LOUKAS 6

Ka jingkylli shaphang ka sngi Sabbaton

(Mat. 12:1-8; Mrk. 2:23-28)

1 # Deut. 23:25 U Jisu u dang ïaid lyngba ki lyngkha kew ha ka sngi Sabbaton. Ki synran jong u ki la sdang ban kheit ïa ki kop kew, ki kyrjaw ïa ki ha ki kti jong ki, bad ki bam ïa ki symboh kew. 2Katto katne ngut ki Pharisi ki kylli, “Balei phi leh ïa kaei kaba ka Hukum jong ngi ka ong ba phim lah ban leh ha ka sngi Sabbaton?”

3U Jisu u la jubab ïa ki, “Hato phim shym la pule ïa kaei kaba u Dabid u la leh mynba ma u bad ki rangbah jong u ki la thngan? 4#Leb. 24:9#1 Sam. 21:1-6U la leit shapoh ka ïing U Blei, u la shim ïa u kpu ba la ai sha U Blei, u la bam ïa u, bad u la ai ruh ha ki rangbah jong u. Shisha ka long pyrshah ïa ka Hukum jong ngi ïa uno uno lait noh tang u lyngdoh ban bam ïa uta u kpu.”

5Bad U Jisu u la pynkut, “U Khun U Briew u long U Trai jong ka Sabbaton.”

U briew bad ka kti kaba pang ïapshiliang

(Mat. 12:9-14; Mrk. 3:1-6)

6Ha kawei pat ka sngi Sabbaton, U Jisu u la leit sha ka synagog bad u la hikai. La don u briew hangta uba ka kti kamon jong u ka la ïapshiliang. 7Katto katne ngut ki nonghikai ka Hukum bad katto katne ngut ki Pharisi ki la kwah daw ban mudui ïa U Jisu ba u leh bakla, kumta ki la ïakhmih bniah ïa u ban ïohi lada un pynkhiah ha ka sngi Sabbaton. 8Hynrei U Jisu u la tip ïa ki jingpyrkhat jong ki bad u la ong ha uta u briew, “Ïeng joit bad wan shane sha khmat.” Uta u briew u la ïeng joit bad u la ïeng hangta. 9Nangta U Jisu u la ong ha ki, “Nga kylli ïa phi: Aïu ka Hukum jong ngi ka shah ïa ngi ban leh ha ka sngi Sabbaton? Ban ïarap ne ban pynmynsaw? Ban pynim ïa ka mynsiem briew ne ban pynjot ïa ka?” 10U la khmih sawdong jong ki baroh; nangta U la ong ha uta u briew, “To kner ïa ka kti jong me.” U la leh kumta, bad ka kti jong u ka la bha pat.

11La pyndap ïa ki da ka jingbitar shla bad ki la sdang ban ïaphylliew jingmut para ma ki ïa kaei ba ki lah ban leh ïa U Jisu.

U Jisu u jied ïa ki khat-ar ngut ki apostol

(Mat. 10:1-4; Mrk. 3:13-19)

12Ha kata ka por, U Jisu u la leit kiew sha u kum ban duwai bad ban pynlut baroh shi miet hangta da kaba duwai ha U Blei. 13Haba ka la shai, u la khot ïa la ki synran sha u bad u la jied khat-ar ngut na ki, ïa kiba u la ai kyrteng, ki apostol: 14U Simon (ïa uba u la ai kyrteng, u Petros) bad u Andriw u para jong u, u Jakob bad u Ïoannis, u Philip bad u Bartholomai, 15u Matthaïos bad u Thomas, u Jakob u khun jong u Alphaïos, bad u Simon (ïa uba la khot, u Riew-ieit ri). 16U Judas u khun jong u Jakob bad u Judas Iskariot uba la kylla long u nongshetkylla.

