2 THESSALONI 3
3
Duwai na ka bynta jong ngi
1Ha kaba khatduh, ko parabangeit jong ngi, to duwai na ka bynta jong ngi ba ka khubor jong U Trai ka lah ban nang ïai pur stet, bad ba yn ïohpdiang ïa ka lem bad ka jingpyndonburom, kumba ka la long hapdeng jong phi. 2To duwai ruh ba U Blei un pyllait im ïa ngi na ki briew kiba bymman bad kiba sniew; naba ym uwei pa uwei baroh u ngeit ïa ka khubor.
3Hynrei U Trai u long uba ïaineh, bad un pynshaitbor ïa phi bad ri sumar ïa phi na Uta u Basniew. 4Bad U Trai u la ai ha ngi ka jingsngewskhem ha phi, bad ngi thikna ba phi leh bad phin ïai leh ïa kaei kaba ngi ong ïa phi.
5Ai ba U Trai un ïalam ïa phi sha ka jingshemphang ba kham khraw jong ka jingieit U Blei bad sha ka jingïaishah kaba la ai da U Khrist.
Ka jingkyntu ban trei minot
6Ko parabangeit jong ngi, ngi hukum ïa phi ha ka kyrteng jong U Jisu Khrist uba U Trai jong ngi ban kiar noh na ki bangeit baroh kiba im ka jingim bajaipdeh bad ki bym bud ïa ki jingbthah kiba ngi ai ha ki. 7Phi hi phi tip bha ba phi dei ban leh ïa kaei kaba ngi la leh. Ngim shym la long kiba jaipdeh mynba ngi la don bad phi. 8Ngim shym la pdiang ïa ka jingkyrshan jongno jongno khlem da siewdor ïa ka. Pynban, ngi la trei bad minot thop; ngi ïai trei mynsngi bad mynmiet khnang ban ym long ka jingbankhia ïano ïano na phi. 9Ngi la leh ïa kane, ym namar ba ngim don ka hok ban dawa jingkyrshan ïa ngi; ngi la leh ïa ka, ban long ka nuksa na ka bynta jong phi ban bud. 10Mynba ngi dang don bad phi, ngi ju ïathuh ïa phi, “Ïa uno uno uba kyntait ban trei yn ym shah ba un bam.”
11Ngi ong ïa kane, namar ngi ïohsngew ba don katto katne ngut ki briew hapdeng jong phi kiba im ka jingim bajaipdeh bad ki bym trei ei ei lait tang ban lushia ha ka kam jong kiwei pat ki briew. 12Ha ka kyrteng jong U Jisu Khrist uba U Trai, ngi hukum ïa kine ki briew bad maham ïa ki ban im ka jingim kaba beit bad ban kamai na ka bynta ban kyrshan ïa lade hi.
13Hynrei ma phi, ko ki parabangeit, to wat man thait ha kaba leh ïa kaba bha. 14Ka lah ban long ba yn don uno uno u ban ym kohnguh ïa ka khubor kaba ngi phah sha phi ha kane ka shithi. Lada ka long kumta, khmih ïa u bad wat ïadon bynta ei ei bad u, khnang ba un lehrain. 15Hynrei wat ñiew ïa u kum u nongshun; pynban, to maham ïa u kum u para.
Ki ktien pynkut
16To ai ba U Trai hi, uba long ka tyllong jong ka jingsuk jong ngi, un ai ha phi ka jingsuk ha ki por baroh bad ha ka jingim jong phi baroh. U Trai un long lem bad phi baroh.
17Da ki kti jong nga hi, nga thoh ïa kane: Ki jingkhublei na u Paul. Kane ka dei ka rukom ba nga soi ïa kawei pa kawei ka shithi; kane ka long kumno nga thoh.
18To ai ba ka jingaiei jong U Jisu Khrist uba U Trai jong ngi kan long lem bad phi baroh.
Currently Selected:
2 THESSALONI 3: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
