ÏOANNIS 5

Ka jingpynkhiah ha ka pungsum

1Hadien kane, U Jisu u la leit sha Jerusalem na ka bynta ka Jingkhawai Niam. 2Hajan ka Khyrdop Langbrot ha Jerusalem ka la don ka pungsum kaba don san tylli ki baranda; ha ka ktien Hebru la khot ïa ka, “ka Bethesda.” 3U paid uba bun jong ki briew kiba pang ki ïathiah ha ki baranda — kiba matlah, kiba dkoh, bad kiba ïapshiliang. 4Ki da ap ïa ka jingkhih jong ka um, namar u angel U Trai hateng hateng u ju hiar sha kata ka pungsum ban pynkhih ïa ka um. Ïa u nongpang uba nyngkong uba hiar ha ka pungsum hadien ba la pynkhih ïa ka um la pynkhiah na kano kano ka jingpang kaba u don. 5Hangta la don u briew uba la pang haduh laiphew phra snem. 6U Jisu u la ïohi ïa u ba u thiah hangta, bad u la tip ba uta u briew u la pang la slem bah; kumta u la kylli ïa u, “Me kwah ban ïohkhiah?” 7Uta u briew uba pang u la jubab, “Ko Kynrad, ngam don mano mano hangne ban leit buh ïa nga ha ka pungsum haba la pynkhih ïa ka um; katba nga dang pyrshang ban hiar ha ka, uwei pat u poi nyngkong ha ka.”

8U Jisu u la ong ha u, “To ïeng joit, to rah ïa la ka jingthiah, bad to ïaid.” 9Mar kumta hi uta u briew u la ïohkhiah, u la rah ïa la ka jingthiah bad u la sdang ban ïaid.

10 # Neh. 13:19; Jer. 17:21 Kane ka la jia ha ka sngi Sabbaton, kumta ki nongsynshar jong ki Jiw ki la ong ïa uta u briew uba la ïohkhiah, “Kane ka dei ka sngi Sabbaton, bad ka long pyrshah ïa ka Hukum jong ngi ïa me ban rah ïa la ka jingthiah.”

11U la jubab, “U briew uba la pynkhiah ïa nga u la ong ha nga ba ngan rah ïa ka jingthiah bad ban ïaid.”

12Ki la kylli ïa u, “Uei uta u briew uba la ong ïa me ban leh kumne?”

13Hynrei uta u briew uba la ïohkhiah um shym tip ba U Jisu u la long uei, naba la don u paidbah ha kata ka jaka, bad U Jisu u la lah mihnoh jar jar.

14Hadien kata, U Jisu u la shem ïa u ha ka Templ bad u la ong, “Peit shane, me la khiah mynta; te sangeh na kaba leh pop, ïoh kaei kaei kaba kham sniew ka lah ban jia ïa me.”

15Te uta u briew u la leit noh bad u la ïathuh ïa ki nongsynshar jong ki Jiw ba dei U Jisu uba la pynkhiah ïa u. 16Kumta ki la sdang ban wad dong ban pynshitom ïa U Jisu, namar ba u la leh ïa kane ka jingpynkhiah ha ka sngi Sabbaton. 17U Jisu u la jubab ïa ki, “U Kpa jong nga u ïai trei, bad ka dei ïa nga ruh ban trei.”

18Kane ka jingong ka la pynlong ïa ki nongsynshar jong ki Jiw ba kin nang wad dong shuh shuh ban pynïap ïa u; ym tang ba u la pynkheiñ ïa ka hukum Sabbaton, hynrei ba u la ong ba U Blei hi u dei U Kpa jong u bad da kumne u la pynlong ïa lade uba ïaryngkat bad U Blei.

Ka iktiar jong U Khun

19Kumta U Jisu u la jubab ïa ki, “Nga ong ha phi ïa ka jingshisha: U Khun um lah ban leh ei ei na lade; u leh tang ïa kaei kaba u ïohi ba U Kpa jong u, u leh. Ïa kaei kaba U Kpa u leh, U Khun ruh u leh. 20Naba U Kpa u ieit ïa U Khun bad u pyn-i ha u ïa baroh kaba ma u hi u leh. Un pyn-i ha u wat ïa kiei kiei kiba kham khraw kiba un leh ban ïa kane, bad baroh phin sngewlyngngoh. 21Kumba U Kpa u pynmihpat ïa kiba ïap bad u ai ha ki ïa ka jingim, ha kajuh ka rukom U Khun u ai jingim ïa kito kiba u mon. 22Lymne U Kpa da lade hi um bishar ïano ïano. U la ai ha la U Khun ïa ka hok baroh ban bishar, ba baroh kin burom ïa U Khun kumba ki burom ïa U Kpa. 23Uno uno u bym burom ïa U Khun um burom ïa U Kpa uba la phah ïa u.