U Jisu u hikai bad u pynkhiah

(Mat. 4:23-25)

17Haba U Jisu u la wan hiar na u lum lem bad ki apostol, u la ïeng ha ka jaka madan lem bad kiba bun ki synran jong u. U paid byllien u la don hangta na kylleng ka Judia bad na Jerusalem bad na ki nongbah Tyros bad Sidon kiba harud duriaw; 18ki la wan ban shahshkor ïa u bad ban ïoh jingkhiah na ki jingpang jong ki. Kito kiba la shah pynjynjar da ki mynsiem bymman ruh ki la wan bad la pynkhiah ïa ki. 19Baroh ki briew ki la pyrshang ban ktah ïa u, naba ka bor ka la mih na u bad ka da pynkhiah ïa ki baroh.

Ka jingkmen bad ka jingsngewsih

(Mat. 5:1-12)

20U Jisu u la khmih ha la ki synran bad u la ong,

“Suk phi kiba duk;

ka Hima U Blei ka long ka jong phi!

21Suk ma phi kiba thngan mynta;

yn pyndap ïa phi!

Suk ma phi kiba ïam mynta;

phin rkhie!

22 # 1 Pet. 4:14 “Suk ma phi haba ki briew ki isih ïa phi; kiba kyntait ïa phi, ki krenbeiñ ïa phi, bad ki ong ba phi long uba sniew, baroh namar U Khun U Briew! 23#2 Khrn. 36:16; Ki Kam. 7:52To kmen haba kata ka jia, bad to shad da ka jingkmen, namar ïa ka bainong kaba khraw la buh na ka bynta jong phi ha bneng. Naba ki kpa tymmen jong ki, ki la leh ïa kajuh ha ki nongïathuhlypa.

24“Hynrei katno kaba shyrkhei ïa phi kiba riewspah mynta;

phi la lah ïoh ïa ka jingim suk!

25Katno kaba shyrkhei ïa phi kiba pahuh mynta;

phin sa thngan!

Katno kaba shyrkhei ïa phi kiba rkhie mynta;

phin sngewsih bad phin ïam!

26“Katno kaba shyrkhei haba baroh ki briew ki kren bha shaphang jong phi; ki kpa tymmen jong ki, ki la kren ïa kijuh kiei kiei shaphang ki nongïathuhlypa lamler.”

Kaba ieit ïa ki nongshun

(Mat. 5:38-48; 7:12)

27“Hynrei nga ong ha phi kiba shahshkor ïa nga: Ieit ïa ki nongshun jong phi, lehbha ïa kito kiba isih ïa phi, 28kyrkhu ïa kito kiba tim ïa phi, bad duwai na ka bynta kito kiba lehbeiñ ïa phi. 29Lada uno uno u thab ïa phi na kawei ka ngab, ai ba un thab sa ïa kawei ruh; lada uno uno u shim ïa ka jaiñkup jong phi, ai ba un shim ruh ïa ka sopti-poh jong phi. 30Ai ha uno uno uba pan na phi ïa kano kano, bad haba uno uno u shim ïa kaei kaba dei ka jong phi, wat pan shuh ïa ka. 31#Mat. 7:12Leh ïa kiwei kumba phi kwah ïa ki ban leh ïa phi.

32“Lada phi ieit tang ïa ki briew kiba ieit ïa phi, balei phi dei ban ïohpdiang ïa ka jingkyrkhu? Wat ki nongpop ki ieit ïa kito kiba ieit ïa ki! 33Bad lada phi lehbha tang ïa kito kiba lehbha ïa phi, balei phi dei ban ïohpdiang ïa ka jingkyrkhu? Wat ki nongpop ki leh kumta! 34Bad lada phi leh ai kylliang ïa kito na kiba phi kyrmen ban ïoh pat ïa ka, balei phi dei ban ïohpdiang ïa ka jingkyrkhu? Wat ki nongpop ki ai kylliang ïa ki nongpop, ban ïoh pat katjuh! 35Em! Ieit ïa ki nongshun jong phi bad lehbha ïa ki; to ai kylliang bad wat khmih lynti ban ïoh ei ei pat. Te phin ïoh ka bainong kaba khraw, bad phin long ki khun jong U Blei Uba Hakhlieh Tam Eh. Naba u long uba bha ïa u bymsngewnguh bad ïa uba bymman. 36Long kiba sngewsynei kumba U Kpa jong phi u long uba sngewsynei.

