LOUKAS 9
9
U Jisu u phah ïa ki khat-ar ngut ki synran
(Mat. 10:5-15; Mrk. 6:7-13)
1U Jisu u la khot lang ïa ki khat-ar ngut ki synran bad u la ai ha ki ka bor bad ka iktiar ban beh noh ïa ki ksuid baroh bad ban pynkhiah ïa ki jingpang. 2Nangta u la phah ïa ki ban ïalap ïa ka Hima U Blei bad ban pynkhiah ïa kiba pang, 3hadien ba u la ong ha ki, “wat rah ei ei bad phi ha ka jingleit jong phi: Wat rah ïa u diengduh, ïa ka pla khrong, ïa ka jingbam, ïa ka pisa, wat ïa ka sopti bujli ruh. 4Hangno hangno ha kaba la pdiang sngewbha ïa phi, to sah ha kajuh ka ïing tad haduh ba phin da mihnoh na kata ka shnong; 5#Ki Kam. 13:51#Luk. 10:4-11hangno hangno ha kaba ki briew kim pdiang sngewbha ïa phi, to iehnoh ïa kata ka shnong bad kynther noh ïa u pui pui na ki kjat jong phi kum ka jingmaham ïa ki.”
6Ki synran ki la mihnoh bad ki la leit lyngba ki nongrit baroh, ki da ïalap ïa ka Khubor Babha bad ki da pynkhiah ïa ki briew ha kylleng.
Ka jingkulmar jingmut u Herod
(Mat. 14:1-12; Mrk. 6:14-29)
7 #
Mat. 16:14; Mrk. 8:28; Luk. 9:19 Haba u Herod, u nongsynshar ka Galilaïa, u la ïohsngew shaphang kiei kiei baroh kiba la jia, u la kulmar jingmut, namar katto katne ngut ki briew ki la ong ba u Ïoannis u Nongpynbaptis u la mihpat. 8Kiwei pat ki la ong ba u Elijah u la mihpaw, bad sa kiwei pat ki ong ba uwei na ki nongïathuhlypa na mynbarim u la mihpat. 9U Herod u la ong, “Nga la phah khrai ïa ka khlieh jong u Ïoannis; hynrei uei une u briew uba nga ïohsngew shaphang kine kiei kiei baroh?” Bad u la ïai pyrshang ban ïohi ïa U Jisu.
U Jisu u bsa ïa ki san hajar ngut
(Mat. 14:13-21; Mrk. 6:30-44; Ïoan. 6:1-14)
10Ki apostol ki la wan phai pat bad ki la ïathuh ha U Jisu ïa kiei kiei baroh kiba ki la leh. U la ïalam ïa ki bad u, bad ki la ïaleit tang ma ki hi sha ka shnong ba la khot, ka Bethsaida. 11Haba ki paidbah ki la ïohsngew shaphang kata, ki la bud ïa u. U la pdiang sngewbha ïa ki, u la kren ha ki shaphang ka Hima U Blei, bad u la pynkhiah ïa kito kiba donkam ïa ka.
12Haba ka sngi ka la sdang ban sep, ki khat-ar ngut ki synran ki la wan sha u bad ki la ong, “To phah noh ïa ki paidbah khnang ba ki lah ban leit sha ki nongrit bad sha ki jaka ri jingri kiba don sawdong hangne ban ïoh jingbam bad jaka sahmiet, namar kane ka dei ka jaka kynjah.”
13Hynrei U Jisu u la ong ha ki, “Ma phi hi to ai ei ei ha ki ba kin bam.”
Ki la jubab, “Baroh kaba ngi don ki long san tylli ki kpu bad ar tylli ki dohkha. Hato phi kwah ïa ngi ban leit bad thied jingbam na ka bynta une u paidbah?” 14(La don kumba san hajar ngut ki rangbah hangta.)
U Jisu u la ong ha ki synran jong u, “To pynshong ïa u paidbah ha ki kynhun kiba sanphew ngut kawei kawei.”
