Popular Bible Verses from KOLOSSAI 3

Share

To ïaishah iwei ïa iwei pat, bad ïamap iwei ïa iwei pat ha man ba uno uno na phi u don ka jingmudui pyrshah ïa uno uno uwei pat. Phi dei ban ïamap iwei ïa iwei pat kumba U Trai u la map ïa phi.

To pynneh ïa ki jingmut jong phi ha kiei kiei kiba hangta, ym ha kiei kiei kiba hangne ha khyndew.

Ïa kaei kaei kaba phi leh, trei ïa ka naduh mynsiem, kumba phi trei na ka bynta U Trai bad ym na ka bynta ki briew.

Phi long ki briew jong U Blei; u la ieit bad jied ïa phi na ka bynta jong u hi. Kumta te, phi dei ban kup ïa lade da ka jingsngewsynei, ka jingbhasbun, ka jingsngewrit, ka jingjemnud, bad ka jingïaishah.

Ka khubor jong U Khrist ha ka jingdap pura jong ka baroh, ka dei ban im hapoh ki dohnud jong phi. To hikai bad kyntu iwei ïa iwei pat da ka jingstad baroh. To rwai ki salm, ki jingrwai, bad ki jingrwai bakyntang; to rwai sha U Blei da ka jingainguh ha ki dohnud jong phi. Nangta, ïa kaei kaei baroh kaba phi leh ne phi ong, dei ban leh ha ka kyrteng jong U Trai Jisu, ha kaba phi ainguh da u ïa U Blei uba U Kpa.

Bad nalor kine ki jinglong baroh, to bynrap ïa ka jingieit, kaba tehsong lang ïa kiei kiei baroh lang ha ka jingïatylli kaba janai.

Ïa phi la pynmihpat lem bad U Khrist, kumta pynbeit ïa ka dohnud jong phi ha kiei kiei kiba ha bneng, ha kaba U Khrist u shong ha la ka khet ha ka liang kamon jong U Blei.

Ka jingsuk kaba U Khrist u ai, ka long ban kdew lynti ïa phi ha ki rai kiba phi shim; naba dei ïa kane ka jingsuk ba U Blei u la khot lang ïa phi ha kawei ka met. Bad to long kiba sngewnguh.

Phi dei ban pynïap troiñ, te, ïa ki jingkwah brai ba kynja pyrthei kiba trei hapoh jong phi, kum ka jingawria, ka jingkhlem-akor, ka jingkwah brai, ki jingkwah basniew, bad ka jinglalot (naba ka jinglalot ka long kawei pat ka dur jong ka jingmane bleithaw).

Naba phi la ïap, bad ïa ka jingim jong phi la buhrieh lem bad U Khrist ha U Blei.

Hynrei mynta phi dei ban kiar noh na kine kiei kiei baroh: Ka jingbitar, ka jingkwah jakhlia, bad ki jingsngew kiba dap da ka jingisih. Ki jingkrenbeiñ lane ki jingkrensih kim dei da lei lei ban mih na ki rmiang shyntur jong phi.

Wat ïa-lamler iwei ïa iwei pat, naba phi la loit noh ïa ka jinglong barim lem bad ki jingmlien jong ka bad ba phi la kup ïa ka jinglong bathymmai. Une u long u jingthaw bathymmai uba U Blei, u Nongthaw jong u, u ïai pynthymmai ha ka dur jong u hi, khnang ban wallam ïa phi sha ka jingtip ba-pura shaphang jong u.

Ko ki shynrang, to ieit ïa la ki tnga bad wat long kiba leh khor ïa ki.

Ko ki khun, ka dei ka kamram ki bangeit ban ïai kohnguh ïa la ki kmie ki kpa, naba kata ka long kaei kaba pynsngewbha ïa U Blei.

Ko ki kynthei, to pynhapoh ïa lade ha ki tnga jong phi, naba kata ka long kaei kaba phi dei ban leh kum ki bangeit.