LOUKAS 8

Ki kynthei kiba ïasynran ïa U Jisu

1Katto katne por hadien, U Jisu u la leit jingleit lyngba ki shnong bad ki nongrit, u da ïalap ïa ka Khubor Babha shaphang ka Hima U Blei. Ki khat-ar ngut ki synran ki la ïaleit bad u, 2#Mat. 27:55,56; Mrk. 15:40,41; Luk. 23:49bad kumta ruh katto katne ngut ki kynthei kiba la ïohkhiah na ki mynsiem bymman bad ki jingpang: Ka Mari (kaba la khot, ka nong Magdala), na ka ba la beh noh ïa ki hynñiew ki ksuid; 3Ka Ïoanna, uba u Khusa u tnga jong ka u long u rangbah pynïaidkam ha ka ïingbishar jong u Herod; bad ka Susanna, bad bun kiwei pat ki kynthei kiba la pyndonkam ïa la ki jong ki jingïoh ban ïarap ïa U Jisu bad ïa ki synran jong u.

Ka pharshi u nongbet

(Mat. 13:1-9; Mrk. 4:1-9)

4Ki briew ki ïai wan sha U Jisu na kawei ka shnong hadien kawei pat; bad haba u paidbah babun u la ïalumlang, U Jisu u la ïathuh ïa kane ka pharshi:

5“Shisien la don u briew uba la leit ban bet symbai. Katba u dang bet ïa u symbai, katto katne na u, ki la hap ha shi lynter ka lynti ïaid kjat, ha kaba ki la shah ïuh, bad ki sim ki la bam lut. 6Katto katne na u symbai ki la hap ha ka jaka maw, bad haba ki jingthung ki la shylluit, ki la tyrkhong noh namar ka khyndew kam don kano kano ka jingsngem. 7Katto katne na u symbai ki la hap hapdeng ki bniap shiah, kiba la san ryngkat bad ki jingthung bad ki la kjap ïa ki. 8Bad katto katne ki symbai ki la hap ha ka khyndew babha; ki jingthung ki la san bad ki la pynmih symboh, da ki spah symboh uwei uwei.”

Bad U Jisu u la pynkut, “Shahshkor, te, lada phi don ki shkor!”

Ka jingthmu ki pharshi

(Mat. 13:10-17; Mrk. 4:10-12)

9Ki synran jong u ki la kylli ïa U Jisu aïu kane ka pharshi ka kit jingmut, 10#Isa. 6:9bad u la jubab, “Ïa ka jingtip ïa kiba rieh jong ka Hima U Blei la ai ha phi, hynrei ha kiwei pat ka wan ha ki pharshi, khnang ba ki lah ban peit hynrei kim ïohi, bad shahshkor hynrei kim shemphang.

U Jisu u batai ïa ka pharshi u nongbet

(Mat. 13:18-23; Mrk. 4:13-20)

11“Kane ka long ka jingmut jong ka pharshi: U symbai u long ka ktien U Blei. 12Ki symbai kiba hap ha shi lynter ka lynti ïaid kjat ki ïeng na ka bynta kito kiba ïohsngew; hynrei u Ksuid u wan bad u shim noh ïa ka khubor na ki dohnud jong ki khnang ban khang ïa ki na kaba ngeit bad ïohlait im. 13Ki symbai kiba hap halor ka jaka maw ki ïeng na ka bynta kito kiba ïohsngew ïa ka khubor bad kiba pdiang ïa ka da kaba kmen. Hynrei kam shym ngam jylliew hapoh jong ki; ki ngeit tang shipor hynrei haba ka por jingtynjuh ka wan poi, ki hap noh. 14Ki symbai kiba la hap hapdeng ki bniap shiah ki ïeng na ka bynta kito kiba ïohsngew; hynrei ki jingkhuslai bad ka spah bad ki jingsngewbha jong kane ka jingim ki ïatyllep bad kjap ïa ki, bad ki soh jong ki kim ju ih. 15Ki symbai kiba la hap ha ka khyndew babha ki ïeng na ka bynta kito kiba ïohsngew ïa ka khubor bad kiba bat ïa ka ha ka dohnud kaba bha bad kaba kohnguh, bad ki ïaineh tad haduh ba kin da seisoh.

Ka sharak hapoh ka shang

(Mrk. 4:21-25)

16 # Mat. 5:15; Luk. 11:33 “Ym don mano mano ba thang ïa ka sharak bad tap ïa ka da ka shang lane buh ïa ka ha khrum jingthiah. Pynban, u buh ïa ka halor u diengpynïeng sharak, khnang ba ki briew kin ïohi ïa ka jingshai katba ki dang wan rung.

17 # Mat. 10:26; Luk. 12:2 “Ïa kano kano kaba la buhrieh noh yn wallam shabar ha kaba paw, bad ïa kano kano kaba la tap yn sa lap bad yn sa pynpaw ha kaba shai.

