MATTHAÏOS 20
20
Ki nongtrei ha ka bri sohwaiñ
1“Ka Hima ki bneng ka long kumne. Shisien la don u briew uba la mih dang step phyrngab ban khot bylla katto katne ngut ki rangbah ban trei ha ka bri sohwaiñ jong u. 2U la mynjur ban siew ïa ki ka bainong sngi, shi sbai rupa shi sngi, bad u la phah ïa ki ban trei ha ka bri sohwaiñ jong u. 3U la leit biang sha ka jaka ïew ha ka por khyndai baje, bad u la ïohi katto katne ngut ki rangbah kiba ïa-ïeng hangta khlem kam, 4kumta u la ong ïa ki, ‘Phi ruh khie leit bad trei ha ka bri sohwaiñ, bad ngan siew ka bainong kaba biang.’ Kumta ki la leit. 5Nangta ha ka por khat-ar baje bad ruh ha ka por lai baje u la leh kumjuh. 6Ka la jan dap artat san baje haba u la leit sha ka jaka ïew bad u la ïohi katto katne ngut ki rangbah kiba dang ïeng hi hangta. ‘Balei ba phi pynsep-ei ïa ka sngi baroh kawei hangne khlem kam?’ u la kylli ïa ki. 7‘Ym don mano mano ba khot bylla ïa ngi,’ ki la jubab. ‘Lada kumta, te, phi ruh khie leit bad trei ha ka bri sohwaiñ,’ u la ong ha ki.
8 #
Leb. 19:13; Deut. 24:15 “Haba ka janmiet ka la poi, u trai u la bthah ïa la u sordar, ‘To khot ïa ki nongtrei bad siew ïa ka bainong jong ki, sdang na kito kiba la shah khot bylla khatduh bad pynkut ha kito kiba la shah khot bylla nyngkong.’ 9Ïa ki rangbah kiba la sdang ban trei ha ka por san baje la ai mar shi sbai rupa. 10Kumta haba ki rangbah kiba la long kiba nyngkong ban shah khot bylla ki la wan ban ïoh ïa ka bainong, ki la pyrkhat ba kin ïoh kham bun; hynrei ïa ki ruh la ai mar shi sbai rupa. 11Ki la shim la ka bainong bad ki la ïakhñium pyrshah ïa u nongaikam. 12‘Kine ki briew kiba la shah khot bylla khatduh ki la trei tang shi kynta,’ ki la ong, ‘katba ïa ngi la buh ha ka kam baroh shi sngi ha ka jingshit ka sngi — pynban me siew ïa ki kumjuh kumba me la siew ïa ngi!’
13“ ‘To shahshkor, ko paralok,’ u trai u la jubab ha uwei na ki, ‘ngam shym la shukor ïa phi. Nalor kata baroh, phi la mynjur ban trei ïa ka jingtrei sngi na ka bynta shi sbai rupa. 14Mynta to shim ïa ka bainong jong phi bad khie leit sha ïing. Nga kwah ban ai ha une u briew uba la shah khot khatduh katjuh kumba nga la ai ha phi. 15Hato ngam don ka hok ban leh katba nga sngewbit ïa la ka jong ka pisa? Ne phi ïa-bishni namar ba nga long uba sbun?’ ”
16 #
Mat. 19:30; Mrk. 10:31; Luk. 13:30 Bad U Jisu u la pynkut, “Kumta kiba khatduh kin long ha shuwa, bad kito kiba ha shuwa kin long khatduh.”
