïa u Sakharaïah u khun jong u Berakhaïah, ïa uba phi la pynïap hapdeng ka Templ bad ka duwan. 36Nga ong shisha ha phi: Ka jingpynshitom na ka bynta kine ki jingpynïap baroh kan hap halor ki briew jong kane ka juk!

Ka jingieit U Jisu ïa ka Jerusalem

(Luk. 13:34-35)

37“A Jerusalem, Jerusalem! Pha pynïap ïa ki nongïathuhlypa bad lynthem maw ïa ki nonglamktien kiba U Blei u la phah ha pha! Katno sien nga la kwah ban kdup ha ki ksang'ti jong nga ïa ki briew jong pha baroh, kumba ka syiar ka lumlang ïa la ki khun hapoh ki thapniang jong ka, hynrei pham shym la shah ïa nga. 38#Jer. 22:5Bad kumta ïa ka Templ jong pha yn iehnoh bad kan long kaba thylli. 39#Salm. 118:26Naduh mynta, nga ong ha pha, phan ym ïohi shuh ïa nga tad haduh ba phan ong, ‘U Blei u kyrkhu ïa uta uba wan ha ka kyrteng jong u Trai.’ ”

Currently Selected:

MATTHAÏOS 23: KHACLBSI

Highlight

Copy