18 # Mat. 25:29; Luk. 19:26 “Da phikir, te, kumno phi pynshahshkor; namar ha uno uno uba don yn ai kham bun shuh, hynrei ha uno uno u bym don, un shah shim noh na u wat ïa kata kaba rit tam kaba u pyrkhat ba u don.”

Ka kmie bad ki para shynrang jong U Jisu

(Mat. 12:46-50; Mrk. 3:31-35)

19Ka kmie bad ki para shynrang jong U Jisu ki la wan sha u, hynrei kim lah ban ïadon bad u namar u paidbah. 20Don uwei uba la ong ha U Jisu, “Ka kmie bad ki para shynrang jong me ki ïeng shabar bad ki kwah ban ïohi ïa me.”

21U Jisu u la ong ha ki baroh, “Ka kmie bad ki para shynrang jong nga ki long kito kiba ïohsngew ïa ka ktien U Blei bad kiba kohnguh ïa ka.”

U Jisu u pynjai jai ïa ka 'erïong

(Mat. 8:23-27; Mrk. 4:35-41)

22Ha kawei ka sngi, U Jisu u la kiew halor ka lieng lem bad ki synran jong u bad u la ong ha ki, “Ïa ngin leit sha shiliang sha kawei pat ka liang jong ka duriaw.” Kumta ki la ïaleit. 23Katba ki dang leit ha ka lieng, U Jisu u la ïohthiah. Kynsan ka lyer kaba jur ka la beh halor ka duriaw, bad ka lieng ka la sdang ban dap da ka um, ba kumta baroh ki la don ha ka jingma kaba khraw. 24Ki synran ki la leit sha U Jisu bad ki la kyrsiew ïa u, da kaba ong, “Kynrad, Kynrad! Ngi la jan ïap!”

U Jisu u la khie joit bad u la hukum ïa ka lyer bad ïa ka um ba khie 'erïong; ki la sangeh bad ka la don ka jingjai jai kaba khraw. 25Nangta u la ong ha ki synran jong u, “Hangno ka jingngeit jong phi?”

Hynrei ki la sngewlyngngoh bad sheptieng, bad ki la ong uwei ïa uwei pat, “Une u briew uba kumno? U ai hukum ïa ki lyer bad ïa ki jingat phyllung, bad ki kohnguh ïa u!”

U Jisu u pynkhiah ïa u briew uba shongksuid

(Mat. 8:28-34; Mrk. 5:1-20)

26U Jisu bad la ki synran ki la leit da ka lieng sha ka thain Gadara, kaba don sha shiliang jong ka duriaw Galilaïa. 27Katba U Jisu u dang hiar harud duriaw, la wan ïashem ïa u da u briew na ka shnong uba shongksuid. La slem bah une u briew u la leit khlem phong jaiñ bad um mon ban shong ha ïing, hynrei u la pynlut ïa la ka por ha ki krem jingtep. 28Haba u la ïohi ïa U Jisu, u la kyang jam, u la pyndem ïa lade ha ki kjat jong u, bad u la pyrta, “Ko Jisu, U Khun jong U Blei Uba Hakhlieh Tam Eh! Me kwah aïu bad nga? Nga kyrpad ïa me, wat pynshitom ïa nga!” 29U la ong ïa kane namar U Jisu u la lah hukum ïa u mynsiem bymman ban mihnoh na u. Bunsien u la lympat ïa u, wat haba la set khop ïa u, ïa ki kti bad ki kjat jong u la teh da ki kynjri, u ju pyndkut ïa ki kynjri bad shah ïalam ha u ksuid sha ka ri shyiap.

30U Jisu u la kylli ïa u, “Kaei ka kyrteng jong me?”

“Ka kyrteng jong nga ka long ‘U Paidbah,’ ” u la jubab — naba shibun ki ksuid ki la rung hapoh jong u. 31Ki ksuid ki la kyrpad ïa U Jisu ban ym phah ïa ki sha ka 'liewlong khlem trai.

32Hangta hajan, la don ka kynhun bah ki sniang, kiba ïabam jingbam ha ki sharing lum. Kumta ki ksuid ki la kyrpad ïa U Jisu ban shah ïa ki ban rung shapoh ki sniang, bad u la shah ïa ki. 33Ki la mihnoh na uta u briew bad ki la rung shapoh ki sniang. Ka kynhun ki sniang baroh ka la noh sha riat shapoh ka duriaw bad ki la ïap jyllop.

