EPHESOS 3
3
Ka jingtrei u Paul na ka bynta ki Jentil
1Namar kane ka daw, nga u Paul, u nongsah byndi U Khrist Jisu na ka bynta jong phi ki Jentil, nga duwai ha U Blei. 2Da shisha phi la ïohsngew ba U Blei ha ka jingaiei jong u, u la ai ha nga ïa kane ka kam ban trei na ka bynta ka jingbha jong phi. 3U Blei u la pynpaw shai ïa ka jingthmu barieh jong u bad u la pyntip ïa ka ha nga. 4#Kol. 1:26,27(Nga la thoh khyndiat shaphang kane, bad lada phi pule ïa kaei kaba nga la thoh, phi lah ban tip shaphang ka jingsngewthuh jong nga ïa ka jingmaïan U Khrist.) 5Ha ki por ba-mynshuwa ïa u khunbynriew ym shym la ïathuh ïa kane ka jingmaïan, hynrei, U Blei u la pynpaw ïa ka mynta da U Mynsiem ha ki apostol bad ki nongïathuhlypa bakhuid jong u. 6Ka jingmaïan ka long kata kaba da ka lynti ka gospel, ki Jentil ki ïoh bynta lem bad ki Jiw ïa ki jingkyrkhu U Blei; ki long ki dkhot jong kajuh ka met bad ki ïoh bynta ïa ka jingkular kaba U Blei u la pynlong lyngba U Khrist Jisu.
7Ïa nga keiñ la pynlong u shakri jong kata ka gospel da ka jingai bakyrpang U Blei, kaba u la ai ha nga lyngba ka jingtrei ka bor jong u. 8Nga long uba rit na kiba rit tam na ki briew jong U Blei baroh; pynban, U Blei u la ai ha nga ïa kane ka kabu ban ïalap sha ki Jentil ïa ka Khubor Babha shaphang ka jingkynrei spah bymkut shuh jong U Khrist, bad ban pynlong ïa ki briew baroh ban ïohi kumno ba la pyntreikam ïa ka jingthmu bamaïan U Blei. 9U Blei uba long u Nongthaw ïa kiei kiei baroh, u la buhrieh ïa ka jingmaïan ha ki pateng baroh kiba mynshuwa, 10khnang ba ha ka por ba mynta lyngba ka Balang, ki angel nongsynshar bad ki bor ha ka pyrthei ba kynja bneng ki lah ban tip ïa ka jingstad jong u ha baroh ki rukom ba-ïapher jong ki. 11U Blei u la leh ïa kane kat kum ka jingthmu bymjukut kaba u la pyndep lyngba U Khrist Jisu uba U Trai jong ngi. 12Ha U Khrist bad da ka jingngeit jong ngi ha u ngi don ka jingshlur ban leit sha ka jingdon ryngkat U Blei da ka jingsngewskhem baroh. 13Nga kyrpad ïa phi, te ban ym noh mynsiem namar nga shahshitom na ka bynta jong phi; ka dei na ka bynta ka jingmyntoi jong phi baroh.
Ka jingieit U Khrist
14Namar kane ka daw, nga dem khohsiew ha khmat U Kpa, 15na uba man la ka longïing ha bneng bad ha ka pyrthei ka ïohpdiang ïa la ka kyrteng kaba shisha. 16Nga kyrpad ïa U Blei na ka jingkynrei spah ka burom jong u ban ai ha phi ïa ka bor da U Mynsiem jong u ba phin long kiba khlaiñ ha ki jinglong bashapoh jong phi, bad nga duwai ba U Khrist un pynlong ka ïingshong jong u ha ki dohnud jong phi da ka jingngeit. 17Nga duwai ban pynsuhthied ïa phi bad pynshong nongrim ha ka jingieit, 18khnang ba ma phi lem bad ki briew jong U Blei baroh, phin lah ban ïoh ka bor ban sngewthuh katno ka jingïar bad ka lynter, katno ka jingjrong bad ka jingjylliew, ka long ka jingieit U Khrist. 19Ho-oid, phi lah ban tip ïa ka jingieit jong u — wat la kam long kaba lah ban tip pura ïa ka — bad kumta to long kiba dap pura da ka jinglong jong U Blei hi.
20Ha uta uba da ka bor jong u kaba trei ha ngi u lah ban leh kham palat ban ïa kaba ngi pan, lane wat ïa kaba ngi pyrkhat; 21ha U Blei to long ka burom ha ka balang bad ha U Khrist Jisu na ka bynta ki por baroh, junom la junom! Amen.
Currently Selected:
EPHESOS 3: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
