LOUKAS 5

U Jisu u khot ïa ki Synran kiba nyngkong

(Mat. 4:18-22; Mrk. 1:16-20)

1 # Mat. 13:1,2; Mrk. 3:9,10; 4:1 Ha kawei ka sngi, U Jisu u la ïeng harud jong ka duriaw Gennesaret katba ki briew ki dang ïawan kiew sha u ban shahshkor ïa ka ktien jong U Blei. 2U la ïohi ar tylli ki lieng ba la tan sharud duriaw; ki nongtong dohkha ki la ieh ïa ki bad ki la sait ïa ki jar. 3U Jisu u la kiew halor kawei na ki lieng — kaba long ka jong u Simon — bad u la kyrpad ïa u ban ñiat tang khyndiat na ka rud duriaw. U Jisu u la shong ha ka lieng bad u la hikai ïa u paidbah.

4Haba u la dep kren, u la ong ha u Simon, “To ñiat ïa ka lieng kham jngai sha ka um bajylliew, bad ma me lem bad ki paralok jong me to pynhap ïa ki jar ban tong dohkha.”

5 # Ïoan. 21:3 “Ko Kynrad,” u Simon u la jubab, “ngi la trei shitom baroh shi miet bad ngim shym ngat ei ei. Hynrei lada me ong kumta, ngan pynhiar ïa ki jar.” 6#Ïoan. 21:6Nangta, ki la pynhiar ïa ki bad ki la ngat shibun tylli ki dohkha bad ki jar ki la jan kad. 7Kumta ki la ai dak ïa ki paralok jong ki kiba ha kawei pat ka lieng ban wan bad ïarap ïa ki. Ki la wan bad pyndap smam ïa ki lieng baroh ar tylli da ki dohkha, ba ki lieng ki la jan ngam. 8Haba u Simon Petros u la ïohi ïa kaei kaba lah jia, u la dem khohsiew ha khmat U Jisu bad u la ong, “Khie leit noh na nga, ko Trai! Nga long u briew uba pop!”

9Ma u bad kiwei pat kiba don lem bad u ki la sngewphylla ïa ka jingbun palat ki dohkha kiba ki la ïoh tong. 10Kajuh ka la long ïa ki paralok jong u Simon, u Jakob bad u Ïoannis, ki khun shynrang jong u Sebedi. U Jisu u la ong ha u Simon, “Wat sheptieng; naduh mynta men long u nongtong briew.”

11Ki la tan ïa ki lieng sharud duriaw, ki la iehnoh ïa kiei kiei baroh bad ki la bud ïa U Jisu.

U Jisu u pynkhiah ïa u briew uba pang 'ñiangthohlieh

(Mat. 8:1-4; Mrk. 1:40-45)

12Shisien U Jisu u la don ha kawei ka shnong ha kaba la don u briew uba la pang 'ñiangthohlieh. Haba u la ïohi ïa U Jisu u la pyndem khrup ïa lade ha madan bad u la kyrpad ïa u, “Ko kynrad, lada me mon, me lah ban pynlong ïa nga uba khuid!”

13U Jisu u la kner ïa la ka kti bad u la ktah ïa u. “Nga mon,” u la jubab. “To long khuid!” Mar kumta hi ka jingpang ka la iehnoh ïa uta u briew. 14#Leb. 14:1-32U Jisu u la hukum ïa u, “Wat ïathuh hano hano, hynrei khie leit beit sha u lyngdoh bad ai un peit bniah ïa me; nangta un pynshisha ha uwei uwei baroh ba me la koit. To ai ïa ka jingkñia kumba U Moses u la hukum.”

15Hynrei ka khubor shaphang U Jisu ka la kham phriang kylleng, bad ki paid byllien ki la wan ban sngap ïa u bad ban ïoh jingpynkhiah na ki jingpang jong ki. 16Hynrei u ju leit noh sha ki jaka kynjah, ha kaba u la duwai.

U Jisu u pynkhiah ïa u briew uba pang ïapshiliang

(Mat. 9:1-8; Mrk. 2:1-12)

17Ha kawei ka sngi mynba U Jisu u dang hikai, katto katne ngut ki Pharisi bad ki nonghikai ka Hukum kiba la wan na kawei pa kawei ka shnong na Galilaïa bad Judia bad na Jerusalem; ki la ïashong hangta. Ka bor jong U Trai ka la don na ka bynta U Jisu ban pynkhiah ïa kiba pang. 18Katto katne ngut ki rangbah ki la wan da kaba bah ha ka jingthiah ïa u briew uba ïapshiliang, bad ki la pyrshang ban rah ïa u shapoh ïing bad ban buh ha khmat jong U Jisu. 19Pynban, namar u paidbah, kim lah ban shem lynti ban rah shapoh ïa u. Kumta ki la ïabah ïa u sha tnum ïing, ki la law ïa ki jingsop ïing bad ki la pynhiar shapoh ïa u ha ka jingthiah hamar pdeng jong ka kynhun ha khmat U Jisu. 20Haba U Jisu u la ïohi haduh katno ka jingngeit ki la don, u la ong ha uta u briew, “La map ïa ki pop jong me, ko paralok jong nga.”

