ÏOANNIS 6

U Jisu u bsa ïa ki san hajar ngut

(Mat. 14:13-21; Mrk. 6:30-44; Luk. 9:10-17)

1Hadien kane, U Jisu u la leit sha shiliang ka duriaw Galilaïa (ïa kaba ju la khot ruh, ka duriaw Tiberias). 2U paidbah byllien u la bud ïa u, namar ba ki la ïohi ïa ki kambah jong u ha kaba pynkhiah ïa kito kiba pang. 3U Jisu u la kiew sha u lum bad hangta u la shong bad la ki synran. 4Ka por jong ka Jingkhawai Niam Ka Jinglait ka la jan. 5U Jisu u la peit sawdong bad u la ïohi ba u paidbah byllien u la nang wan sha u, kumta u la ong ha u Philip, “Nangno ngi lah ban thied jingbam ka ban dap ban bsa ïa kine ki briew baroh?” 6(U la ong ïa kane ban tynjuh ïa u Philip; ha ka jingshisha u la lah tip lypa ïa kaei ba un leh.)

7U Philip u la jubab, “Lada uwei uwei un ïoh tang mar khyndiat, kan donkam palat ïa ka arspah tylli ki sbai rupa ban thied kpu kat ban biang.”

8Uwei pat na ki synran jong u, u Andriw, uba long u para jong u Simon Petros, u la ong, 9“Don uwei u khynnah hangne uba don san tylli ki kpu barli bad ar tylli ki dohkha. Hynrei kine kin ym pat biang na ka bynta kine ki briew baroh.”

10“Pynshong ïa ki briew ha madan,” U Jisu u la ong ha ki. (La don shibun u phlang hangta.) Kumta ki briew baroh ki la shong ha madan; ki la don kumba san hajar ngut ki rangbah. 11U Jisu u la shim ïa u kpu, u la ainguh ïa U Blei, bad u la sam ïa ki ha ki briew kiba la ïashong hangta. U la leh kumjuh ruh ïa ki dohkha, bad baroh ki la ïabam kat kaba ki kwah. 12Haba baroh ki la ïakdang, u la ong ha la ki synran, “To khar ïa ki lyngkhot kiba tam; ngim dei ban pynsep-ei.” 13Kumta ki la ïalum ïa baroh kaba la tam bad ki la pyndap haduh khat-ar tukri da ki lyngkhot kiba la sah tam na ki san tylli ki kpu barli kiba ki briew ki la bam.

14Haba ki paidbah ki la ïohi ïa kane ka kambah kaba U Jisu u la leh, ki la ong, “Da shisha une u long u nongïathuhlypa, uba la dei ban wan sha ka pyrthei!” 15U Jisu u la tip lypa ba kin sa wan bad kem ïa u khnang ban pynlong syiem ïa u da ka bor; kumta u la leit phai biang sha ki jaka lum marwei hi.

U Jisu u ïaid halor ka um

(Mat. 14:22-33; Mrk. 6:45-52)

16-17Haba ka janmiet ka la poi, ki synran U Jisu ki la leit hiar sha ka duriaw, ki la kiew ha ka lieng, bad ki la leit phai pat sha shiliang ka duriaw shaphang Kapernam. Ka miet ka la poi bad U Jisu um pat wan satia sha ki. 18Ha kata hi, ka lyer kaba jur ka la beh bad la pynkhih ïa ka um. 19Ki synran ki la king kumba san ne hynriew kilomitar haba ki la ïohi ïa U Jisu ba u ïaid halor ka um, u la nang wan sha jan ka lieng, bad ki la sngewtriem. 20“Wat sheptieng,” U Jisu u la ong ha ki, “dei ma nga!” 21Nangta da kaba kmen ki la kyntiew ïa u ha ka lieng, bad kumta hi ka lieng ka la poi ha ryngkew ha ka jaka sha kaba ki thmu.

Ki briew ki ïawad ïa U Jisu

22Ha ka sngi kaba bud, ki paidbah kiba la sah ha kawei pat ka liang jong ka duriaw ki la sngewthuh shai ba la don tang kawei ka lieng hangta. Ki la tip ba U Jisu um shym la kiew ha ka lem bad ki synran jong u, hynrei ba ki la leit noh khlem ma u. 23Kiwei pat ki lieng, kiba na Tiberias, ki la wan poi ha ka ryngkew hajan ka jaka ha kaba ki paidbah ki la bam ïa u kpu hadien ba U Trai u la ainguh. 24Haba ki paidbah ki la ïohi ba U Jisu ne ki synran jong u kim don hangta, ki la kiew ha kita ki lieng bad ki la leit sha Kapernam ban wad ïa u.