24“Nga ong ha phi ïa ka jingshisha: Uno uno uba ïohsngew ïa ki ktien jong nga bad uba ngeit ha uta uba la phah ïa nga u don ka jingim bymjukut. Yn ym bishar ïa u, hynrei u la lait shiliang na ka jingïap sha ka jingim. 25Nga ong ha phi ïa ka jingshisha: Ba ka por kan poi — ka por ka la lah poi — haba kiba ïap kin ïohsngew ïa ka sur jong U Khun U Blei, bad kito kiba ïohsngew ïa ka kin ïoh im. 26Kumba U Kpa da lade hi u long u tyllong jong ka jingim, ha kajuh ka rukom u la pynlong ïa U Khun jong u ban long u tyllong jong ka jingim. 27Bad u la ai ha U Khun ïa ka hok ban bishar, namar u long U Khun U Briew. 28-29#Dan. 12:2Wat sngewlyngngoh ha kane; ba ka por kan wan haba baroh kiba ïap kin ïohsngew ïa ka sur jong u bad kin mihnoh na ki jingtep jong ki: Kito kiba la leh ïa kaba bha kin mihpat bad kin im, bad kito kiba la leh ïa kaba sniew kin mihpat bad yn pynrem ïa ki.

Kiba sakhi ïa U Jisu

30“Nga ngam lah ban leh ei ei da la ka jong ka bor; nga bishar tang kat kaba U Blei u ong ïa nga, kumta ka jingbishar jong nga ka long kaba hok, namar ba ngam pyrshang ban leh ïa kaei kaba nga mon, hynrei ïa kaei kaba uta uba la phah ïa nga u mon.

31“Lada nga phla na ka bynta ïa lade, ïa kaei kaba nga ong ym dei ban pdiang kum ka jingpynshisha kaba dei. 32Hynrei don uwei pat uba phla na ka bynta jong nga, bad nga tip ba ïa kaei kaba u ong shaphang jong nga ka long kaba shisha. 33#Ïoan. 1:19-27; 3:27-30U Ïoannis u long uta ha uba phi phah ïa ki nonglamktien jong phi, bad u kren na ka bynta ka jingshisha. 34Kam mut ba nga dei ban da ïoh ïa ka jingphla jong u briew; nga ong ïa kane ba khnang ba phin ïohlait im. 35U Ïoannis u la long kum ka sharak, kaba meh bad kaba tyngshaiñ, bad phi la mon shipor ban lehkmen ha ka jingshai jong u. 36Hynrei nga don ka jingphla na ka bynta jong nga kaba kham khraw ban ïa ka jingphla kaba u Ïoannis u la ai: Kaei kaba nga leh, kata ka long, ki kam kiba U Kpa jong nga u la ai ïa nga ban leh, kine ki kren na ka bynta jong nga bad ki pyn-i ba U Kpa u la phah ïa nga. 37#Mat. 3:17; Mrk. 1:11; Luk. 3:22Bad U Kpa, uba la phah ïa nga, u ruh u phla na ka bynta jong nga. 38Phim pat ju ïohsngew ïa ka sur jong u lane phim pat ju ïohi ïa ka khmat jong u, bad phim ju sumar ïa ka khubor jong u ha ki dohnud jong phi, naba phim ngeit ha uta ïa uba u la phah. 39Phi pule ïa ki Jingthoh Bakhuid, namar phi pyrkhat ba ha ki phin shem ïa ka jingim bymjukut. Bad kine hi ki Jingthoh Bakhuid ki kren shaphang jong nga! 40Pynban phim mon ban wan sha nga khnang ba phin ïoh ïa ka jingim.

41“Ngam wad ïa ka jingïaroh ki briew. 42Hynrei nga tip kiba kumno ki briew phi long, bad nga tip ba phim don ka jingieit ïa U Blei ha ki dohnud jong phi. 43Nga la wan da ka iktiar U Kpa jong nga; hynrei phim shym la pdiang ïa nga; pynban, haba don uno uno uba wan ha la ka jong ka iktiar, phin pdiang ïa u. 44Phi sngewtynnat ban ïohpdiang jingïaroh uwei na uwei pat, hynrei phim pyrshang ban ïoh ïa ka jingïaroh na uta uba ma u hi u long U Blei; kumno, te, phi lah ban ngeit ha nga? 45Pynban, wat pyrkhat ba dei ma nga u ban mudui ïa phi ha U Kpa jong nga. U Moses, ha uba phi la buh ïa la ka jingkyrmen, dei ma u, u ban mudui ïa phi. 46Lada phi la ngeit da shisha ha u Moses, phin jin da la ngeit ha nga, namar u la thoh shaphang jong nga. 47Hynrei ba phim ngeit ïa kaei kaba u la thoh, kumno phi lah ban ngeit ïa kaei kaba nga ong?”

Currently Selected:

ÏOANNIS 5: KHACLBSI

Highlight

Copy