MATTHAÏOS 13

Ka pharshi u nongbet

(Mrk. 4:1-9; Luk. 8:4-8)

1Ha kata kajuh ka sngi U Jisu u la mihnoh na ïing bad u la leit sharud ka duriaw, ha kaba u la shong ban hikai. 2#Luk. 5:1-3Ki paidbah kiba la ïalum sawdong ïa u, ki la bun katta katta haduh ba u la kiew halor ka lieng bad u la shong ha ka, katba ki paidbah ki la ïeng harud duriaw. 3U la pyndonkam ïa ki pharshi ban ïathuh ïa ki shibun kiei kiei.

“Shisien la don u briew uba la mihnoh ban bet symbai. 4Katba u dang bet ïa u symbai ha ka lyngkha, khyndiat na u symbai u la hap ha lynter ka lynti ïaid kjat, bad ki sim ki la wan bad bam noh. 5Khyndiat pat u la hap halor ka jaka maw ha kaba don tang khyndiat ka khyndew. Shen ki symbai ki la speh, namar ka khyndew kam da jylliew. 6Hynrei haba ka sngi ka la mih, ka thang ïa ki jingthung ba dang lung; bad namar ba ki thied kim da ngam jylliew bha, shen ki jingthung ki la ïap tyrkhong. 7Khyndiat na u symbai u la hap hapdeng ki bniap dieng shiah, kiba la san bad kjap noh ïa ki jingthung. 8Hynrei khyndiat ki symbai u la hap ha ka khyndew kaba bha, bad ki jingthung ki la pynmih symboh; katto katne ki la pynmih shispah tylli, kiwei pat hynriewphew tylli, bad kiwei pat laiphew tylli.”

9Bad U Jisu u la pynkut, “To shahshkor, te, lada phi don ki shkor!”

Ka jingthmu ki pharshi

(Mrk. 4:10-12; Luk. 8:9-10)

10Nangta ki synran ki la wan sha U Jisu bad ki la kylli ïa u, “Balei me pyndonkam ïa ki pharshi haba me kren ha ki paidbah?”

11U Jisu u la jubab, “Ïa ka jingtip shaphang kiei kiei kiba rieh jong ka Hima ki Bneng la ai ha phi, hynrei ym ha ki. 12#Mat. 25:29; Mrk. 4:25; Luk. 8:18; 19:26Naba ha u briew uba don ei ei yn nang ai shuh shuh, khnang ba un ïoh kham bun; hynrei ha u briew u bym don ei ei yn shim noh na u wat ïa kaba rit tam kaba u don. 13Ka daw ba nga pyndonkam ïa ki pharshi ha kaba ïakren bad ki ka long ba ki peit, hynrei kim ïohi, bad ki shahshkor, hynrei kim ïohsngew lane shemphang. 14#Isa. 6:9,10Kumta ka jingïathuhlypa jong u Isaïah ka la treikam ha ki:

“ ‘Kine ki briew kin shahshkor bad ïai shahshkor, hynrei kim shemphang;

kin khmih bad ïai khmih, hynrei kim ïohi,

15namar ki jingpyrkhat jong ki, ki la bthi,

bad ki la set ïa ki shkor jong ki

bad ki la khapbrip la ki khmat.

Lymda kumta, ki khmat jong ki, kin jin da la ïohi,

ki shkor jong ki kin jin da la ïohsngew

ki jingmut jingpyrkhat jong ki kin jin da la shemphang,

bad kin jin da la wan phai pat sha nga,’ ong U Blei,

‘bad ngan pynkhiah ïa ki.’

16 # Luk. 10:23,24 “Na ka bynta jong phi, katno kiba donbok phi long! Ki khmat jong phi ki ïohi bad ki shkor jong phi ki ïohsngew. 17Nga pynthikna ïa phi ba bun ki nongïathuhlypa bad bun ki briew ki jong U Blei ki la kwah shikatdei eh ban ïohi ïa kaei kaba phi ïohi, hynrei kim lah ïohi, bad ban ïohsngew ïa kaei kaba phi ïohsngew, hynrei kim shym la lah ïohsngew.

