1 TIMOTHI 6
6
1Kito kiba long ki mraw ki dei ban ñiew ba ki kynrad jong ki, ki long kiba dei hok ban ïoh ïa ka burom baroh, khnang ba yn ym don mano mano ki ban kren sniew ïa ka kyrteng U Blei bad ïa ka jinghikai jong ngi. 2Ki mraw kiba long ki jong ki kynrad kiba ngeit kim dei ban ñiewbeiñ ïa ki, naba ki long ki parabangeit jong ki. Pynban, ki dei ban shakri ïa ki kham bha shuh shuh, namar kito kiba ïoh myntoi na ka jingtrei jong ki, ki long ki parabangeit ïa kiba ki ieit.
Ka jinghikai lamler bad ki spah bashisha
Me dei ban hikai bad ïalap ïa kine kiei kiei. 3Uno uno uba hikai ïa ka jinghikai shongtynrai kaba pher bad um mynjur ïa ki ktien bashisha jong U Jisu Khrist uba U Trai jong ngi bad ïa ki jinghikai jong ka jingngeit jong ngi u long uba dap da ka jingsarong bad u bymtip ei ei. 4U don ka jingkwah kaba sniew ban ïoh ïasaidnia bad ïakajia shaphang ki ktien, bad kane ka wanrah ïa ka jingpihuiñ, ka jingïania, ka jingkrenbeiñ, ka jingsuba sniew, bad ka jingïai-ïasaidnia na ki briew kiba ki jingmut jong ki kim treikam bad ki bym don shuh ïa ka jingshisha. 5Ki pyrkhat ba ka niam ka long ka lynti ban riewspah.
6Shisha, ka niam kam pynriewspah palat ïa u briew, lada u sngewhun bad kaei kaba u don. 7Ngi wallam aïu sha ka pyrthei? Ym don ei ei! Ngi lah ban rah aïu pat na ka pyrthei? Ym don ei ei! 8Te namarkata, lada ngi don ka bam bad ka kup ka sem, kata kan dei ka la biang ïa ngi. 9Hynrei kito kiba kwah ban riewspah ki hap ha ka jingpynshoi bad ki ngat ha ka jingriam jong ki jingkwah ba-bieit bad ki jingkwah ba-pynmynsaw, kiba tan ïa ki sha ka jingjot bad ka jingpynjot. 10Naba ka jingieit ïa ka spah ka long ka thymmei jong ki jait jingsniew baroh. Don kiba da kwah eh ban ïoh ïa ka haduh ba ki la ïaid sakma na ka jingngeit bad ki pait dohnud na ki jingsngewsih babun.
Ka jingkyntu bashimet
11Hynrei ma me, ko u briew jong U Blei, to kiar na kine kiei kiei. To ïaleh tyngeh ïa ka hok, ka jingriewblei, ka jingngeit, ka jingieit, ka jingïaishah, bad ka jingjemnud. 12To men mareh ïa kata ka jingmareh thong jong ka jingngeit, bad ïoh ïa ka jingim bymjukut ïa lade; naba sha kane ka jingim U Blei u la khot ïa me mynba me la phla shai ïa ka jingngeit jong me ha khmat ki sakhi kiba bun. 13-14#Ïoan. 18:37Ha khmat U Blei, uba ai jingim ïa kiei kiei baroh, bad ha khmat U Khrist Jisu, uba phla shai ïa la ka jingngeit ha khmat u Pontios Pilat, nga hukum ïa me ba men kohnguh ïa la ki hukum bad ban sumar hok ïa ki haduh kata ka Sngi haba U Jisu Khrist uba U Trai jong ngi un paw. 15Ïa ka jingpynpaw jong u yn wallam da U Blei ha ka ïa kaba biang, uba la kyrkhu bad tang ma u hi, U Nongsynshar, U Syiem jong ki syiem bad U Trai jong ki trai. 16Dei tang ma u marwei u bymïap shuh; u shong ha ka jingshai ha kaba ym don uba lah ban leit sha jan jong u. Ym don uno uno uba la ju ïohi ïa u; ym don uno uno uba lah ban ïohi ïa u. Ha u, to long ka burom bad ka borbah bymjukut! Amen.
17To hukum ïa kita kiba riewspah ha kiei kiei jong kane ka jingim ba kin ym sngewsarong, hynrei ban buh ïa ka jingkyrmen jong ki, ym ha kata kaei kaei ka bym thikna kum ka spah, hynrei ha U Blei, uba ai kyrhai ïa kiei kiei baroh na ka bynta ka jingsngewbha jong ngi. 18To hukum ïa ki ba kin leh ïa kaba bha, ban man kyrhai ha ki kam babha, ban long kiba sbun bad kiba kloi ban ïasam bad kiwei. 19Ha kane ka rukom kin kynshew ïa lade ka spah ka ban long ka nongrim kaba skhem na ka bynta ka lawei. Bad nangta kin lah ban jop ïa ka jingim kaba long ka jingim kaba shisha.
20Ko Timothi, to ri kyndong ïa kata kaba la aiti ha me ban sumar. To kiar na ka jingkren thala bad ki jingïasaid nia bieit ïa kaei kaba katto katne ngut ki briew ki khot bakla “Ka Jingtip.” 21Don kiba kam ba ki don ïa ka, bad kaba mih ka long ba ki jah noh na ka lynti jong ka jingngeit.
Ka jingaiei jong U Blei to kan long bad phi baroh.
Currently Selected:
1 TIMOTHI 6: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
