MATTHAÏOS 21

Ka jingrung badon-burom sha Jerusalem

(Mrk. 11:1-11; Luk. 19:28-40; Ïoan. 12:12-19)

1Katba U Jisu bad la ki synran ki la poi hajan ka Jerusalem, ki la wan sha Bethphage ha u lum ki Olib. Hangta U Jisu u la nang phah sha khmat ar ngut na ki synran lem bad kine ki jingbthah: 2“Khie leit sha ka nongrit kaba hangta ha khmat jong phi, bad shisyndon phin shem ïa ka kada kaba la teh lem bad u khun kada hajan jong ka. Loit noh ïa ki bad wallam ïa ki sha nga. 3Bad lada uno uno u briew u ong ei ei, ïathuh ha u, ‘U Kynrad u donkam ïa ki;’ bad nangta un sa pyllait ïa ki shisyndon.”

4Kane ka la jia ban pynshisha ïa kaei kaba u nongïathuhlypa u la ong:

5 # Sekh. 9:9 “To ïathuh ïa ka nongbah Seïon,

ha khmih, u Syiem jong pha u wan sha pha!

U long uba sngewrit bad u shong halor ka kada

bad halor u khun kada.”

6Kumta ki synran ki la leit bad ki la leh ïa kaei kaba U Jisu u la bthah ïa ki: 7ki la wallam ïa ka kada bad ïa u khun kada, ki la siang ïa la ki jaiñkup halor jong ki, bad U Jisu u la kiew ban shong. 8U paidbah babun u la siang ïa la ki jaiñkup ha lynti katba kiwei pat ki la khyllad da ki tnat dieng bad ki la siang ïa ki ha lynti. 9#Salm. 118:25,26Ki paidbah kiba la ïaid ha khmat jong U Jisu bad kito kiba la bud nadien ki la sdang ban pyrta, “To ïaroh ïa U khun u Dabid! U Blei u kyrkhu ïa uta uba wan ha ka kyrteng jong U Trai! To ïaroh ïa U Blei!”

10Haba U Jisu u la rung ha Jerusalem, ka nongbah baroh kawei ka la khynwin jlang. “Uei une?” ki briew ki la kylli.

11“Une u long uta U Jisu u nongïathuhlypa, uba na Nasareth ha Galilaïa,” ki paidbah ki la jubab.

U Jisu u leit sha ka Templ

(Mrk. 11:15-19; Luk. 19:45-48; Ïoan. 2:13-22)

12U Jisu u la leit shapoh ka Templ bad u la beh noh ïa baroh kito kiba ïadie bad kiba ïathied hangta. U la pynkylla khongpong ïa ki miej jong ki nongïapeiñ sbai bad ïa ki jaka shong jong kito kiba die paro, 13#Isa. 56:7; Jer. 7:11bad u la ong ha ki, “La thoh ha ki Jingthoh Bakhuid ba U Blei u la ong, ‘Ïa ka Templ jong nga yn khot ka ïing ka jingduwai.’ Hynrei phi pynlong ïa ka, ka jakarieh ïa ki nongtuh!”

14Kiba matlah bad kiba dkoh ki la wan sha u ha ka Templ, bad u la pynkhiah ïa ki. 15Ki rangbah lyngdoh bad ki nonghikai ka Hukum ki la bitar haba ki la ïohi ïa kiei kiei kiba phylla kiba u la leh bad ba ki khynnah ki ïa-pyrta ha ka Templ, “To ïaroh ïa U Khun u Dabid!” 16#Salm. 8:2Kumta ki la kylli ïa U Jisu, “Me ïohsngew ïa kaei kaba ki ong?”

“Ho-oid nga ïohsngew,” la jubab U Jisu. “Phim pat la ju pule ïa kane ka Jingthoh Bakhuid? ‘Me la hikai ïa ki khynnah bad ki khunlung ban ai ki jingïaroh bajanai.’ ”

17U Jisu u la iehnoh ïa ki bad u la mihnoh na ka nongbah sha Bethania, ha kaba u la pynlut ïa ka miet.

