ÏOANNIS 7

U Jisu bad ki para shynrang jong U

1Hadien kane, U Jisu u la nang ïaid ha ka Galilaïa; um shym kwah ban leit sha Judia, namar ba ki nongsynshar jong ki Jiw hangta ki la ïakwah ban pynïap ïa u. 2-3#Leb. 23:34; Deut. 16:13Ka por jong ka Jingkhawai Niam Ki Ïingtrep ka la jan, kumta ki para shynrang jong U Jisu ki la ong ïa u, “To mihnoh na kane ka jaka bad leit sha Judia, ba ki nongbud jong me kin ïohi ïa kiei kiei kiba me leh. 4Ym don mano mano ba buhrieh ïa kaei kaba u leh lada u kwah ba kiwei kin tip. Naba me leh ïa kine kiei kiei, to ai ba ka pyrthei baroh kawei kan tip shaphang jong me!” 5(Wat ki para shynrang jong u hi kim shym la ngeit ha u.)

6U Jisu u la ong ha ki, “Ka por kaba biang na ka bynta jong nga kam pat poi. Kano kano ka por na ka bynta ïa phi ka biang. 7Ka pyrthei kam lah ban shun ïa phi, hynrei ka shun ïa nga, namar ba nga ïai-ong ba ki lynti jong ka ki long kiba sniew. 8Ma phi to nang ïaleit sha ka Jingkhawai Niam. Nga ngam leit sha kane ka Jingkhawai Niam, namar ba ka por kaba biang kam pat poi na ka bynta jong nga.” 9U la ong ïa kane, bad nangta u la sah noh ha Galilaïa.

U Jisu ha ka Jingkhawai Niam Ki Ïingtrep

10Hadien ba ki para shynrang jong u ki la leit sha ka Jingkhawai Niam, U Jisu ruh u la leit; pynban, um shym la leit ha kaba paw, hynrei ha kaba rieh. 11Ki nongsynshar jong ki Jiw ki la ïawad ïa u ha kata ka Jingkhawai Niam. “Hangno u don?” ki la kylli.

12Ka la don ka jingïa-pasiaw kaba jur shaphang jong u hapdeng u paidbah. “U long u briew uba bha,” don kiba la ong. “Em,” kiwei ki la ong, “u ïalam bakla ïa ki briew.” 13Hynrei ym don ba ïakren ha kaba paw, namar ba ki sheptieng ïa ki nongsynshar jong ki Jiw.

14Hamar kaba shiteng na ka Jingkhawai Niam ka la jan kut U Jisu u la leit sha ka Templ bad u la sdang ban hikai. 15Ki nongsynshar jong ki Jiw ki la lyngngoh haduh katta katta bad ki la ong, “Kumno une u briew u tip katne katne haba um pat ju ïoh jinghikai ei ei?”

16U Jisu u la jubab, “Kaei kaba nga hikai kam dei na ka jinghikai jong nga hi, hynrei ka wan na U Blei, uba la phah ïa nga. 17Uno uno uba mon ban leh ïa kaei kaba U Blei u kwah, un tip la kaei kaba nga hikai ka wan na U Blei ne la nga kren ha ka bor jong nga hi. 18U briew uba kren ha la ka jong ka bor u pyrshang ban ïoh burom na ka bynta ïa lade hi. Hynrei uba wad ïa ka burom jong uta uba la phah ïa u, u long uba shida, bad ym don ka bymshisha ha u. 19U Moses u la ai ha phi ïa ka Hukum, hato ym dei kumta? Hynrei ym don uwei na phi uba kohnguh ïa ka Hukum. Balei ba phi pyrshang ban pynïap ïa nga?”

20“Me don u ksuid hapoh jong me!” u paidbah u la jubab. “Mano ba pyrshang ban pynïap ïa me?”

21U Jisu u la jubab, “Nga la leh ïa kawei ka kambah, bad baroh phi ïa-sngewlyngngoh. 22#Leb. 12:3; Jen. 17:10U Moses u la hukum ïa phi ban otsher ïa ki khun shynrang jong phi (wat la um shym dei u Moses hynrei ki kpa tymmen jong phi kiba la sdang ïa ka), bad kumta phi otsher ïa u khynnah ha ka sngi Sabbaton. 23#Ïoan. 5:9Lada ïa u khynnah la otsher ha ka sngi Sabbaton ba yn ym pynkheiñ ïa ka Hukum u Moses, balei phi bitar ïa nga namar ba nga pynkhiah ïa u briew ha ka sngi Sabbaton? 24Wat shu bishar tang da ki jingthew na shabar, bad bishar da ki jingthew bashisha.”

Hato u dei U Messaïah?

25Katto katne ngut na ki briew jong ka Jerusalem ki la ong, “Hato um dei une u briew ba ki nongsynshar jong ki Jiw ki ïawad ban pynïap? 26Ha khmih! U ïakren ha u paidbah, bad kim ong ei ei pyrshah ïa u! Hato ka lah ban long ba kim ithuh shisha ïa u ba u dei U Messaïah? 27Hynrei haba U Messaïah un wan, ym don ba tip na-ei ba u wan. Bad baroh ngi tip nangno une u briew u wan.”