U Jisu U Kpu ka Jingim

25Haba ki briew ki la shem ïa U Jisu sha shiliang jong ka duriaw, ki la ong ha u, “Ko Nonghikai, mynno me la poi shane?”

26U Jisu u la jubab, “Nga ong ha phi ïa ka jingshisha: Phi ïawad ïa nga namar ba phi la bam ïa u kpu bad phi la ïoh baroh kaba phi kwah, ym namar ba phi la sngewthuh shai ïa ki kambah jong nga. 27Wat trei na ka bynta ka jingbam ka ban sa sniew; pynban, trei na ka bynta ka jingbam ka ban neh sha ka jingim bymjukut. Kane ka long ka jingbam kaba U Khun U Briew un ai ha phi, namar ba U Blei uba U Kpa, u la sngewbha ban shonshab ha u.”

28Kumta ki la kylli ïa u, “Kaei ngi lah ban leh khnang ban ïoh leh ïa kaei kaba U Blei u kwah ïa ngi ban leh?”

29U Jisu u la jubab, “Kaei kaba U Blei u kwah ïa phi ban leh ka long ban ngeit ha uta ïa uba u la phah.”

30Ki la phai ktien, “Ka kambah aïu men leh ba ngi lah ban ïohi ïa ka bad ngeit ha me? Kaei ba men leh? 31#Eks. 16:4,15; Salm. 78:24Ki kpa tymmen jong ngi ki la bam ïa ka mana ha ri shyiap, kumba ka Jingthoh Bakhuid ka ong, ‘U la ai ha ki ïa u kpu na bneng ba kin bam.’ ”

32“Nga ong ha phi ïa ka jingshisha,” U Jisu u la ong, “kaei kaba u Moses u la ai ha phi kam dei u kpu na bneng; dei U Kpa jong nga uba ai ha phi ïa u kpu bashisha na bneng. 33Naba u kpu ba U Blei u ai u long uta uba wan hiar na bneng bad uba ai jingim ïa ka pyrthei.”

34“Ko Kynrad,” ki la ong ïa u, “to ai ha ngi ïa une u kpu borabor.”

35“Nga, nga long u kpu ka jingim,” U Jisu u la ïathuh ïa ki. “Kito kiba wan sha nga da lei lei kin ym thngan; kito kiba ngeit ha nga da lei lei kin ym sliang. 36Mynta, nga la ïathuh ïa phi ba phi la ïohi ïa nga hynrei phin ym ngeit. 37-38Uno uno ïa uba U Kpa jong nga u ai ha nga un wan sha nga. Ngan ym kyntait ïa uno uno uba wan sha nga, namar nga la wan hiar na bneng ban leh ym ïa ka mon ka jong nga hynrei ïa ka mon jong uta uba la phah ïa nga. 39Bad ka long ka mon jong uta uba la phah ïa nga ba ngam dei ban duh noh ïa uno uno na kita baroh kiba u la ai ha nga, hynrei ba nga dei ban pynmihpat ïa ki baroh ha ka sngi kaba khatduh. 40Naba kaei kaba U Kpa jong nga u kwah, ka long ba baroh kiba ïohi ïa U Khun bad ngeit ha u, ki dei ban ïoh ïa ka jingim bymjukut. Bad ngan pynmihpat ïa ki ha ka sngi kaba khatduh.”

41Ki briew ki la sdang ban ïakren khñium shaphang jong u, namar u la ong, “Nga long u kpu uba wan hiar na bneng.” 42Kumta ki la ong, “Hato une u briew um dei U Jisu, u khun jong u Joseph? Ngi ithuh ïa u kpa bad ïa ka kmie jong u. Kumno te, ba u ong mynta ba u la wan hiar na bneng?”

