EPHESOS 1

1 # Ki Kam. 18:19-21; 19:1 Na u Paul, uba da ka mon U Blei u long u Apostol jong U Khrist Jisu —

Sha ki briew jong U Blei ha Ephesos, kiba ïeng skhem ha ka jingim jong ki ha U Khrist Jisu:

2To U Blei uba U Kpa jong ngi bad U Jisu Khrist uba U Trai un ai ïa phi ka jingaiei bad ka jingsuk.

Ki jingkyrkhu ba kynja mynsiem ha U Khrist

3To ngin ai ki jingnguh sha U Blei bad U Kpa U Jisu Khrist uba U Trai jong ngi! Naba ha U Khrist, u la kyrkhu ïa ngi da kaba ai ha ngi ïa ka jingkyrkhu ba kynja mynsiem baroh ha ka pyrthei kaba kynja bneng. 4Wat shuwa ban pynlong ïa ka pyrthei, U Blei u la jied lypa ïa ngi ban long ki jong u ha U Khrist, khnang ba ngin ïoh long kiba khuid bad kiba khlem shah kynnoh pop ha khmat jong u.

5Namar ka jingieit jong u, U Blei u la rai lypa ba da U Jisu Khrist un pynlong ïa ngi ki khun jong u — kane ka long ka jingsngewbha bad ka jingthmu jong u. 6To ngin ïaroh ïa U Blei namar ka jingaiei ba-dap da ka burom jong u, ïa ka jingai ei u la ai ha ngi ha U Khun uba ieit jong u! 7#Kol. 1:14Naba da ka jingïap ba la kñia jong U Khrist la pyllaitluid ïa ngi, kata ka long, ïa ki pop jong ngi la map ei. 8Katno khraw ka long ka jingaiei U Blei, kaba u la ai ha ngi ha kat kata ka jingthew bakhraw!

9U Blei u la leh ïa kata ha ka jingstad bad jingïohi jong u baroh ïa kaei kaba u la thmu, bad u la pynpaw shynna ha ngi ïa ka jingthmu ba la buhrieh ïa kaba u la lah thmu lypa ban pyndep da U Khrist. 10Kane ka jingthmu, ïa kaba U Blei un sa pyndep ha ka ïa kaba biang, ka long ban lumlang ïa ka jingpynlong baroh, ha bneng bad ha khyndew, lem bad U Khrist kum u khlieh.

11Ïa kiei kiei baroh la leh kat kum ka jingthmu bad ka jingrai U Blei; bad U Blei u la jied ïa ngi ban long ki briew jong u hi ha U Khrist namar ka jingthmu jong u hi, ba la pynshong nongrim ha kaei kaba u la rai naduh kaba mynnyngkong. 12Te ma ngi, kiba long kiba nyngkong ban kyrmen ha U Khrist, ngin ïaroh ïa ka burom U Blei!

13Bad ma phi ruh, kiba la kylla long ki briew jong U Blei mynba phi la ïohsngew ïa ka khubor kaba shisha, ka khubor babha kaba wallam ïa phi ka jingpynim. Phi la ngeit ha U Khrist, bad U Blei u la buh ïa ka jingshonshab ka jinglong trai ha phi da kaba ai ha phi ïa U Mynsiem Bakhuid uba u la kular. 14U Mynsiem u long ka jingbahkhlieh ba ngin sa ïohpdiang ïa kaei kaba U Blei u la kular ha ki briew jong u, bad kane ka pynthikna ïa ngi ba U Blei un ai ka jinglaitluid kaba pura ha kito kiba long ki jong u. To ngin ïaroh ïa ka burom jong u!

Ka jingduwai u Paul

15Na kane ka daw, naduh ba nga la ïohsngew ïa ka jingngeit jong phi ha U Trai Jisu bad ka jingieit jong phi ïa ki briew jong U Blei baroh, 16ngam shym la sangeh ban ainguh ïa U Blei na ka bynta jong phi. 17Nga kynmaw ïa phi ha ki jingduwai jong nga; bad nga kyrpad na U Blei jong U Jisu Khrist uba U Trai jong ngi, u Kpa uba dap da ka burom, ba un ai ha phi ïa U Mynsiem, u ban pynlong ïa phi kiba stad bad un pynpaw ha phi ïa U Blei, khnang ba phin ïoh tip ïa u. 18Nga duwai ba yn plie ïa ki jingmut jong phi khnang ba phin ïohi ïa ka jingshai jong u, ba phin tip kaei kata ka jingkyrmen ïa kaba u la khot ïa phi, katno ki jingkynrei spah ki long kita ki jingkyrkhu baphylla kiba U Blei u la kular ïa la ki briew, 19bad katno ka jingkhraw eh long kata ka bor kaba trei ha ngi kiba ngeit. 20#Salm. 110:1Kane ka bor kaba trei ha ngi ka long kajuh kum ka jingkhlaiñbor ba u pyndonkam haba u la pynmihpat ïa U Khrist na kiba ïap, bad u la pynshong ïa u sha ka kti kamon jong u ha ka pyrthei ba kynja bneng. 21U Khrist u synshar hangta halor baroh ki nongsynshar ba kynja bneng, ki bor synshar, ki bor, bad ki kynrad; u don ka kyrteng kaba kham hajrong ban ïa kiwei pat ki kyrteng kiba don ka bor ha kane ka pyrthei mynta bad ka ban sa wan. 22#Salm. 8:6#Kol. 1:18U Blei u la buh ïa kiei kiei baroh hapoh ki kjat U Khrist bad u la ai ïa u ha ka Balang kum U Trai uba ha khlieh duh halor kiei kiei baroh. 23Ka Balang ka long ka met U Khrist, kaba pyndap pura ïa u, uba da lade hi u pyndap pura ïa kiei kiei baroh ha kylleng ki jaka.

Currently Selected:

EPHESOS 1: KHACLBSI

Highlight

Copy