U Jisu u kren ha ka sien kaba lai shaphang ka jingïap jong u
(Mrk. 10:32-34; Luk. 18:31-34)
17Katba U Jisu u dang kiew sha Jerusalem, u la shim kyrpang ïa ki khat-ar ngut ki synran bad u la kren jar jar ha ki, katba ki dang ïa-ïaid. 18“Shahshkor,” u la ong ïa ki, “ngi ïaleit kiew sha Jerusalem, ha kaba yn aiti ïa U Khun U Briew ha ki rangbah lyngdoh bad ki nonghikai ka Hukum. 19Kin pynrem ïa u sha ka jingïap bad kin aiti ïa u ha ki Jentil, ki ban krenbeiñ ïa u, kin sympat ïa u, bad kin sahnarphna ïa u; hynrei hadien lai sngi yn sa pynmihpat ïa u.”
Ka jingkyrpad ka kmie
(Mrk. 10:35-45)
20Nangta ka tnga jong u Sebedi ka la wan sha U Jisu lem bad ar ngut ki khun shynrang jong ka, ka la nguh dem ha khmat jong u, bad ka la kyrpad ïa u ban leh ei ei.
21“Kaei kaba pha kwah?” U Jisu u la kylli ïa ka.
Ka la jubab, “To kular ïa nga ba kine ki khun shynrang jong nga kin shong ha ka liang kamon bad ka liang kadiang jong me haba men long u Syiem.”
22“Phim tip ïa kaei kaba phi pan,” U Jisu u la jubab ïa ki khun shynrang jong ka. “Hato phi lah ban dih ïa ka khuri ka jingshah shitom ïa kaba ngan sa dih?”
“Ngi lah,” ki la jubab.
23“Phin sa dih shisha na ka khuri jong nga,” U Jisu u la ïathuh ha ki, “hynrei ngam don ka hok ban jied ïa uno u ban shong sha liang kamon jong nga bad sha liang kadiang jong nga. Kine ki jaka ki long na ka bynta kito ïa kiba U Kpa jong nga u la pynkhreh.”
24Haba kiwei pat ki shiphew ngut ki synran ki la ïohsngew shaphang kane, ki la bitar ïa kita ar ngut shi para. 25#Luk. 22:25,26Kumta U Jisu u la khot lang ïa ki baroh bad u la ong, “Phi tip ba ki nongsynshar jong ki bymngeit blei ki donbor halor jong ki, bad ki nongïalam ki don ka iktiar ba-pura. 26#Mat. 23:11; Mrk. 9:35; Luk. 22:26Kane, la kumno kumno, kam dei ka rukom ban long hapdeng jong phi. Lada uwei na phi u kwah ban long uba khraw, u dei ban long u shakri ïa kiwei pat; 27bad lada uwei na phi u kwah ban long uba nyngkong, u dei ban long u mraw jong phi — 28kum U Khun U Briew, u bym shym la wan ba un shah shakri, hynrei ban shakri bad aiti ïa la ka jingim ban siewspah ïa ki briew kiba bun.”
U Jisu u pynkhiah ïa ki ar ngut kiba matlah
(Mrk. 10:46-52; Luk. 18:35-43)
29Katba U Jisu bad ki synran jong u ki dang mihnoh na Jerikho, u paidbah babun u la bud. 30Bad ar ngut ki rangbah bamatlah kiba shong harud lynti ki la ïohsngew ba U Jisu u ïaid nangta, kumta ki la sdang ban pyrta, “Ko Khun u Dabid! To sngewsynei ïa ngi, ko Kynrad!”
31U paidbah u la kynhied ïa ki bad ong ïa ki ban sngap jar. Hynrei ki la nang pyrta kham jam, “Ko Khun u Dabid! To sngewsynei ïa ngi, ko Kynrad!”
32U Jisu u la sangeh bad u la khot ïa ki. “Kaei phi kwah ïa nga ban leh na ka bynta jong phi?” u la kylli ïa ki.
33“Ko Kynrad,” ki la jubab, “ngi kwah ïa me ban ai ha ngi ka jinglah ban ïohi!”
34U Jisu u la isynei ïa ki bad u la ktah ïa ki khmat jong ki; mar kumta hi ki la lah ban ïohi, bad ki la bud ïa u.
Currently Selected:
MATTHAÏOS 20: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
