EPHESOS 2
2
Na ka jingïap sha ka jingim
1 #
Kol. 2:13
Mynshuwa phi la long kiba ïap ha ka jinglong mynsiem namar ka jingbymkohnguh bad ki pop jong phi. 2Ha kata ka por phi bud ïa ka rukom im basniew jong ka pyrthei; phi la kohnguh ïa u nongsynshar jong ki bor mynsiem ha ka haw haw, u mynsiem uba synshar mynta ïa ki briew ki bymkohnguh ïa U Blei. 3Ha ka jingshisha, baroh na ngi, ngi la long kum ma ki bad ngi la im kat kum ki jingkwah ka doh jong ngi, da kaba leh ïa kano kano kaba ïahap kat kum ki jingkwah jong ki met bad ki jingmut jingpyrkhat jong ngi hi. Ha ka jinglong tynrai jong ngi, kumba long uwei pa uwei, la buh lypa ban shah pynshitom ha ka jingbitar U Blei.
4Hynrei ka jingisynei U Blei ka shlei katta katta, bad ka jingieit jong u ïa ngi ka long kaba khraw katta katta, 5ba haba ngi la long kiba ïap ha ka jinglong ba kynja mynsiem ha ka jingbymkohnguh jong ngi u la wallam ïa ngi sha ka jingim lem bad U Khrist. Ka dei da ka jingaiei U Blei ba la pynim ïa phi. 6Ha U Khrist Jisu, la pynmihpat ïa ngi lem bad u, ba ngin ïoh synshar lem bad u ha ka pyrthei ba kynja bneng. 7U la leh ïa kane ban pynpaw ha ki por baroh ki ban sa wan ïa ka jingkhraw tam eh ka jingaiei jong u ha ka jingieit ïa kaba u la pyn-i sha ngi ha U Khrist Jisu. 8-9Namar dei da ka jingaiei U Blei ba ïa phi la pynim da ka jingngeit. Kam dei na ka jingmih na ki kam jong phi hi, hynrei ka long ka jingai U Blei, khnang ba uno uno un ym lah ban kren sarong shaphang kata. 10U Blei u la pynlong ïa ngi kumba ngi long, bad ha U Khrist Jisu u la pynlong ïa ngi ban im na ka bynta ki kam babha, ïa kiba u la pynkhreh lypa ba ngin leh ïa ki.
Ka jinglong kawei ha U Khrist
11Phi ïa kiba la kha kum ki Jentil — ïa kiba la khot “ki bymotsher” da ki Jiw, kiba ïa lade pat ki khot “kiba la otsher” (kaba thew ïa kaei kaba ki briew ki leh ha ki met jong ki) — to kynmaw ïa kaei kaba phi la long mynshuwa. 12Ha kata ka por phi la long khlem U Khrist. Phi la long ki nongwei bad phim shym la dei ki briew ba la jied jong U Blei. Phim shym la don bynta ha ki jutang, kiba la pynshong nongrim ha ki jingkular jong U Blei sha ki briew jong u, bad phi la im ha kane ka pyrthei khlem jingkyrmen bad khlem U Blei. 13Hynrei mynta, ha U Khrist Jisu, ïa phi kiba la ju long jngai la wallam hajan da ka jingïap kaba long ka jingkñia U Khrist. 14Namar U Khrist da lade hi u la wanrah ha ngi ïa ka jingsuk da kaba pynlong kawei ka jaitbynriew ïa ki Jiw bad ki Jentil. Da ka met jong u hi, u la pynkhyllem ïa ka kynroh kaba pynïakhlad ïa ki bad kaba pynlong ïa ki, ki nongshun. 15#Kol. 2:14U la pynduh ïa ka hukum ki Jiw da la ki jong ki hukum bad ki kyndon, khnang ban ïoh pynlong ïa ki ar tylli ki jaitbynriew kawei ka jaitbynriew kaba thymmai ha u hi, ha kane ka rukom u wanrah jingsuk. 16#Kol. 1:20Da ka jingïap jong u halor ka diengphna, U Khrist u la pynduh thiaw ïa ka jingïashun jong ki; da ka lynti jong ka diengphna u la pynïasoh lang ar ki jaitbynriew ha kawei ka met, bad u la wallam pat ïa ki sha U Blei. 17#Isa. 57:19Kumta U Khrist u la wan bad u la ïalap ïa ka Khubor Babha jong ka jingsuk sha baroh — sha phi ki Jentil, kiba la jngai bah na U Blei, bad sha ki Jiw, kiba long hajan ïa u. 18Ka dei lyngba U Khrist ba baroh ma ngi, ki Jiw bad ki Jentil, ngi la lah ban wan ha uwei U Mynsiem sha ka jingdon ryngkat jong U Kpa.
19Kumta te, phi ki Jentil phim long shuh ki nongwei ne ki sohshnong; phi long mynta ki para traishnong bad ki briew jong U Blei bad ki dkhot jong ka longïing U Blei. 20Ïa phi ruh, la tei ha ka nongrim ba la buh da ki apostol bad ki nongïathuhlypa, u mawdong uba long U Khrist Jisu hi. 21U long ma u, uta uba bat ïa ka jingtei baroh kawei, bad uba pynlong ïa ka ba kan san ha ka Templ kaba kyntang ïa kaba la pynkyntang sha U Trai. 22Ha u, ïa phi ruh la tei lang lem bad kiwei pat da U Mynsiem jong u ha ka jaka ha kaba U Blei u shong.
Currently Selected:
EPHESOS 2: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
