LOUKAS 7
7
U Jisu u pynkhiah ïa u shakri jong u rangbah pynïaidkam ka hima Rom
(Mat. 8:5-13)
1Haba U Jisu u la dep ban kren ïa kine kiei kiei baroh ha ki paidbah, u la leit sha Kapernam. 2U rangbah pynïaidkam ka hima Rom uba hangta, u la don u shakri uba u ieit eh; uta u briew u la pang bad u la jan ïap. 3Haba u rangbah pynïaidkam u la ïohsngew shaphang U Jisu, u la phah katto katne ngut ki tymmen ki san jong ki Jiw ban kyrpad ïa U Jisu ban wan bad pynkhiah ïa u shakri jong u. 4Ki la wan sha U Jisu bad ki la kyrpad jur ïa u, “Une u briew u dei hok shisha ban ïoh ïa ka jingïarap jong me. 5U ieit ïa ki briew jong ngi bad u hi da lade u la tei ka synagog na ka bynta jong ngi.”
6Kumta U Jisu u la leit bad ki. Um shym da jngai na ka ïing mynba u rangbah pynïaidkam u la phah ïa ki paralok ban ong ha U, “Kynrad, wat pynshitom ïa lade. Ngam dei hok ban pdiang ïa me ha ka ïing jong nga, 7lymne ba nga ñiew ïa lade uba bit ban wan sha me da lade. Shu ai tang ka hukum, bad u shakri jong nga un ïohkhiah. 8Nga ruh, nga long u briew uba la buh hapoh ka bor jong ki rangbah pynïaidkam kiba kham halor, bad nga don ki shipai hapoh jong nga. Nga hukum ïa une uwei, ‘khie leit!’ bad u leit; nga hukum ïa uta uwei, ‘Ale!’ bad u wan; bad nga hukum ïa u mraw jong nga, ‘Leh ïa kane!’ bad u leh ïa ka.”
9U Jisu u la kyndit haba u la ïohsngew ïa kane; u la phai sawdong bad u la ong ha u paidbah uba bud ïa u, “nga ong ha phi, ngam pat ju shem ka jingngeit kaba kum kane, ym don wat ha Israel ruh!”
10Ki nonglamktien ki la leit phai pat sha ka ïing jong u rangbah pynïaidkam bad ki la shem ba u shakri jong u, u la khiah.
U Jisu u pynim pat ïa u khun ka riewkynthei
11Shen hadien kata, U Jisu u la leit sha ka shnong kaba la khot, ka Nain, ki synran jong u lem bad u paidbah babun ki la ïadon ryngkat. 12Mar ïapoi ha ka khyrdop jong ka shnong, ka kynhun leit ontep ka dang mih shabar. U briew uba la ïap u long u khun nyngkong jong ka briew kaba long ka riewkynthei, bad u paidbah babun na ka shnong u la ïadon lem bad ka. 13Haba U Trai u la ïohi ïa ka, la pyndap ïa ka dohnud jong u da ka jingisynei ïa ka, bad u la ong ha ka, “Wat ïam.” 14Nangta u la ïaid sha khmat bad u la ktah ïa ka krong, bad ki briew kiba bah ïa ka ki la sangeh. U Jisu u la ong, “Ko samla! To khie joit, nga ong ïa me!” 15Uta u briew uba la ïap u la khie shong bad u la sdang ban kren, bad U Jisu u la ai ïa u pat sha ha ka kmie jong u.
16La pyndap ïa ki baroh da ka jingsheptieng bad ki la ïaroh ïa U Blei. “U nongïathuhlypa uba khraw u la mihpaw hapdeng jong ngi!” ki la ong; “U Blei u la wan ban pynim ïa ki briew jong u!” 17Kane ka khubor shaphang U Jisu ka la phriang kylleng jong ka ri bad sha ki thain kiba don sawdong.