U Jisu u tim ïa u dieng Dumbur

(Mrk. 11:12-14,20-24)

18Dang step phyrngab ha ka lynti ba u leit phai sha ka nongbah, U Jisu u la thngan. 19U la ïohi ïa u dieng Dumbur harud ka lynti bad u la leit sha u, hynrei um shem ei ei ha u lait noh tang ki sla. Kumta u la ong ha u dieng, “Men ym pynmih soh shuh!” Mar kumta hi u dieng Dumbur u la ïap tyrkhong.

20Ki synran jong u ki la ïohi ïa kane bad ki la lyngngoh, “Kumno u dieng Dumbur u tyrkhong stet katta katta?” Ki la kylli.

21 # Mat. 17:20; 1 Kor. 13:2 U Jisu u la jubab, “Nga pynthikna ïa phi ba lada phi ngeit bad phim sngew artatien, phin lah ban leh ïa kaei kaba nga la leh ïa une u dieng Dumbur. Bad ym tang kane, hynrei phin lah wat ban ong ha une u lum, ‘Khie joit bad pynnoh ïa lade sha duriaw,’ bad un leh kumta. 22Lada phi ngeit, phin ïohpdiang ïa kaei kaei kaba phi pan ha ka jingduwai.”

Ka jingkylli shaphang ka iktiar jong U Jisu

(Mrk. 11:27-33; Luk. 20:1-8)

23U Jisu u la wan pat sha ka Templ; bad katba u dang hikai, ki rangbah lyngdoh bad ki tymmen ki san ki la wan sha u bad ki la kylli, “Me don hok aïu ban leh ïa kine kiei kiei? Mano ba ai ha me ïa kane ka hok?”

24U Jisu u la jubab ïa ki, “Ngan kylli ïa phi tang kawei ka jingkylli, bad lada phi ai ha nga ka jubab, ngan ïathuh ha phi da ka bor aïu nga don ban leh ïa kine kiei kiei. 25Nangno ka hok jong u Ïoannis ban pynbaptis ka wan: hato ka long na U Blei ne na u briew?”

Ki la sdang ban ïasaidnia para ma ki, “Aïu ngin ïa-ong? Lada ngi jubab ‘Na U Blei,’ un ong ha ngi, ‘Balei, te, phim ngeit ïa u Ïoannis?’ 26Hynrei lada ngi ong, ‘Na u briew,’ ngi sheptieng ïa kaei kaba ki briew ki lah ban leh, namar ki baroh ki la pdiang ba u Ïoannis u la long u nongïathuhlypa.” 27Kumta ki la jubab ïa U Jisu, “Ngim tip.”

Bad u la ong ha ki, “Lymne ma nga ruh ngan ym ïathuh, te, da kaei ka hok ba nga leh ïa kine kiei kiei.

Ka pharshi ki ar ngut ki khun shynrang

28“Mynta, phi pyrkhat aïu? La don shisien uwei u briew uba la don ar ngut ki khun shynrang. U la leit sha uba kham san bad u la ong, ‘Ko khun, khie leit bad trei ha ka bri sohwaiñ mynta ka sngi.’ 29‘Ngam sngewkwah,’ u la jubab, hynrei hadien, u la kylla ka jingmut bad u la leit. 30Nangta u kpa u la leit sha uwei pat u khun bad u la ong ïa kajuh. ‘Ho-oid, pa’ u la jubab, hynrei um shym la leit. 31Uno na kine ar ngut uba la leh ïa kaei kaba u kpa u la kwah?”

“Uta uba kham san,” ki la jubab.

