MATTHAÏOS 12

Ka jingkylli shaphang ka Sabbaton

(Mrk. 2:23-28; Luk. 6:1-5)

1 # Deut. 23:25 Ym slem hadien U Jisu u la ïaid lyngba ki katto katne ki lyngkha kew ha ka sngi Sabbaton. Ki synran jong u ki la thngan, ba kumta ki la sdang ban ïakheit ïa ki rynjup kew bad bam ïa ki symboh kew. 2Haba ki Pharisi ki la ïohi ïa kane, ki la ong ha U Jisu, “Ha khmih, ka long pyrshah ïa Ka Aiñ jong ngi na ka bynta ki synran jong me ban leh ïa kane ha ka sngi Sabbaton.”

3 # 1 Sam. 21:1-6 U Jisu u la jubab, “Phim pat ju pule ïa kaei kaba u Dabid u la leh ha kata ka por mynba ma u bad ki rangbah jong u ki la thngan? 4#Leb. 24:9U la leit rung shapoh ka Templ, bad ma u lem bad ki rangbah jong u ki la ïabam ïa u kpu uba la ainguh sha U Blei, wat la ka la long pyrshah ïa Ka Aiñ ïa ki ban bam ïa uta — tang ïa ki lyngdoh la shah ba kin bam ïa uta u kpu. 5#Jkhñ. 28:9,10Lane phim pat ju pule ha ka Hukum u Moses ba man la ka sngi Sabbaton ki lyngdoh hapoh ka Templ ki pynkheiñ shisha ïa ka aiñ sngi Sabbaton, pynban kim shah pynrem? 6Nga ong ha phi ba ka don kaei kaei hangne kaba kham khraw ban ïa ka Templ. 7#Mat. 9:13; Hos. 6:6Ka Jingthoh Bakhuid ka ong, ‘Dei ka jingbhasbun kaba nga kwah, ym ïa ka jingkñia ïa ki mrad.’ Lada phi la tip kaei ka jingmut jong kane, phin ym da la pynrem ïa ki briew ki bym shym shah pynrem; 8namar U Khun U Briew u long U Trai jong ka Sabbaton.”

U Briew uba don ka kti baïapshiliang

(Mrk. 3:1-6; Luk. 6:6-11)

9U Jisu u la mihnoh na kata ka jaka bad u la leit sha ka Synagog, 10ha kaba la don u briew uba don ka kti kaba la ïapshiliang. Katto katne ki briew hangta kiba la kwah ban mudui ïa U Jisu ha ka jingleh bakla, kumta ki la kylli ïa u, “Hato ka long pyrshah ïa Ka Aiñ jong ngi ban pynkhiah ha ka sngi Sabbaton?”

11 # Luk. 14:5 U Jisu u la jubab, “Kumno lada uwei na phi u don kawei ka langbrot bad ka hap hapoh ka thliew bajylliew ha ka sngi Sabbaton? Hato phin ym bat ïa ka bad kyntiew ïa ka shabar? 12Bad u briew u kham kor bun shah ban ïa ka langbrot! Kumta te, ka Aiñ jong ngi ka shah ïa ngi ban ïarap ïano ïano ha ka sngi Sabbaton.” 13Nangta u la ong ha u briew uba don ka kti kaba la ïapshiliang, “To kner shabar ïa la ka kti.”

U la kner shabar ïa ka bad ka la kylla bha pat, kumba long kata kawei pat. 14Nangta ki Pharisi ki la mihnoh bad ki la pynlong ki jingthmu ban pynïap ïa U Jisu.

U shakri ba la jied jong U Blei

15Haba U Jisu u la ïohsngew shaphang ka jingïasylla pyrshah ïa u, u la leit noh na kata ka jaka, bad bun ki briew ki la bud ïa u. U la pynkhiah ïa kito baroh kiba pang 16bad u la ai hukum ïa ki ban ym ïathuh ha kiwei pat shaphang jong u. 17U la leh ïa kane khnang ban pynurlong shisha ïa kaei kaba U Blei u la kren lyngba u Isaïah u nongïathuhlypa:

18 # Isa. 42:1-4 “Une hangne u long u shakri jong nga, ïa uba nga la jied,

uta uba nga ieit, bad ha uba nga sngewbha eh.

Ngan phah ïa U Mynsiem jong nga halor jong u,

bad un pynbna ïa ka jingbishar jong nga ha ki jaitbynriew.