Ki nonglamktien na u Ïoannis u Nongpynbaptis
(Mat. 11:2-19)
18Haba ki synran jong u Ïoannis ki la ïathuh ha u shaphang kine kiei kiei baroh, u la khot ar ngut na ki 19bad u la phah ïa ki sha U Trai ban kylli ïa u, “Hato me long uta uba u Ïoannis u la ong u ban sa wan, ne hato ngin khmih lynti ïa uwei pat?”
20Haba ki la wan sha U Jisu, ki la ong, “U Ïoannis u Nongpynbaptis u la phah ïa ngi ban kylli lada me long Uta Uba u la ong ba Un wan ne lada ngi dei ban khmih lynti ïa Uwei pat.”
21Ha kata ka por U Jisu u la pynkhiah ïa kiba bun ki briew na ki jingshitom jong ki, ki jingpang jong ki, bad na ki mynsiem bymkhuid, bad u la ai ka jingïohi pat ha kiba bun ki briew kiba matlah. 22#Isa. 35:5,6; Isa. 61:1U la jubab ïa ki nonglamktien jong u Ïoannis, “Khie leit noh bad ïathuh ïa u Ïoannis ïa kaei kaba phi la ïohi bad ïohsngew: Kiba matlah ki lah ban ïohi, kiba dkoh ki lah ban ïaid, kito kiba pang 'ñiangthohlieh ki la long khuid, kiba kyllut ki lah ban ïohsngew, ïa kiba ïap pynim pat, bad ïa ka Khubor Babha la ïalap ha kiba duk. 23Katno kiba suk ki long kito ki bym don jingartatien shaphang jong nga!”
24Hadien ba ki nonglamktien jong u Ïoannis ki la leit noh, U Jisu u la sdang ban kren shaphang jong u ha u paidbah: “Haba phi la leit sha u Ïoannis ha ka ri shyiap, aïu phi la khmih lynti ban ïohi? Hato ïa ka sla phlang kaba khun ha ka lyer? 25Ïa kaei phi la leit ban peit? Hato ïa u briew uba phong ki jaiñ kiba itynnat? Ïa ki briew kiba riam kumta bad kiba shong ha ka jingdap kyrhai la shem ha ki ïingsyiem! 26Ïathuh ïa nga, ïa kaei phi la leit ban peit? Hato ïa u nongïathuhlypa? Ho-oid, da shisha, hynrei phi la ïohi kham bun shah ban ïa u nongïathuhlypa. 27#Mal. 3:1Naba u Ïoannis u long uta uba ka Jingthoh Bakhuid ka ong: ‘U Blei u la ong, ngan phah ïa u nonglamktien ha shuwa jong me ban plie ka lynti na ka bynta jong me.’ 28Nga ong ha phi,” U Jisu u la bynrap, “U Ïoannis u kham khraw ban ïa uno uno u briew uba la ju im. Hynrei uta uba rit tam ha ka Hima U Blei u long uba kham khraw ban ïa u Ïoannis.”
29 #
Mat. 21:32; Luk. 3:12 Baroh ki briew ki la ïohsngew ïa u; ma ki bad khamtam ki nonglum khajna ki long kita kiba la kohnguh ïa ka jingdawa bahok jong U Blei bad kiba la shah pynbaptis ha u Ïoannis. 30Hynrei ki Pharisi bad ki nonghikai ka Hukum ki la kyntait ïa ka jingthmu jong U Blei na ka bynta jong ki hi bad ki la kyntait ban shah pynbaptis ha u Ïoannis.
31U Jisu u la bteng, “Mynta bad kaei nga lah ban nujor ïa ki briew jong kane ka juk? Ki long kiba kumno? 32Ki long kum ki khynnah kiba shong ha ki jaka ïew. Kawei ka kynhun ka pyrta ïa kawei pat, ‘Ngi la tem ka jingtem shongkurim na ka bynta jong phi, hynrei phim shym shad! Ngi la rwai ki jingrwai ïapbriew, hynrei phim shym ïam!’ 33U Ïoannis u Nongpynbaptis u la wan, bad u la shahjingit bad um dih waiñ, bad phi ong, ‘U don u ksuid hapoh jong u!’ 34U Khun U Briew u la wan, bad u la bam bad u la dih, bad phi la ong, ‘Khmih ïa une u briew! U long u lalot bad u nongbuaid, u paralok jong ki nonglum khajna bad kiwei pat kiba la shah kyntait!’ 35Pynban, ïa ka jingstad jong U Blei la pyn-i ba ka long kaba shisha da baroh kiba pdiang ïa ka.”