21Ki nonghikai ka Hukum bad ki Pharisi ki la sdang ban ïakren para ma ki, “Uei une u briew uba kren kum kane ka jingkrenbeiñ Blei! U Blei u long tang ma u hi uba lah ban map ïa ki pop!”

22U Jisu u la tip ïa ki jingpyrkhat jong ki bad u la ong ha ki, “Balei phi pyrkhat kum ïa kita kiei kiei? 23Hato ka kham suk ban ong, ‘La map ïa ki pop jong phi,’ lane ban ong, ‘to ïeng joit bad ïaid?’ 24Ngan pynshisha ha phi, te, ba U Khun U Briew u don ka bor ha ka pyrthei ban map ïa ki pop.” Kumta u la ong ha u briew uba ïapshiliang, “Nga ong ha me, to khie joit, shim ïa la ka jingthiah, bad khie leit noh sha ïing!”

25Mar kumta hi uta u briew u la khie joit ha khmat jong ki baroh, u la shim ïa ka jingthiah ha kaba u la thiah bad u la leit noh sha ïing, da kaba ïaroh ïa U Blei. 26Baroh ki la ïalyngngoh shikatdei eh! Ki la dap da ka jingsheptieng, ki la ïaroh ïa U Blei, ki da ong, “A katno kiei kiei kiba phylla ngi la ïohi ha kane ka sngi!”

U Jisu u khot ïa u Lebi

(Mat. 9:9-13; Mrk. 2:13-17)

27Hadien kane, U Jisu u la mihnoh bad u la ïohi ïa u nonglum khajna uba kyrteng u Lebi, uba shong ha la ka jaka treikam. U Jisu u la ong ïa u, “Bud ïa nga.” 28U Lebi u la ïeng joit, u la iehnoh ïa kiei kiei baroh bad u la bud ïa u.

29Nangta u Lebi u la pynlong ka jingkhawai kaba heh ha ka ïing jong u na ka bynta U Jisu, bad napdeng kiba shah khot sngewbha la don bun ngut ki nonglum khajna bad kiwei de ki briew. 30#Luk. 15:1,2Katto katne ngut ki Pharisi bad katto katne ngut ki nonghikai ka Hukum kiba dei ki jong ka kynhun jong ki, ki la khñium ha ki synran jong U Jisu. “Balei ba phi ïabam bad ïadih bad ki nonglum khajna bad kiwei pat kiba la shah kyntait?” Ki la kylli.

31U Jisu u la jubab ïa ki, “Ki briew kiba khiah kim donkam ïa u nongpynkhiah, hynrei tang kito kiba pang. 32Ngam shym la wan ban khot ïa ki riewdonburom ban kylla-kaba-mut, hynrei ïa kiba la shah kyntait.”

Ka jingkylli shaphang ka jingshah jingit

(Mat. 9:14-17; Mrk. 2:18-22)

33Katto katne ngut ki briew ki la ong ïa U Jisu, “Ki synran jong U Ïoannis ki shahjingit man ka por bad ki duwai, bad ki synran jong ki Pharisi ki leh kumjuh, hynrei ki synran jong me ki ïabam bad ïadih.”

34U Jisu u la jubab, “Hato phi pyrkhat ba phi lah ban pynlong ïa kiba shah khot sngewbha sha ka jingkhawai shongkurim ban leit noh khlem bam katba u nongleitkurim u dang don bad ki? Da shisha em! 35Hynrei ka sngi kan poi haba ïa u nongleitkurim yn shim noh na ki, bad kumta kin sa shahjingit.”

36U Jisu u la ïathuh ha ki ïa kane ka pharshi: “Ym don uno uno uba tar ïa ka lyngkhot jaiñ bathymmai ban syrdep ïa ka jaiñkup kaba rim. Lada u leh kumta, un tar ïa ka jaiñ bathymmai, bad kata ka lyngkhot jaiñ bathymmai kan ym ïadei ïa kaba rim. 37Lymne ba uno uno un theh ïa ka waiñ bathymmai ha ki lwa snieh ba la pyndonkam, namar ka waiñ bathymmai kan pynpdang ïa ki snieh, ka waiñ kan tuid shabar, bad ïa ki snieh yn pynjot. 38Pynban, ïa ka waiñ bathymmai dei ban theh ha ki lwa snieh bathymmai! 39Bad ym don uno uno uba kwah ïa ka waiñ bathymmai hadien ba u la dih ïa ka waiñ barim. ‘Kaba rim ka kham bha,’ u ong.”

Currently Selected:

LOUKAS 5: KHACLBSI

Highlight

Copy