Kumta U Jisu u la ong ha ki, “Nga ong ha phi: Ki nonglum khajna bad ki nuti ki leit rung shapoh ka Hima U Blei ha shuwa jong phi. 32#Luk. 3:12; 7:29,30Naba u Ïoannis u Nongpynbaptis u la wan ha phi da kaba pyn-i ha phi ïa ka lynti ïaid kaba dei, bad phim shym la ngeit ïa u; hynrei ki nonglum khajna bad ki nuti ki la ngeit ïa u. Wat haba phi la ïohi ïa kane, phim shym la kylla ïa la ki jingmut hadien bad ngeit ïa u.

Ka pharshi ki nongshimwai ha ka bri sohwaiñ

(Mrk. 12:1-12; Luk. 20:9-19)

33 # Isa. 5:1,2 “To shahshkor sa kawei pat ka pharshi,” U Jisu u la ong. “La don shisien u trai jaka uba la thung ka bri sohwaiñ, u la buh ka jingker sawdong jong ka, u la tih ka thliew na ka bynta ka jaka khñiot waiñ, bad u la tei ka jaka ap phira. Nangta u la aiwai ïa ka bri sohwaiñ ha ki nongshimwai bad u la leit jingleit. 34Haba ka por ka la poi ban lumlang ïa ki sohwaiñ, u la phah ïa ki mraw jong u sha ki nongshimwai ban ïohpdiang ïa ka bhah jong u na ka jingkheit. 35Ki nongshimwai ki la kem ïa ki mraw jong u, ki shoh ïa uwei, ki pynïap ïa uwei pat, bad ki la lynthem maw ïa uwei pat. 36Sa shisien uta u briew u la phah biang ïa kiwei pat ki mraw, kham bun ïa kaba nyngkong, bad ki nongshimwai ki la leh ïa ki ha kajuh ka rukom. 37Ha kaba khatduh u la phah ïa la u khun sha ki. ‘Da shisha kin burom ïa u khun jong nga,’ u la ong. 38Hynrei haba ki nongshimwai ki la ïohi ïa u khun, ki la ong ha lade, ‘Une u long u khun jong u trai. Ale, to ngin pynïap ïa u, bad ngin ïoh ïa ka jingdon jingem jong u!’ 39Kumta ki la kem ïa u, bad ki la bret ïa u shabar ka bri sohwaiñ, bad ki la pynïap ïa u.

40“Mynta, haba u trai ka bri sohwaiñ u wan, kaei kaba un leh ïa kito ki nongshimwai?” U Jisu u la kylli.

41“Da shisha un pynïap ïa kito ki briew kiba sniew,” ki la jubab, “bad un aiwai ïa ka bri sohwaiñ ha kiwei pat ki nongshimwai, ki ban ai ha u ïa ka bhah jong u na ka jingkheit ha ka por kaba biang.”

42 # Salm. 118:22,23 U Jisu u la ong ha ki, “Hato phim pat ju pule ïa kaei ba ki Jingthoh Bakhuid ki ong?

“ ‘Ïa u maw ba ki nongtei ki la kyntait kum u bymdondor

u la kylla long uba donkam tam na baroh.

Ïa kane la leh da U Trai;

katno ka long kaba itynnat!’ ”

43“Bad kumta nga ong ha phi,” U Jisu u la bynrap, “ïa ka Hima U Blei yn shim noh na phi bad yn ai ha ki briew ki ban pynmih ki soh kiba dei.” 44Uno uno uba hap halor une u maw un shah ot lyngkhot; bad lada u maw u hap halor uno uno, un pynlwet jin ïa uta.

45Ki rangbah lyngdoh bad ki Pharisi ki la ïohsngew ïa ki pharshi jong U Jisu bad ki la tip ba u la kren shaphang jong ki, 46kumta ki la pyrshang ban kem ïa u. Hynrei ki la sngewsheptieng ïa u paidbah, uba la ñiew ba U Jisu u dei u nongïathuhlypa.

Currently Selected:

MATTHAÏOS 21: KHACLBSI

Highlight

Copy