1 THESSALONI 4

Ka jingim kaba pynsngewbha ïa U Blei

1Ha kaba wai noh, ko parabangeit jong ngi, phi la ïohnang na ngi kumno phi dei ban im khnang ban pynsngewbha ïa U Blei. Kane ka long da shisha, kumno phi la ju im. Bad mynta ngi kyrpad bad kyntu ïa phi ha ka kyrteng jong U Trai Jisu ban leh kham bha shuh shuh. 2Namar phi tip ïa ki jingbatai kiba ngi la ai ha phi da ka iktiar jong U Trai Jisu. 3U Blei u kwah ïa phi ban long kiba khuid bad kiba lait phar na ka jingjakhlia ka jingawria. 4Uwei pa uwei na phi ki shynrang u dei ban tip kumno ban ïashong ïasah bad la ka tnga ha ka rukom kaba khuid bad kaba donburom, 5ym ha ka jingkwah brai thala, kum kiba mane blei thala ki bymtip ïa U Blei. 6Ha kane ka rukom, te, uno uno u briew un ym dei ban leh bymdei ïa la u parabangeit lane shim kabu ïa u. Ngi la ïathuh ïa phi ïa kane mynshuwa, bad ngi maham jur ïa phi ba U Trai un pynshitom ïa kito kiba leh ïa kata. 7U Blei um shym la khot ïa ngi ban im ha ka jingthala, hynrei ha ka jinglongkhuid. 8Kumta te, uno uno uba kyntait ïa kane ka jinghikai, um kyntait ïa u briew, hynrei ïa U Blei, uba ai ha phi ïa U Mynsiem Bakhuid jong u.

9Ym da donkam ban thoh sha phi shaphang ka jingïa-ieit ïa ki parabangeit jong phi. Ma phi hi phi long kiba la ïoh hikai na U Blei kumno phi dei ban ieit iwei ïa iwei pat. 10Bad shisha phi la leh ïa kane ha ki parabangeit baroh ha Makedonia. Kumta ngi kyrpad ïa phi, ko parabangeit, ba phin nang leh shuh shuh. 11Pynlong ïa ka, ka jingthmu jong phi ban im ka jingim kaba jar jar, ban pyrkhat ïa la ka kam, ban kamai na ka bynta ka jingim jong phi hi, kumba ngi la bthah ïa phi mynshuwa. 12Ha kane ka rukom, phin ïoh ïa ka jingñiewkor jong kito ki bym pat ngeit, bad phim donkam ban shaniah hano hano na ka bynta kaei kaba phi donkam.

Ka jingwan U Trai

13Ko parabangeit, ngi kwah ïa phi ban tip ïa ka jingshisha shaphang kito kiba la ïap, khnang ba phin ym sngewsih, kumba long kito ki bym don ka jingkyrmen. 14Ngi ngeit ba U Jisu u la ïap bad u la mihpat, bad kumta ngi ngeit ba U Blei un shim pat bad U Jisu ïa kito kiba la ïap da kaba ngeit ha u.

15 # 1 Kor. 15:51,52 Kaei kaba ngi hikai ïa phi mynta ka long ka jinghikai jong U Trai: Ma ngi kiba dang im ha ka sngi ba U Trai u wan, ngin ym leit ha shuwa jong kito kiba la ïap. 16Kan don ka jingpyrta da ka hukum, ka sur jong u angel rangbah, ka jingriew ka turoi jong U Blei, bad U Trai hi da lade un sa wan hiar na bneng. Kito kiba la ïap da kaba ngeit ha U Khrist kin ïamih pat shuwa; 17nangta ïa ngi kiba dang im ha kata ka por yn lumlang lem bad ki ha ki ha ki lyoh ban ïashem ïa U Trai ha suiñ. Bad kumta ngin ïailong borabor bad U Trai. 18Kumta te, to pynshlur iwei ïa iwei pat da kine ki ktien.

Currently Selected:

1 THESSALONI 4: KHACLBSI

Highlight

Copy