19Un ym ïakajia lane pyrta,

lane kren ki jingkren bajam ha ki lynti bah.

20Un ym pynkheiñ ïa u khah ba la kdor

lane pynlip ïa u 'sai sharak ba dang mehding.

Un ïaineh tad haduh ba un pynlong ïa ka jinglehhok ban jop,

21bad ha u ki briew baroh kin buh ïa ka jingkyrmen jong ki.”

U Jisu bad u Beelsebul

(Mrk. 3:20-30; Luk. 11:14-23)

22Nangta katto katne ngut ki briew ki la wallam sha U Jisu ïa u briew uba la matlah bad u bymnang kren namar u la shongksuid. U Jisu u la pynkhiah ïa u briew, ba kumta u la lah ban kren bad ïohi. 23Ki paidbah ki la sngewkyndit ïa kaei kaba U Jisu u la leh. “Hato une un dei U Khun jong u Dabid?” ki la kylli.

24 # Mat. 9:34; 10:25 Haba ki Pharisi ki la ïohsngew ïa kane, ki la jubab, “U la beh noh ïa ki ksuid tang namar ba u rangbah jong ki, u Beelsebul u ai bor ïa u ban leh kumta.”

25U Jisu u la tip ïa kaei kaba ki pyrkhat, kumta u la ong ha ki, “Kano kano ka ri kaba phiah ïa lade ha ki kynhun kiba ïaleh kawei ïa kawei pat kan ym neh slem. Bad kano kano ka shnong lane ka longïing kaba phiah ïa lade ha ki kynhun kiba ïaleh kawei ïa kawei pat kan khyllem ha ka jingpra. 26Kumta lada kawei ka kynhun ka ïaleh ïa kawei pat ka kynhun hapoh ka hima jong u Soitan, kane ka mut ba ka la da ïaphiah ha ki kynhun bad shen kan sa khyllem ha ka jingpra! 27Phi ong ba nga beh noh ïa ki ksuid namar ba u Beelsebul u ai ha nga ka bor ban leh kumta. Ñiuma, te, mano ba ai ha ki briew jong phi ka bor ban beh noh ïa ki? Kaei kaba ki briew jong phi hi ki leh ka pynshisha ba phi bakla! 28Em, ym dei u Beelsebul, hynrei U Mynsiem U Blei, uba ai ha nga ka bor ban beh noh ïa ki ksuid, kaba pynshisha ba ka Hima U Blei ka la da wan lypa ha phi.

29“Ym don uba lah ban phrung jubor shapoh ka ïing jong u briew uba khlaiñ bad kit noh ïa ki jingdon jingem jong u lymda nyngkong eh u teh u khum shuwa ïa u briew uba khlaiñ, nangta u sa lah ban lute ïa ka ïing jong u.

30 # Mrk. 9:40 “Uno uno u bym long na ka bynta jong nga, u ïaleh pyrshah shisha ïa nga; uno uno u bym ïarap ïa nga ban lum ban lang u long shisha uba pynsaphred. 31Bad kumta nga ong ha phi ba ki briew ki lah ban ïohmap ïa kano kano ka pop bad ïa kano kano kaba sniew kaba ki ong; hynrei uno uno uba kren kiei kiei kiba sniew pyrshah ïa U Mynsiem Bakhuid un ym ïoh jingmap. 32#Luk. 12:10Uno uno uba kren ei ei pyrshah ïa U Khun U Briew u lah ban ïoh jingmap; hynrei uno uno uba kren ei ei pyrshah ïa U Mynsiem Bakhuid un ym ïoh jingmap — mynta lane junom.

U dieng bad la ki soh

(Luk. 6:43-45)

33 # Mat. 7:20; Luk. 6:44 “Ban ïoh ïa u soh uba bha phi dei ban don u dieng uba plung bha; lada phi don u dieng uba swai, phin ïoh u soh uba sniew. Ïa u dieng la tip da u jait soh ba u pynmih. 34#Mat. 3:7; 23:33; Luk. 3:7; Mat. 15:18; Luk. 6:45Phi ki bseiñ — kumno phi lah ban ong ïa kiei kiei kiba bha haba phi long kiba sniew? Namar ka shyntur ka kren ïa kaei kaba la shlei ha ka dohnud. 35U briew uba bha u sei ïa kiei kiei kiba bha na ka jingkynshew jong kiei kiei kiba bha; u briew uba sniew u sei ïa kiei kiei kiba sniew na ka jingkynshew jong kiei kiei kiba sniew.

