1 THESSALONI 5
5
To long kiba la pynkhreh ïa ka jingwan jong U Trai
1Ym donkam ban thoh ha phi, ko parabangeit, shaphang ki por bad ki khep haba kine kiei kiei kin jia. 2#Mat. 24:43; Luk. 12:39; 2 Pet. 3:10Naba phi hi da lade phi tip bha ba ka Sngi jong U Trai kan wan kum u nongtuh mynmiet. 3Haba ki briew ki ong, “Kaei kaei baroh ka jar jar bad ka shngain,” te kynsan ka jingpynjot kan lynshop ïa ki! Kan wan kyndit kum ki jingpang kiba wan ha ka briew kaba suh kha, bad ki briew kin ym lait phet. 4Hynrei ma phi, ko parabangeit, phim long ha ka jingdum, bad ba ka Sngi kan lap kyndit ïa phi kum u nongtuh. 5Baroh na phi, phi long ki briew jong ka jingshai, kiba long ki jong ka sngi. Ngim dei ki jong ka miet lane jong ka jingdum. 6Kumta te, ngim dei ban ïohthiah kum kiwei pat; ngi dei ban peitmat bad pyngngad. 7Ka long ha ka por miet ba ki briew ki thiah; ka dei ha ka por miet ba ki buaid. 8#Isa. 59:17; Eph. 6:13-17Hynrei ngi dei ki jong ka sngi, bad ngi dei ban pyngngad. Ngi dei ban kup ïa ka jingngeit bad ïa ka jingieit kum ka jingda shadem, bad ka jingkyrmen jong ngi ïa ka jingpynim kum ka jingda khlieh. 9U Blei um shym jied ïa ngi ban shah ïa ka jingbitar jong u, hynrei ban ïoh ïa ka jingpynim lyngba U Jisu Khrist uba U Trai jong ngi, 10uba la ïap na ka bynta jong ngi khnang ba ngi lah ban ïa-im lem bad u, la ngi im lane ngi ïap haba u wan. 11Bad kumta to pyntngen iwei ïa iwei pat bad to ïarap iwei ïa iwei pat, kumba phi leh mynta.
Ki jingkyntu khatduh bad ki jingkhublei
12Ngi kyrpad ïa phi, ko parabangeit jong ngi, ban ai ka burom kaba dei biang ïa kito kiba la trei hapdeng jong phi, kiba la ïalam bad hikai ïa phi ha ka jingim kum kiba ngeit. 13To ñiewburom shikatdei eh ïa ki bad to ieit ïa ki namar ka kam kaba ki trei. To phin ïalong kiba ïasuk para ma phi.
14Ngi kyntu ïa phi, ko parabangeit jong ngi, ban maham ïa kiba jaipdeh, ban pynshlur ïa kiba khawpud, ban ïarap ïa kiba tlot, ban ïaishah ïa baroh. 15Khmih ba uno uno un ym siew kylliang ïa kaba sniew da kaba sniew, hynrei ha ki por baroh to kut jingmut ban lehbha iwei ïa iwei pat bad ïa ki briew baroh.
16To long kiba kmen borabor, 17duwai ha ki por baroh, 18to long kiba sngewnguh ha kiei kiei baroh. Kane ka long kaei kaba U Blei u kwah na phi ha ka jingim jong phi ha U Khrist Jisu.
19Wat khang ïa U Mynsiem Bakhuid; 20wat ñiewbeiñ ïa ki khubor ba la pyrsad mynsiem. 21Da tynjuh ïa kiei kiei baroh: Bat ïa kaei kaba bha 22bad kiar na kano kano kaba sniew.
23To U Blei uba ai ha ngi ka jingsuk un pynlong ïa phi kiba khuid ha ki liang baroh bad un sumar ïa ka longrynïeng jong phi — ka mynsiem, ka jingim, bad ka met — kaba lait na kano kano ka jingbakla ha ka jingwan jong U Jisu Khrist uba U Trai jong ngi. 24Uta uba khot ïa phi un leh ïa kata, namar u long uba ïaineh.
25Ko parabangeit, to duwai lem na ka bynta jong ngi.
26To ïakhublei parabangeit da ka jingdoh parabangeit.
27Nga kyrpad ïa phi da ka iktiar jong U Trai ban pule ïa kane ka shithi ha ki parabangeit baroh.
28Ka jingaiei ka jong U Jisu Khrist uba U Trai jong ngi kan long lem bad phi. Amen.
Currently Selected:
1 THESSALONI 5: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