15Hadien ba ki synran ki la dep, 16U Jisu u la shim ïa ki san tylli ki kpu bad ar tylli ki dohkha, u la khmied sha bneng, u la ainguh ïa U Blei na ka bynta kita, u la kdiah ïa ki, bad u la ai ïa ki ha ki synran ban sam ha u paidbah. 17Baroh ki la bam bad ki la kdang, bad ki synran ki la lum khat-ar tukri na kaei kaba la sah tam.
Ka jingpynbna u Petros shaphang U Jisu
(Mat. 16:13-19; Mrk. 8:27-29)
18Ha kawei ka sngi mynba U Jisu u dang duwai marwei, ki synran ki la wan ha u. “Ki paidbah ki ong ba nga long uei?” U la kylli ïa ki.
19 #
Mat. 14:1,2; Mrk. 6:14,15; Luk. 9:7,8 “Katto katne ngut ki ong ba me dei u Ïoannis u Nongpynbaptis,” ki la jubab. “Kiwei pat ki ong ba me dei u Elijah, katba kiwei pat ki ong ba me dei uwei na ki nongïathuhlypa na mynbarim uba la mihpat.” 20#Ïoan. 6:68,69“Kumno pat ma phi?” u la kylli ïa ki. “Phi ong ba nga long uei?”
U Petros u la jubab, “Me long U Messaïah jong U Blei.”
U Jisu u kren shaphang ka jingshah shitom bad ka jingïap jong u
(Mat. 16:20-28; Mrk. 8:30—9:1)
21Nangta U Jisu u la ai ha ki, ki hukum bapyrkhing ban ym ïathuh ïa kane hano hano ruh. 22U la ong ruh ha ki, “U Khun U Briew u dei ban shahshitom shibun bad ban shah kyntait da ki tymmen ki san, ki rangbah lyngdoh, bad da ki nonghikai ka Hukum. Un shah pynïap, hynrei hadien lai sngi yn sa pynmihpat ïa u.”
23 #
Mat. 10:38; Luk. 14:27 Bad u la ong ha ki baroh, “Lada uno uno u kwah ban wan bad nga, u dei ban klet ïa lade, un bah ïa la ka diengphna man ka sngi, bad bud ïa nga. 24#Mat. 10:39; Luk. 17:33; Ïoan. 12:25Naba uno uno uba kwah ban pynim ïa la ka jong ka jingim un duh noh ïa ka, hynrei uno uno uba duh ïa ka jingim na ka bynta jong nga un pynim ïa ka. 25Hato u briew un ïohnong ei ei lada u jop ïa ka pyrthei baroh kawei hynrei u hi u duh noh lane u shahjop? Em da shisha! 26Lada u briew u lehrain ïa nga bad ïa ka jinghikai jong nga, te U Khun U Briew un lehrain ïa u haba u wan ha ka burom jong u bad ha ka burom jong U Kpa bad jong ki angel bakhuid. 27Nga pynthikna ïa phi ba don katto katne ngut hangne ki ban ym ïap tad ynda ki la ïohi ïa ka Hima U Blei.”
Ka jingpynkylla dur
(Mat. 17:1-8; Mrk. 9:2-8)
28Kumba shi taïew hadien ba u la kren ïa kine kiei kiei, U Jisu u la ïalam lem bad u ïa u Petros, u Ïoannis bad ïa u Jakob bad leit sha u lum ban duwai. 29Katba u dang duwai, ka durkhmat jong u ka la kylla dur, bad ki jaiñ jong u ki la kylla lieh phyrnai. 30Kynsan ar ngut ki rangbah ki la ïakren bad u. Ki la long u Moses bad u Elijah, 31kiba la paw ha ka burom ba kynja bneng bad ki la ïakren bad U Jisu shaphang ka rukom ha kaba shen un sa pyndep ïa ka jingthmu jong U Blei da kaba ïap ha Jerusalem. 32U Petros bad ki paralok jong u ki la ïohthiah lyngngai, hynrei ki la kyndit thiah bad ki la ïohi ïa ka burom jong U Jisu bad ïa kita ki ar ngut ki rangbah kiba la ïeng lem bad u. 33Katba kita ki rangbah ki dang leit noh na U Jisu, u Petros u la ong ha u, “Ko Kynrad, katno ka long kaba bha ba ngi ïadon hangne! Ngin shna lai tylli ki ïingjaiñ, kawei na ka bynta jong me, kawei na ka bynta u Moses, bad kawei na ka bynta u Elijah.” (Um tip da shisha ïa kaei kaba u kren.)