36“Phi lah ban thikna ba ha ka Sngi ka Jingbishar uwei pa uwei un hap ban ai jingkheiñ ïa kawei pa kawei ka kyntien ka bymmyntoi kaba u la kren. 37Ïa ki kyntien jong phi yn sa pyndonkam ban bishar ïa phi — ban pynbna ïa phi la phi long uba lui lui ne uba shah pynrem.”

Ka jingdawa ïa ka kambah

(Mrk. 8:11-12; Luk. 11:29-32)

38 # Mat. 16:1; Mrk. 8:11; Luk. 11:16 Nangta katto katne ki nonghikai ka Hukum bad katto katne ki Pharisi ki la kren. “Ko Nonghikai,” ki la ong, “ngi kwah ban ïohi ïa me ba me leh kambah.”

39 # Mat. 16:4; Mrk. 8:12 “Katno kiba sniew bad bym don blei ki long ki briew jong kane ka por!” U Jisu u la pynbna. “Phi pan na nga ïa ka kambah? Em! Ka kambah kaba yn ai ha phi ka long tang ka kambah jong u Jonah u nongïathuhlypa. 40#Jon. 1:17Ha kajuh ka rukom ba u Jonah u la pynlut lai sngi bad lai miet hapoh u dohkha uba heh, kumta U Khun U Briew un pynlut lai sngi bad lai miet ha kiba jylliew jong ka khyndew. 41#Jon. 3:5Ha ka Sngi ka Jingbishar ki briew jong ka Ninebeh kin ïeng joit bad mudui ïa phi, namar ki la phai noh na ki pop jong ki mynba ki la ïohsngew ba u Jonah u ïalap; bad nga ong ha phi ba don hangne uba kham khraw ban ïa u Jonah! 42#1 Syiem. 10:1-10; 2 Khrn. 9:1-12Ha ka Sngi ka Jingbishar, ka syiem jong ka Sheba kan ïeng joit bad mudui ïa phi, namar ka la wan na la ka ri bajngai ban shahshkor ïa ka jinghikai bastad jong U Syiem Solomon; bad nga pynthikna ïa phi ba don hangne uba kham khraw ban ïa u Solomon!

Ka jingwanphai U Mynsiem Bymkhuid

(Luk. 11:24-26)

43“Haba u mynsiem bymkhuid u la mihnoh na u briew, u ïaid napdeng ka jaka ryngkhiang da kaba khmih ïa ka jaka ban ïoh pynjahthait. Lada um lah ban shem ïa kano kano, 44u ong ha lade, ‘Ngan leit phai pat sha la ïing.’ Kumta u leit phai pat bad u shem ba ka ïing ka thylli, ka khuid, bad baroh la buh ryntih. 45Nangta u mihnoh bad u wan ïalam sa hynñiew ngut kiwei pat ki mynsiem wat kiba kham sniew ban ïa u, bad ki wan shongsah hangta. Kumta haba baroh ka la kut, uta u briew un don ha ka jinglong kaba kham sniew ban ïa kaba u la long ha kaba sdang. Kane ka long kaei ka ban jia ha ki briew kiba sniew jong kane ka por.”

Ka kmie bad ki para shynrang jong U Jisu

(Mrk. 3:31-35; Luk. 8:19-21)

46U Jisu u dang kren ha ki briew mynba ka kmie bad ki para shynrang jong u ki la wan poi. Ki la ïeng shabar, ki da kyrpad ban ïoh kren ïa u. 47Kumta uwei na ki briew hangta u la ong ha u, “Ha khmih, ka kmie bad ki para shynrang jong me ki ïa-ïeng shabar bad ki kwah ban ïakren bad me.”

48U Jisu u la jubab, “Kaei ka kmie jong nga, bad kiei ki para shynrang jong nga?” 49Nangta u la kdew sha la ki synran bad u la ong, “Ha khmih! Hangne ki long ka kmie bad ki para shynrang jong nga! 50Uno uno uba leh ïa kaei kaba U Kpa jong nga uba ha bneng u kwah ïa u ban leh u long u para jong nga, ka para jong nga, bad ka kmie jong nga.”

Currently Selected:

MATTHAÏOS 12: KHACLBSI

Highlight

Copy