34Ki briew kiba la ap sumar ïa ki sniang ki la ïohi ïa kaei kaba lah jia, kumta ki la phet noh bad ki la pynphriang ïa ka khubor hapoh ka shnong bad ha ki jaka ri jingri. 35Ki briew ki la ïaleit ban peit ïa kaei kaba la lah jia, bad haba ki la poi ha U Jisu, ki la shem ïa u briew na uba ki ksuid ki la mihnoh, ba u da shong ha ki kjat jong U Jisu, u la phong jaiñ bad ha ka jingtipbriew; bad baroh ki la sheptieng. 36Kito kiba la ïohi ïa kata ki la ïathuh ha ki briew kumno la pynkhiah ïa uta u briew. 37Nangta baroh ki briew na kata ka thain ki la kyrpad ïa U Jisu ban leit noh, namar ba ki la sheptieng shikatdei eh. Kumta U Jisu u la kiew halor ka lieng bad u la leit noh. 38Uta u briew na uba ki ksuid ki la mihnoh u la kyrpad ïa U Jisu, “Shah ïa nga ban leit lem bad me.”

Hynrei U Jisu u la phah noh ïa u, u da ong, 39“Khie leit noh sha ïing bad ïathuh ïa kaei kaba U Blei u la leh na ka bynta jong me.”

Uta u briew u la leit lyngba ïa ka shnong, u da ïathuh ïa kaei kaba U Jisu u la leh na ka bynta jong u.

Ka khun u Jairos bad ka kynthei kaba ktah ïa ka jaiñkup U Jisu

(Mat. 9:18-26; Mrk. 5:21-43)

40Haba U Jisu u la wan phai sha kawei pat ka liang jong ka duriaw, ki briew ki la pdiang sngewbha ïa u, namar baroh ki la ïa-ap ïa u. 41Te u briew uba kyrteng u Jairos u la wan poi; u la long u rangbah synshar ha ka synagog kaba ha kata ka shnong. U la dem khrup ha ki kjat jong U Jisu bad u la kyrpad ïa u ban leit sha ïing jong u, 42namar ka khun marwei jong u, kaba la khat-ar snem ka rta, ka la jan ïap.

Katba U Jisu u dang ïaid, ki briew ki la ïalum sawdong ïa u na ki liang baroh. 43Napdeng jong ki la don ka kynthei kaba la shitom na ka jingpang mihsnam kaba jur la khat-ar snem; ka la pynlut ïa baroh kaba ka don ha ki nongsumar, hynrei ym don mano mano ba lah ban pynkhiah ïa ka. 44Ka la wan ha u paidbah na shadien jong U Jisu bad ka la ktah ïa ka tduh ka jaiñkup jong u, bad ka jingmihsnam jong ka, ka la sangeh shisyndon. 45U Jisu u la kylli, “Mano ba ktah ïa nga?”

Uwei pa uwei u len ïa ka, bad u Petros u ong, “Ko kynrad, ki briew ki don sawdong jong me bad ki ïalum ha me.”

46Hynrei U Jisu u la ong, “Don mano mano ba la ktah ïa nga, naba nga tip ïa ka mynba ka bor ka la mihnoh na nga.” 47Kata ka kynthei ka la ïohi ba la lap ïa ka, kumta ka la wan da kaba khynñiuh bad ka dem khrup ha ki kjat jong U Jisu. Hangta ha khmat jong uwei pa uwei baroh, ka la ïathuh ïa u balei ba ka la ktah ïa u bad kumno ba la pynkhiah ïa ka shisyndon. 48U Jisu u la ong ha ka, “Ko khun jong nga, ka jingngeit jong pha ka la pynkhiah ïa pha. Khie leit ha kaba suk.”

49Katba U Jisu u dang kren ïa kane, u nonglamktien u la wan na ka ïing u rangbah synshar. “Ka khun jong me ka la ïap,” u la ong ha u Jairos; “wat pynshitom shuh ïa u nonghikai.”

50Hynrei U Jisu u la ïohsngew ïa kata bad u la ong ha u Jairos, “Wat sheptieng; tang shu ngeit, bad kan sa khiah.”

51Haba u la poi ha ïing, um shym shah ïano ïano ban rung shapoh bad u lait noh u Petros, u Ïoannis bad u Jakob, bad u kpa bad ka kmie jong ka khynnah. 52Baroh kiba don hangta ki la ïam bad ïam sngewsih na ka bynta ka khynnah. U Jisu u la ong, “Wat ïam; ka khynnah kam shym ïap — ka shu ïohthiah!”

53Baroh ki la rkhie ïa u, namar ki la tip ba ka la ïap. 54Hynrei U Jisu u la shim ïa ka na ka kti bad u la khot, “Khie joit, ko khun jong nga!” 55Ka la im pat, bad ka la khie joit shisyndon, bad U Jisu u la hukum ïa ki ban ai ei ei ha ka ba kan bam. 56Ka kmie bad u kpa jong ka ki la lyngngoh shikatdei, hynrei U Jisu u la hukum ïa ki ban ym ïathuh hano hano ïa kaei kaba la jia.

Currently Selected:

LOUKAS 8: KHACLBSI

Highlight

Copy