U Jisu u batai ïa ka pharshi u nongbet

(Mrk. 4:13-20; Luk. 8:11-15)

18“To shahshkor, te, bad to ïoh jinghikai ïa kaei ba ka pharshi u nongbet ka kit jingmut. 19Kito kiba ïohsngew ïa ka khubor shaphang ka Hima hynrei ki bymshemphang ïa ka, ki long kum ki symbai kiba la hap ha shi lynter ka lynti ïaid kjat. Uta u Basniew u wan bad u knieh noh ïa kaei kaba la bet hapoh jong ki. 20Ki symbai kiba la hap ha ka jaka mawsiang ki ïeng na ka bynta kito kiba pdiang ïa ka khubor da kaba kmen mar ïa ïohsngew ïa ka. 21Hynrei kam shym ngam jylliew hapoh jong ki, bad kim shym neh slem. Kumta haba ka jingjynjar lane ka jingshah pynshitom beiñ ka wan namar ka khubor, ki iehnoh shisyndon. 22Ki symbai kiba hap hapdeng ki bniap shiah ki ïeng na ka bynta kito kiba ïohsngew ïa ka khubor; hynrei ki jingkhuslai shaphang kane ka jingim bad ka jingieit ïa ka spah ki kjap ïa ka khubor, bad kim pynmih soh. 23Bad ki symbai kiba la bet ha ka khyndew kaba bha ki ïeng na ka bynta kito kiba ïohsngew ïa ka khubor bad shemphang ïa ka: ki pynmih soh, katto katne shispah tylli, kiwei pat hynriewphew tylli, bad kiwei pat laiphew tylli.”

Ka pharshi ki ñiut

24U Jisu u la ïathuh ha ki ïa kawei pat ka pharshi: “Ka Hima ki bneng ka long kumne. U briew u la bet ïa u symbai babha hapoh ka lyngkha jong u. 25Ha kawei ka miet, haba baroh ki la ïohthiah, u nongshun u la wan bad u la bet ïa ki ñiut hapdeng u kew, bad u la leit noh. 26Haba ki jingthung ki la san bad ki kop sohkew ki la sdang mih, te ki ñiut ruh ki la paw. 27Ki shakri jong uta u briew ki la wan sha u bad ki la ong, ‘Ko kynrad, u long u symbai uba bha uba phi la bet hapoh ka lyngkha jong phi; nangno ki ñiut ki wan mih?’ 28‘La dei katto katne ngut ki nongshun kiba la leh ïa kane,’ u la jubab. ‘Phi kwah ïa ngi ban leit bad phut noh ïa ki ñiut?’ ki la kylli ïa u. 29‘Em,’ u la jubab, ‘namar haba phi lumlang ïa ki ñiut phi lah ban kum jynrat katto katne u kew lem bad ki. 30Ai ba u kew bad ki ñiut kin ïasan lang tad haduh ka aïom ot. Nangta ngan ong ha ki nongot ban rat nyngkong ïa ki ñiut, ban tehsong ïa ki bad ban thang ïa ki, bad nangta ban lumlang shapoh ïa u kew bad buh ïa u ha ka thiar jong nga.’ ”

Ka pharshi u symbai Tyrso

(Mrk. 4:30-32; Luk. 13:18-19)

31U Jisu u la ïathuh ha ki kawei pat ka pharshi. “Ka Hima ki bneng ka long kumne. U briew u shim ïa u symbai tyrso bad u bet ïa u hapoh ka lyngkha jong u. 32U long u symbai uba rit tam na ki symbai baroh, hynrei haba u la san, u long u jingthung uba heh tam na baroh ki jingthung. U kylla long u dieng, ba kumta ki sim ki wan bad thaw ïa ki skum jong ki ha ki tnat jong u.”

Ka pharshi u thiat

(Luk. 13:20-21)

33U Jisu u la ïathuh ha ki sa kawei pat ka pharshi. “Ka Hima ki Bneng ka long kumne. Ka briew ka shim khyndiat u thiat bad ka khleh ïa u bad sawphew kilo u purew tad haduh ba u 'purew ba la khleh u sieb.”

Ka jingpyndonkam U Jisu ïa ki pharshi

(Mrk. 4:33-34)

34U Jisu u la pyndonkam ïa ki pharshi ban ïathuh ïa kine kiei kiei baroh ha ki paidbah; um ju ong ïa kano kano ha ki khlem da pyndonkam ïa ka pharshi. 35#Salm. 78:2U la leh ïa kane ban pynurlong shisha ïa kaei kaba u nongïathuhlypa u la lah ong:

“Ngan pyndonkam da ki pharshi haba nga kren ha ki,

ngan ïathuh ha ki ïa kiei kiei ki bymtip naduh ba la pynlong ïa ka pyrthei.”

U Jisu u batai ïa ka pharshi ki ñiut

36Haba U Jisu u la iehnoh ïa u paidbah bad u la leit rung shapoh ïing, ki synran jong u ki la wan sha u bad ki la ong, “To ïathuh ïa ngi aïu ka pharshi shaphang ki ñiut hapoh ka lyngkha ka kit jingmut.”