U Jisu ha ka ïing u Simon u Pharisi
36U Pharisi u la khot sngewbha ïa U Jisu ban ïabam miet bad u, bad U Jisu u la leit sha ka ïing jong u bad u la shong ban bam. 37#Mat. 26:7; Mrk. 14:3; Ïoan. 12:3Ha kata ka shnong, la don ka briew kaba la im ka jingim kaba dap da ka pop. Ka la ïohsngew ba U Jisu u wan bam ha ka ïing jong u Pharisi, kumta ka la wallam ïa ka dabi alabastar kaba la dap da ka jingsleh ba-iwbih 38bad ka la ïeng hadien jong U Jisu, hajan ki kjat jong u, ka da ïam bad ka da pynjhieh ïa ki kjat jong u da ki ummat jong ka. Nangta ka la ñiad pynrkhiang ïa ki kjat jong u da u shñiuh jong ka, ka la doh ïa ki, bad ka la theh ïa ka jingsleh ba-iwbih halor jong ki. 39Haba u Pharisi u la ïohi ïa kane, u la ong ha lade, “Lada une u briew u dei shisha u nongïathuhlypa, un da la tip kaba kumno kane ka briew ka long kaba ktah ïa u; un da la tip ka jait jingim bapop kaba kumno ka la im!”
40U Jisu u la kren bad u la ong ha u, “Ko Simon, nga don ei ei ban ong ha me.”
“Ko Nonghikai,” u la ong, “to ïathuh ïa nga.”
41“La don ar ngut ki rangbah kiba la shahram ha u nongai ram,” U Jisu u la sdang. “Uwei u la shahram na u, sanspah tylli ki sbai rupa, bad uwei pat u la shahram na u, sanphew. 42Ym don uwei ruh na ki uba lah ban siew pat sha u, kumta u la pyndam noh ïa ki ram jong ki baroh ar ngut. Uno na kine, te, u ban ieit kham bun ïa u?”
43“Nga tharai,” u Simon u la jubab, “un long uta uba la ïohmap kham bun.”
“Me ong kaba dei,” U Jisu u la ong. 44Nangta u la phai sha kata ka briew bad u la ong ha u Simon, “Me ïohi ïa kane ka briew? Nga la wan shapoh ka ïing jong me, bad mem shym la ai um ïa nga na ka bynta ki kjat jong nga, hynrei ka la sait ïa ki kjat jong nga da ki ummat jong ka bad ka la ñiad rkhiang ïa ki da u shñiuh jong ka. 45Mem shym la pdiang sngewbha ïa nga da ka jingdoh, hynrei kam shym la sangeh ban doh ïa ki kjat jong nga naduh ba nga la wan. 46Mem shym la ai ka umphniang Olib na ka bynta ka khlieh jong nga, hynrei ka la tap ïa ka khlieh jong nga da ka jingsleh ba-iwbih. 47Te nga ong ha me, ka jingieit bakhraw kaba ka la pyn-i ka pynshisha ba ïa ki pop jong ka kiba bun la map. Hynrei uno uno uba la ïohmap khyndiat u pyn-i tang khyndiat ka jingieit.”
48Nangta U Jisu u la ong ha kata ka briew, “Ïa ki pop jong pha la map.”
49Kiwei pat kiba ïashong bam ki la sdang ban ïakren para ma ki, “Uei une, uba map wat ïa ki pop?”
50Hynrei U Jisu u la ong ha kata ka briew, “Ka jingngeit jong pha ka la pynim ïa pha; khie leit ha kaba suk.”
Currently Selected:
LOUKAS 7: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