34Katba u dang kren, u lyoh u la paw bad u la tap ïa ki da ka syrngiew jong u; bad ki synran ki la sheptieng haba u lyoh u la wan halor jong ki. 35#Isa. 42:1; Mat. 3:17; 12:18; Mrk. 1:11; Luk. 3:22#2 Pet. 1:17,18Ka sur ka la kren na u lyoh, “Une u long U Khun jong nga, uba nga la jied — shahshkor ïa u!”
36Haba ka sur ka la sangeh, la don tang U Jisu hi marwei. Ki synran jong u ki la sngap jar shaphang kane baroh, bad kim shym ïathuh hano hano ha kata ka por ïa kaei kaei kaba ki la lah ïohi.
U Jisu u pynkhiah ïa u khynnah uba don u mynsiem bymman
(Mat. 17:14-18; Mrk. 9:14-27)
37Ha ka sngi kaba bud, U Jisu bad ki lai ngut ki synran ki la hiar na u lum, bad u paidbah babun u la ïakynduh ïa U Jisu. 38Uwei u briew u la pyrta na u paidbah, “Ko Nonghikai! Nga kyrpad ïa me, ban khmih ïa u khun jong nga — u khun marwei jong nga! 39U mynsiem bymman u tur ïaleh ïa u da ka jinglynñiar kynsan bad bret ïa u ha ka jingkhie ring, ba kumta u sei tyrtho ha ka shyntur; u ïai pynshitom ïa u bad da kaba eh un pyllait ïa u! 40Nga la kyrpad ïa ki synran jong me ban beh noh ïa u, hynrei kim lah.”
41U Jisu u la jubab, “A katno phi ki briew phi long ki bymngeit bad bakla! Sa katno nga dei ban sah bad phi? Sa katno nga dei ban don bad phi?” Nangta u la ong ha uta u briew, “Wallam ïa u khun jong me hangne.”
42Katba uta u khynnah u dang wan, u mynsiem bymman u la shoh pynkyllon ïa u sha madan bad u la bret ïa u ha ka jingkhie ring. U Jisu u la ai hukum ïa u mynsiem bymman, U la pynkhiah ïa uta u khynnah, bad U la ai pat ïa u ha u kpa jong u. 43Ki briew baroh ki la sngewlyngngoh ïa ka bor bakhraw jong U Blei.
U Jisu u kren biang shaphang ka jingïap jong u
(Mat. 17:22-23; Mrk. 9:30-32)
Ki briew ki dang sngewphylla ha kaei kaei kaba U Jisu u la leh, haba u ong ha ki synran jong u, 44“Wat klet ïa kaei kaba ngan ïathuh ha phi! Yn sa aiti noh ïa U Khun U Briew ha ka bor jong ki briew.” 45Hynrei ki synran kim shym tip aïu kane ka kit jingmut. La buhrieh ïa ka na ki, khnang ba kin ym lah ban shemphang ïa ka, bad ki la sheptieng ban kylli ïa u shaphang kane.
Uei uba khraw tam?