28Katba U Jisu u dang hikai ha ka Templ, u la kren ha ka sur kaba jam, “Hato phi ithuh da shisha ïa nga bad tip nangno nga wan? Ngam shym la wan da ka bor jong nga hi. Uta uba la phah ïa nga, pynban, u long uba shisha. 29Phim ithuh ïa u; hynrei, nga ithuh ïa u, namar nga wan na u bad u la phah ïa nga.”

30Te ki la pyrshang ban kem ïa u, hynrei ym don uba la ktah kti ïa u, namar ba ka kynta jong u kam pat poi. 31Hynrei bun na uta u paidbah u la ngeit ha u bad u la ong, “Haba U Messaïah un wan, hato un leh kham bun ki kambah ban ïa kaba une u briew u la leh?”

La phah ïa ki nongap phira ban kem ïa U Jisu

32Ki Pharisi ki la ïohsngew ba u paidbah u ïa-pasiaw ïa kine kiei kiei shaphang U Jisu, kumta ma ki bad ki rangbah lyngdoh ki la phah katto katne ngut ki nongap phira ban kem ïa u. 33U Jisu u la ong, “Ngan don bad phi tang shipor, bad nangta ngan sa leit noh sha uta uba la phah ïa nga. 34Phin ïawad ïa nga, hynrei phin ym shem ïa nga, namar phim lah ban leit sha kaba ngan don.”

35Ki nongsynshar jong ki Jiw ki la ïakren para ma ki, “Shano ba un sa leit ba ngi ngin ym shem ïa u? Hato un leit sha ki shnong jong ki Grik ha kaba ki briew jong ngi ki sah, bad ban hikai ïa ki Grik? 36U ong ba ngin wad ïa u hynrei ngin ym shem ïa u, bad ba ngim lah ban leit sha kaba un don. U mut aïu?”

Ki wahduid jong ka um kaba ai jingim

37 # Leb. 23:36 Ha ka sngi kaba khatduh bad kaba khraw tam eh jong ka Jingkhawai Niam, U Jisu u la ïeng joit bad u la ong ha ka sur kaba jam, “Uno uno uba sliang u dei ban wan sha nga, bad uno uno uba ngeit ha nga u dei ban dih. 38#Ese. 47:1; Sekh. 14:8Kumba ka Jingthoh Bakhuid ka ong, ‘Ki wahduid ka um kaba ai jingim kin tuid noh na ka dohnud jong u.’ ” 39U Jisu u la kren ïa kane shaphang U Mynsiem, uba kito kiba la ngeit ha u kin ïohpdiang. Ha kata ka por ïa U Mynsiem ym pat shym la ai, namar ïa U Jisu ym pat shym la kyntiew sha ka burom.

Ka jingïapait hapdeng ki Briew

40Katto katne ngut na ki briew ha uta u paidbah ki la ïohsngew ïa u ba u ong ïa kane bad ki la ong, “Une u briew u dei da shisha u nongïathuhlypa.” 41Kiwei pat ki la ong, “U dei U Messaïah!” Hynrei kiwei ki la ong, “U Messaïah un ym wan na Galilaïa? 42#2 Sam. 7:12; Mik. 5:2Ka Jingthoh Bakhuid ka ong ba U Messaïah un long uba hiarpateng na u Syiem Dabid bad yn kha ïa u ha Bethlehem, ka shnong ha kaba u Dabid u la im.” 43Kumta ka la don ka jingïapait hapdeng u paidbah namar U Jisu. 44Don kiba la kwah ban kem ïa u, hynrei ym don uba ktah kti ïa u.

Ka jingbymngeit ki nongsynshar jong ki Jiw

45Haba ki nongap phira ki la leit phai noh, ki rangbah lyngdoh bad ki Pharisi ki la kylli ïa ki, “Balei phi khlem wan ïalam ïa u?”

46Ki nongap phira ki la jubab, “Ym pat ju don uno uno u ban kren kum une u briew!”

47“Hato u la pynbieit ïa phi ruh?” ki Pharisi ki la kylli ïa ki. 48“Hato phi la ju tip ba don uno uno na ki nongsynshar jong ki Jiw ne uwei u Pharisi kiba ngeit ha u? 49Une u paidbah um tip ïa ka Hukum u Moses, te ki long hapoh ka jingtim jong U Blei!”

50 # Ïoan. 3:1,2 Uwei na ki Pharisi hangta u dei u Nikodemos, u briew uba la leit mynshuwa ban ïohi ïa U Jisu. 51U la ong ha kiwei, “Kat kum ka Hukum jong ngi ngim lah ban pynrem ïa u briew ha shuwa ban ïohsngew na u bad ban shem kaei ba u la leh.”

52-53“Te kumta,” ki la jubab, “phi ruh phi dei na Galilaïa? To pule minot ïa ki Jingthoh Bakhuid bad phin shem ba ym don nongïathuhlypa uba ju mih na Galilaïa.”

Currently Selected:

ÏOANNIS 7: KHACLBSI

Highlight

Copy