1 TIMOTHI 5
5
Ki jingkitkhlieh ïa kiba ngeit
1-2To wat sneng ïa uba la kham rangbah, hynrei to kyrpad ha u kum la u kpa. To ñiew ïa kiba kham samla kum la ki para, ïa ki kynthei kiba la kham ïaw kum ki kmie, bad ïa ki kynthei kiba kham samla kum ki para, da ka jingsngur mynsiem baroh.
3To burom ïa ki riewkynthei kiba long tang marwei da shisha. 4Hynrei lada ka riewkynthei ka don ki khun ne ki khun ksiew, ki dei ban nang shuwa nyngkong ban khmih ïa ki kam ba kynja mynsiem ka longïing la jong hi bad ha kane ka rukom ki siew kylliang ïa la ki kmie ki kpa bad ïa ki kmierad parad, namar kata ka long kaba pynsngewbha ïa U Blei. 5Ka riewkynthei kaba long tang marwei, ka bym don mano mano ban sumar ïa ka, ka la buh ïa la ka jingkyrmen ha U Blei bad ka ïai duwai bad pan na u ïa ka jingïarap mynmiet bad mynsngi. 6Hynrei ka riewkynthei kaba im ha ki jingsngewbha ka la lah ïap lypa, wat haba ka dang im. 7To ai ha ki ïa kine ki jinghikai, khnang ba yn ym don ba wad daw ïa ki. 8Hynrei lada uno uno um sumar ïa la ki ba-ha-ïing ha-sem, khamtam ïa ki dkhot ka longïing jong u hi, u la len ïa ka jingngeit bad u kham sniew ban ïa u bymngeit.
9To wat kynthup ïa kano kano ka riewkynthei ha ka thup ki riewkynthei lymda ka la dap hynriewphew snem ka rta. 10Nalor kata ka dei ban long kaba la shongkurim tang shisien bad donnam ha ki kam babha: Ka briew kaba la pynsan pynrangbah bha ïa la ki khun, kaba pdiang ïa ki nongwei ha ka ïing jong ka, kaba leh ïa ki kam rit na ka bynta ki parabangeit, kaba ïarap ïa ki briew kiba don ha ka jingjynjar, bad kaba aiti ïa lade ha kaba leh ïa kaba bha.
11-12Hynrei to wat kynthup ïa ki riewkynthei kiba dang kham samla ha ka thup; namar haba ki jingkwah ka doh jong ki ban shongkurim, ki phai noh na U Khrist, bad kumta ki don ka jingpynrem ba ki la pynkheiñ ïa ka jingtehkular bad u kaba mynshuwa. 13Ki nang ruh ban pynlehnoh-ei ïa la ka por ha kaba kyntiap na kawei ka ïing sha kawei pat; hynrei kaba kham sniew, ki nang ban ïa-lorni bad pynsyrwa ei ïa ka por, da kaba ki kren ïa kiei kiei kiba kim dei ban kren. 14Te ngan kham lah ba ki riewkynthei kiba dang kham samla kin shongkurim, kin don ki khun ki kti, bad sumar ïa la ki ïing, khnang ban ym ailad ïa ki nongshun jong ngi ban kren sniew ïa ngi. 15Naba don na ki riewkynthei kiba la lah phai noh ban bud ïa u Soitan. 16Hynrei lada kano kano ka parabangeit ka don ki riewkynthei ha ka longïing jong ka, ka dei ban sumar ïa ki bad ban ym bankhia ïa ka balang, khnang ba ka lah ban sumar ïa ki riewkynthei kiba long marwei. 17Ki nongsharai balang#5:17 nongsharai balang: Khmih 1 Tim. 4:14. kiba trei bha kum ki nongïalam ki dei hok ban ïohpdiang ar shah ïa ka jingsiew, khamtam kito kiba trei jur ha ka jingïalap bad jinghikai. 18#Deut. 25:4; Mat. 10:10; Luk. 10:7Naba ka jingthoh bakhuid ka ong, “Ym dei ban teh ïa ka shyntur u masi dab haba me pyndonkam ïa u ban shoh kew” bad “u nongtrei u dei ban ïoh ïa la ka bainong.” 19#Deut. 17:6; 19:15To wat pynshahshkor ïa ka jingmudui pyrshah ïa u nongsharai balang lymda la wanrah da ki ar ngut ne bun ngut ki sakhi. 20To sneng ha khmat kiba bun ïa kito baroh kiba leh ïa ki pop, khnang ba kita kiwei ruh kin sheptieng.
21Ha khmat jong U Blei bad jong U Khrist Jisu bad jong ki angel to kohnguh ïa kine ki jinghikai khlem jingujor lane khlem shah shiliang ïano ïano ha kano kano kaba me leh. 22To wat leh kyrkieh ha kaba buh ïa ki kti halor jongno jongno ban pynkyntang ïa u sha ka kam U Trai. To wat ïadon bynta ha ki pop jong kiwei; to ri ïa lade uba sngur.
23Wat dih tang ïa ka um, hynrei shim khyndiat ka waiñ ban ïarap ïa ka 'nierbah jong me, naba me long uba pang khah khah.
24Don ki briew kiba ki pop jong ki, ki long kiba paw tyngkreiñ, bad ki pop jong ki, ki leit ha shuwa jong ki sha ka jingbishar; hynrei ki pop jong kiwei pat ki paw kham hadien. 25Ha kajuh ka rukom ki kam babha ki paw shai kdar, bad wat ïa kito ki bym da paw shai ym lah ban buhrieh.
Currently Selected:
1 TIMOTHI 5: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