(Mat. 18:1-5; Mrk. 9:33-37)
46 #
Luk. 22:24
Ka jingïania ka la mih hapdeng ki synran ha kaba ïadei badno napdeng jong ki, uba long uba khraw tam. 47U Jisu u la tip ïa kaei kaba ki pyrkhat, kumta u la shim ïa u khynnah, u la pynïeng hajan jong u bad u la ong ha ki, 48#Mat. 10:40; Luk. 10:16; Ïoan. 13:20“Uno uno uba pdiang sngewbha ïa une u khynnah ha ka kyrteng jong nga, u pdiang sngewbha ïa nga; bad uno uno uba pdiang sngewbha ïa nga, u pdiang sngewbha ruh ïa uta uba la phah ïa nga. Naba uta uba rit tam napdeng jong phi baroh u long uba khraw tam.”
Uta u bym ïaleh pyrshah ïa phi u long ha ka liang jong phi
(Mrk. 9:38-40)
49U Ïoannis u la kren, “Ko Kynrad, ngi la ïohi ïa u briew uba beh noh ïa ki ksuid ha ka kyrteng jong me, bad ngi la ong ïa u ban sangeh, namar um shym long u jong ka kynhun jong ngi.”
50“Wat pyrshang ban pynsangeh ïa u,” U Jisu u la ong ïa u bad ïa kiwei pat ki synran, “namar uno uno u bym pyrshah ïa phi u long ha ka liang jong phi.”
Ka shnong ki nong Samaria ka kyntait ban pdiang ïa U Jisu
51Katba ka por ka nang jan haba ïa U Jisu yn shim noh sha bneng, u la pynbeit ïa ka jingmut bad u la leit ha la ka lynti sha Jerusalem. 52U la phah ïa ki nonglamktien ha shuwa jong u, kiba la leit sha ka nongrit ha Samaria ban pynkhreh ïa kaei kaei baroh na ka bynta jong u. 53Hynrei ki briew hangta kim kwah ban pdiang ïa u, namar ka la paw shai ba u la don ha ka lynti sha Jerusalem. 54#2 Syiem. 1:9-16Haba U Jakob bad u Ïoannis kiba long ki synran ki la ïohi ïa kane, ki la ong, “Ko Trai, hato me kwah ïa ngi ban kyrpad ïa ka ding ban hiar na bneng ban pynjot ïa ki kumba u Elijah u la leh?”
55U Jisu u la phai bad u la dumok ïa ki bad u la ong, “Phim tip phi dei na u jait Mynsiem aïu; naba U Khun U Briew um shym la wan ban pynjot ïa ka jingim jong ki briew, hynrei ban pynim ïa ki.” 56Nangta U Jisu bad ki synran jong u ki la ïaleit sha kawei pat ka nongrit.
Ki ban long ki nongbud U Jisu
(Mat. 8:19-22)
57Katba ki dang leit ha la ka lynti, uwei u briew u la ong ha U Jisu, “Ngan bud ïa me kat shaba me leit.”
58U Jisu u la ong ha u, “Ki myrsiang ki don ki thliew, bad ki sim ki don ki skum, hynrei U Khun U Briew um don hangno hangno ban thiah bad pynjahthait.”
59U la ong ha uwei pat u briew, “Bud ïa nga.”
Hynrei uta u briew u la ong, “Ko Kynrad, nyngkong to shah ïa nga ban leit phai pat bad ban tep ïa u kpa jong nga.” 60U Jisu u la jubab, “Ai ba kiba ïap kin tep ïa kiba ïap jong ki. Khie leit ma me bad pynbna ïa ka Hima U Blei.”
61 #
1 Syiem. 19:20
Uwei pat u briew u la ong, “Ngan bud ïa me, ko kynrad; hynrei nyngkong shah ïa nga ban leit bad khublei ïa ka longïing jong nga.”
62U Jisu u la ong ha u, “Uno uno uba sdang ban lur bad nangta uba ïai kyrtiang dien um long uba myntoi ïa ka Hima U Blei.”
Currently Selected:
LOUKAS 9: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