43U Jisu u la jubab, “Keiñ noh kaba ïakren khñium hapdeng jong phi. 44Ym don uba lah ban wan sha nga lymda U Kpa uba la phah ïa nga u pynwan ïa u sha nga; bad ngan pynmihpat ïa u ha ka sngi kaba khatduh. 45#Isa. 54:13Ki nongïathuhlypa ki la thoh, ‘Uwei pa uwei baroh un ïoh hikai na U Blei.’ Uno uno uba shahshkor ïa U Kpa bad ïoh hikai na u, u wan sha nga. 46Kane kam mut ba uno uno u la ïohi ïa U Kpa; uta uba na U Blei u long tang ma u uba la ïohi ïa U Kpa. 47Nga ong ha phi ïa ka jingshisha: Uta uba ngeit u don ka jingim bymjukut. 48Nga long u kpu ka jingim. 49Ki kpa tymmen jong phi ki la bam ïa ka mana ha ri shyiap, hynrei ki la ïap. 50Hynrei u kpu uba wan hiar na bneng u long uta ïa uba uno uno uba bam ïa u un ym ïap. 51Nga long u kpu uba im uba la wan hiar na bneng. Lada uno uno u bam ïa une u kpu, un im junom. U kpu ba ngan ai ha u, u long ka doh jong nga, ïa kaba nga ai khnang ba ka pyrthei kan ïoh im.”

52Kane ka la pynmih ïa ka jingïatainia kaba tyngeh hapdeng jong ki. “Kumno une u briew u lah ban ai ha ngi ïa ka doh jong u ban bam?” ki la kylli.

53U Jisu u la ong ha ki, “Nga ong ha phi ïa ka jingshisha: Lada phim bam ïa ka doh jong U Khun U Briew bad dih ïa ka snam jong u, phin ym don ïa ka jingim ha lade. 54Uno uno uba bam ïa ka doh jong nga bad dih ïa ka snam jong nga u don ka jingim bymjukut, bad ngan sa pynmihpat ïa u ha ka sngi kaba khatduh. 55Naba ka doh jong nga ka long ka jingbam bashisha; ka snam jong nga ka long ka jingdih bashisha. 56Kito kiba bam ïa ka doh jong nga bad ba dih ïa ka snam jong nga ki ïaisah ha nga, bad ma nga ha ki. 57U Kpa uba im u la phah ïa nga, bad namar jong u nga ruh nga im. Ha kajuh ka rukom uno uno uba bam ïa nga un im namar jong nga. 58Une te, u long u kpu uba la wan hiar na bneng; um long kum uta u kpu uba ki kpa tymmen jong phi ki la bam, hynrei hadien ki la ïap. Uta uba bam ïa une u kpu un im junom.”

59U Jisu u la ong ïa kane katba u dang hikai ha ka synagog ha Kapernam.

Ki ktien jong ka jingim bymjukut

60Kiba bun na ki nongbud jong u ki la ïohsngew ïa kane bad ki la ong, “Kane ka jinghikai ka long kaba eh than. Uei u ban shahshkor ïa ka?”

61Khlem da don ba ïathuh, U Jisu u la tip ba ki ïakhñium shaphang kane, kumta u la ong ha ki, “Hato kane ka pynlong ïa phi ba phin kwah iehnoh? 62Shu tharai, te, ba phi dei ban ïohi ïa U Khun U briew ba u leit kiew pat sha ka jaka ha kaba u la don mynshuwa. 63Kaei kaba ai jingim dei U Mynsiem jong U Blei; ka bor briew kam myntoi ei ei ruh em. Ki ktien kiba nga la kren ha phi ki wallam ïa U Mynsiem ba ai jingim jong U Blei. 64Pynban don na phi ki bymngeit.” (U Jisu u la tip naduh kaba mynnyngkong kino ki dei kita ki ban ym ngeit bad uno na ki u ban shetkylla ïa u.) 65Bad u la pyndap, “Kane hi ka dei ka daw kaba nga la ïathuh ïa phi ba ym don uba lah ban wan sha nga lymda U Kpa u pynlah ïa u ban leh kumta.”

66Namar kane, kiba bun na ki nongbud jong U Jisu ki la phai dien noh bad kim leit shuh bad u. 67Kumta u la kylli ïa ki khat-ar ngut ki synran, “Bad ma phi — hato phi ruh phi kwah ban leit noh?”

68 # Mat. 16:16; Mrk. 8:29; Luk. 9:20 U Simon Petros u la jubab ïa u, “Ko Trai, sha uno pat ngin leit? Me don ki ktien kiba ai ïa ka jingim bymjukut. 69Bad mynta ngi ngeit bad ngi tip ba me long uta U Bakhuid uba la wan na U Blei.”

70U Jisu u la phai ktien, “Hato ngam shym la jied ïa phi baroh khat-ar ngut? Pynban uwei na phi u long u ksuid!” 71U la kren shaphang u Judas, u khun jong u Simon Iskariot. Naba u Judas, wat la u dei uwei na ki khat-ar ngut ki synran, un sa shetkylla ïa u.

Currently Selected:

ÏOANNIS 6: KHACLBSI

Highlight

Copy