37U Jisu u la jubab, “U briew uba la bet ïa u symbai babha u long U Khun U Briew; 38ka lyngkha ka long ka pyrthei; u symbai babha u long ki briew kiba long ki jong ka Hima; ki ñiut ki long ki briew kiba long ki jong Uta u Basniew; 39bad u nongshun uba la bet ïa ki ñiut u long u Ksuid. Ka jingot ka long kaba kut jong ka Ïa, bad ki nongot ki long ki angel. 40Kumba ïa ki ñiut la lumlang bad la thang ïa ki hapoh ka ding, kumta kajuh hi kan jia ha kaba kut ka Ïa: 41U Khun U Briew un phah ïa la ki angel ba lumlang napoh ka Hima jong u ïa kito baroh kiba pynlong ïa ki briew jong u ban leh pop bad ïa baroh kiwei pat kiba leh ïa kiei kiei kiba sniew, 42bad kin bret ïa ki shapoh ka lawar ding baklang, ha kaba kin lynñiar bad kyr-iat bniat. 43Nangta ki briew jong U Blei kin tyngshaiñ kum ka sngi ha ka Hima jong U Kpa jong ki. To shahshkor, te, lada phi don ki shkor!

Ka pharshi ka jingkynshew ba la buhrieh

44“Ka Hima ki bneng ka long kumne. U briew ryngkhat u shem ïa ka jingkynshew ba la buhrieh hapoh ka lyngkha. U tap pat ïa ka, bad u kmen haduh katta katta ba u leit bad die ïa kiei kiei baroh kiba u la don, bad nangta u leit pat bad thied ïa kata ka lyngkha.

Ka pharshi u mawlynnai

45“Kumjuh, ka Hima ki bneng ka long kumne. U briew u wad ïa ki mawlynnai kiba kordor, 46bad haba u la shem ïa uwei uba ikordor tam, u leit bad die lut ïa kaei kaei kaba u la don, bad u thied ïa uta u mawlynnai.

Ka pharshi jong ka jar

47“Kumjuh, ka Hima ki bneng ka long kumne. Katto katne ki nongtong dohkha ki bret ïa ka jar jong ki hapoh ka duriaw bad ki ïoh bun jait ki dohkha. 48Haba ka jar ka la dap, ki la tan ïa ka sharud duriaw bad ki la ïashong ban pynbynta ïa ki dohkha: ïa kiba bha sha ki jingdiang jong ki, bad ïa ki bymmyntoi la bret noh. 49Kan long kumne ha kaba kut ka Ïa: ki angel kin mihnoh ban lumlang ïa ki briew kiba sniew napdeng kiba bha 50bad kin bret ïa ki shapoh ka lawar ding baklang, ha kaba kin lynñiar bad kyr-iat la ki bniat.

Ki jingshisha kiba thymmai bad kiba rim

51“Hato phi shemphang ïa kine kiei kiei?” U Jisu u la kylli ïa ki.

“Ho-oid,” ki la jubab.

52Kumta u la jubab, “Kane ka mut, te, ba uwei pa uwei u nonghikai Aiñ uba long u synran hapoh ka Hima ki bneng u long kum u trai jong ka ïing uba la sei shabar ïa kiei kiei kiba thymmai bad kiba rim napoh ka kamra kynshew jong u.”

Ïa U Jisu la kyntait ha Nasareth

(Mrk. 6:1-6; Luk. 4:16-30)

53Haba U Jisu u la dep ïathuh ïa kine ki pharshi, u la iehnoh ïa kata ka jaka 54bad u la leit phai pat sha la ka shnong. U la hikai ha ka synagog, bad kito kiba ïohsngew ïa u ki la sngewlyngngoh. “Nangno u la ïoh kat kane ka jingstad?” ki la kylli. “Bad kumno shaphang ki kambah jong u? 55Um dei une u khun jong u misteri? Hato ka Mari kam dei ka kmie jong u, bad hato u Jakob, u Josis, u Simon bad u Judah kim dei ki para shynrang jong u? 56Hato ki para kynthei jong u baroh kim shong kim sah hangne? Nangno u ïoh ïa kane baroh?” 57#Ïoan. 4:44Bad kumta ki la kyntait ïa u.

U Jisu u la ong ha ki, “Ïa u Nongïathuhlypa la burom ha kylleng lait noh tang hapoh ka shnong jong u bad da kiba ha ka longïing jong u.” 58Namar ba kim don ka jingngeit, um shym la leh shibun ki kambah hangta.

Currently Selected:

MATTHAÏOS 13: KHACLBSI

Highlight

Copy