Kaba bishar ïa kiwei pat

(Mat. 7:1-5)

37“Wat bishar ïa kiwei, bad U Blei un ym bishar ïa phi; wat pynrem ïa kiwei, bad U Blei un ym pynrem ïa phi; map ïa kiwei, bad U Blei un map ïa phi. 38Ai ha kiwei, bad U Blei un ai ha phi. Da shisha, phin ïohpdiang ka jingthew kaba dap biang, ka jingai basbun, kaba la theh ha ki kti jong phi — baroh kata kaba phi lah ban bat. Ka jingthew kaba phi pyndonkam na ka bynta kiwei ka long kata kaba U Blei un pyndonkam ïa phi.”

39 # Mat. 15:14 Bad U Jisu u la ïathuh ha ki ïa kane ka pharshi: U briew uba matlah um lah ban ïalam ïa uwei pat; lada u leh kumta, baroh ar ngut kin hap hapoh kharai. 40#Mat. 10:24,25; Ïoan. 13:16; 15:20Ym don u shah hikai uba kham khraw ban ïa u nonghikai jong u; hynrei uwei pa uwei u shah hikai, haba u la pyndep ïa ka jingshah hikai, un long kum u nonghikai jong u.

41“Balei ba phi khmih ïa u thiat ha ka khmat jong u para jong phi, hynrei phim pynleit jingmut ïa ka lyngkhot dieng ha ka khmat jong phi? 42Kumno phi lah ban ong ha u para jong phi, ‘Ko para, sngewbha shah ïa nga ban sei ïa u thiat na ka khmat jong phi,’ pynban phim lah ban ïohi ïa ka lyngkhot dieng ha la ka jong ka khmat? Phi kiba arsap! Nyngkong to shim noh ïa ka lyngkhot dieng na ka khmat jong phi, bad nangta phin lah ban ïohi shai ban sei ïa u thiat na ka khmat jong u para jong phi.

U dieng bad ki soh jong u

(Mat. 7:16-20; 12:33-35)

43“U dieng uba plung um pynmih u soh uba sniew, lymne u dieng uba swai ïa u soh uba bha. 44#Mat. 12:33Ïa uwei pa uwei u dieng la tip da u soh uba u pynmih; phim ju kheit soh Dumbur na ki bniap shiah lane lum ïa ki sohwaiñ na ki bniap shiah buid. 45#Mat. 12:34U briew uba bha u wallam ïa kaba bha na ka jingkynshew jong kiei kiei kiba bha kiba ha ka dohnud jong u; u briew uba sniew u wallam ïa kaba sniew na ka jingkynshew jong kiei kiei kiba sniew. Naba ka shyntur ka kren ïa kaei kaba dap ha ka dohnud.

Ar ngut kiba tei ïing

(Mat. 7:24-27)

46“Balei ba phi khot ïa nga, ‘A Trai, A Trai,’ bad pynban phim leh ïa kaei kaba nga ong ha phi? 47Uno uno uba wan sha nga bad uba shahshkor ïa ki ktien jong nga bad uba kohnguh ïa ki — ngan pyn-i ha phi u ïasyriem ïano. 48U long kum u briew uba, ha kaba tei ïa la ka ïing, u la tih jylliew bad u la pynshong nongrim halor u mawsiang. Ka wah ka la shlei bad ka la lynshop ïa kata ka ïing hynrei kam lah ban pynkhih ïa ka, namar la shna bha ïa ka. 49Hynrei uno uno uba ïohsngew ïa ki ktien jong nga bad u bymkohnguh ïa ki u long kum u briew uba la tei ïa la ka ïing khlem da pynshong nongrim; haba ka jingshlei um ka lynshop ïa kata ka ïing, ka khyllem shisyndon — bad katno ka jingkhyllem kaba shyrkhei kata ka la long!”

Currently Selected:

LOUKAS 6: KHACLBSI

Highlight

Copy