KOLOSSAI 3

1 # Salm. 110:1 Ïa phi la pynmihpat lem bad U Khrist, kumta pynbeit ïa ka dohnud jong phi ha kiei kiei kiba ha bneng, ha kaba U Khrist u shong ha la ka khet ha ka liang kamon jong U Blei. 2To pynneh ïa ki jingmut jong phi ha kiei kiei kiba hangta, ym ha kiei kiei kiba hangne ha khyndew. 3Naba phi la ïap, bad ïa ka jingim jong phi la buhrieh lem bad U Khrist ha U Blei. 4Ka jingim bashisha jong phi ka long U Khrist, bad haba u mihpaw, te ma phi ruh phin mihpaw lem bad u bad ïoh bynta ïa ka burom jong u!

Ka jingim kaba rim bad kaba thymmai

5Phi dei ban pynïap troiñ, te, ïa ki jingkwah brai ba kynja pyrthei kiba trei hapoh jong phi, kum ka jingawria, ka jingkhlem-akor, ka jingkwah brai, ki jingkwah basniew, bad ka jinglalot (naba ka jinglalot ka long kawei pat ka dur jong ka jingmane bleithaw). 6Namar kiba kum kine kiei kiei, ka jingbitar jong U Blei ka wan ha kito ki bymkohnguh ïa u. 7Ha kawei ka por, phi hi phi la ju im kat kum kine ki jingkwah, haba ïa ka jingim jong phi la tyllep da ki.

8Hynrei mynta phi dei ban kiar noh na kine kiei kiei baroh: Ka jingbitar, ka jingkwah jakhlia, bad ki jingsngew kiba dap da ka jingisih. Ki jingkrenbeiñ lane ki jingkrensih kim dei da lei lei ban mih na ki rmiang shyntur jong phi. 9#Eph. 4:22Wat ïa-lamler iwei ïa iwei pat, naba phi la loit noh ïa ka jinglong barim lem bad ki jingmlien jong ka bad ba phi la kup ïa ka jinglong bathymmai. 10#Eph. 4:24; Jen. 1:26Une u long u jingthaw bathymmai uba U Blei, u Nongthaw jong u, u ïai pynthymmai ha ka dur jong u hi, khnang ban wallam ïa phi sha ka jingtip ba-pura shaphang jong u. 11Kaba mih na kata, ka long ba ym don shuh ka jingpynïapher hapdeng ki Jentil bad ki Jiw, kiba la shah otsher bad ki bym shym la shah otsher, ki riewkhlaw, ki riewdum, ki mraw bad kiba laitluid; hynrei U Khrist u long baroh, U Khrist u long ha baroh.

12 # Eph. 4:2 Phi long ki briew jong U Blei; u la ieit bad jied ïa phi na ka bynta jong u hi. Kumta te, phi dei ban kup ïa lade da ka jingsngewsynei, ka jingbhasbun, ka jingsngewrit, ka jingjemnud, bad ka jingïaishah. 13#Eph. 4:32To ïaishah iwei ïa iwei pat, bad ïamap iwei ïa iwei pat ha man ba uno uno na phi u don ka jingmudui pyrshah ïa uno uno uwei pat. Phi dei ban ïamap iwei ïa iwei pat kumba U Trai u la map ïa phi. 14Bad nalor kine ki jinglong baroh, to bynrap ïa ka jingieit, kaba tehsong lang ïa kiei kiei baroh lang ha ka jingïatylli kaba janai. 15Ka jingsuk kaba U Khrist u ai, ka long ban kdew lynti ïa phi ha ki rai kiba phi shim; naba dei ïa kane ka jingsuk ba U Blei u la khot lang ïa phi ha kawei ka met. Bad to long kiba sngewnguh. 16#Eph. 5:19,20Ka khubor jong U Khrist ha ka jingdap pura jong ka baroh, ka dei ban im hapoh ki dohnud jong phi. To hikai bad kyntu iwei ïa iwei pat da ka jingstad baroh. To rwai ki salm, ki jingrwai, bad ki jingrwai bakyntang; to rwai sha U Blei da ka jingainguh ha ki dohnud jong phi. 17Nangta, ïa kaei kaei baroh kaba phi leh ne phi ong, dei ban leh ha ka kyrteng jong U Trai Jisu, ha kaba phi ainguh da u ïa U Blei uba U Kpa.

Ka jingïadei shimet shimet ha ka jingim kaba thymmai

18 # Eph. 5:22; 1 Pet. 3:1 Ko ki kynthei, to pynhapoh ïa lade ha ki tnga jong phi, naba kata ka long kaei kaba phi dei ban leh kum ki bangeit.

19 # Eph. 5:25; 1 Pet. 3:7 Ko ki shynrang, to ieit ïa la ki tnga bad wat long kiba leh khor ïa ki.

20 # Eph. 6:1 Ko ki khun, ka dei ka kamram ki bangeit ban ïai kohnguh ïa la ki kmie ki kpa, naba kata ka long kaei kaba pynsngewbha ïa U Blei.

21 # Eph. 6:4 Ko ki kmie ki kpa, to wat pynbitar ïa la ki khun, ïoh ba kin noh mynsiem.

22 # Eph. 6:5-8 Ko ki shakri, to kohnguh ïa ki kynrad jong phi ha kiei kiei baroh, ym tang haba ki ïohi ïa phi namar ba phi kwah ban ïoh pynsngewbha ïa ki; hynrei to leh ïa ka da ka dohnud bashisha namar ka jingsheptieng burom jong phi ïa U Trai. 23Ïa kaei kaei kaba phi leh, trei ïa ka naduh mynsiem, kumba phi trei na ka bynta U Trai bad ym na ka bynta ki briew. 24Kynmaw ba U Trai un ai ha phi kum ka bainong ïa kaei kaba u la buh na ka bynta ki briew jong u. Naba U Khrist u dei U Kynrad bashisha uba phi shakri. 25#Deut. 10:17; Eph. 6:9Bad ïa uwei pa uwei uba leh bakla yn siew na ka bynta kiei kiei kiba bakla kiba u leh, namar U Blei u bishar ïa uwei pa uwei da kajuh ka jingthew.

Currently Selected:

KOLOSSAI 3: KHACLBSI

Highlight

Copy