1 THESSALONI 3
3
1 #
Ki Kam. 17:15
Ha kaba kut ngim lah shah shuh. Kumta ngi la rai ban sah tang ma ngi ha Athens 2bad ngi la phah ïa u Timothi, u parabangeit jong ngi uba ïatrei lem bad ngi na ka bynta U Blei ha kaba ïalap ïa ka Khubor Babha shaphang U Khrist. Ngi la phah ïa u ban pynkhlaiñ ïa phi bad ïarap ïa ka jingngeit jong phi, 3khnang ba yn ym don mano mano na phi ban phai dien noh namar kine ki jingpynshitom beiñ. Phi hi phi ïatip ba kiba kum kine ki jingpynshitom beiñ ki long ka bynta jong ka mon U Blei na ka bynta jong ngi. 4Naba mynba ngi dang ïadon lem bad phi, ngi la ïathuh shuwa ba ngin sa shah pynshitom beiñ; bad kumba phi tip kham bha, dei kata hi keiñ ka long kaei kaba la jia thik. 5Dei kata keiñ balei ba nga la phah ïa u Timothi. Ngam lah shah shuh, kumta nga la phah ïa u ban tip shaphang ka jingngeit jong phi. Da shisha kam lah ban long ba u Ksuid u la pynshoi ïa phi bad ba ka kam jong ngi baroh ka la long kaba lehnoh-ei!
6 #
Ki Kam. 18:5
Mynta u Timothi u la wan phai pat bad u la wanrah sha ngi ïa ka khubor kaba sngewkmen shaphang ka jingngeit bad ka jingieit jong phi. U la ïathuh ïa ngi ba phi ïai pyrkhat bha ïa ngi borabor bad ba phi kwah hir hir ban ïohi ïa ngi kumba ma ngi ruh, ngi kwah ban ïohi ïa phi. 7Kumta, ha ki jingjynjar bad jingshahshitom jong ngi baroh, la pynshlur ïa ngi da ma phi, ko parabangeit. Ka dei ka jingngeit jong phi kaba la pynshlur ïa ngi, 8namar mynta ngi im shisha lada phi ïeng skhem ha ka jingim jong phi ha U Trai. 9Mynta ngi lah ban ainguh ïa U Blei jong ngi na ka bynta jong phi. Ngi ainguh ïa u na ka bynta ka jingkmen kaba ngi don ha ka jingdon ryngkat jong u namar jong phi. 10Mynsngi bad mynmiet ngi kyrpad ïa u da ka dohnud jong ngi baroh ban shah ïa ngi ban ïohi ïa phi markhmat bad ban pyndap ïa kaei kaba donkam ha ka jingngeit jong phi.
11To U Blei hi uba U Kpa jong ngi da lade hi bad U Jisu Khrist uba U Trai jong ngi un plie ka lynti na ka bynta jong ngi ban wan sha phi! 12To U Trai un pynlong ïa ka jingieit jong phi iwei ïa iwei pat bad ïa ki briew baroh ban nang ïai san bad ban man khraw ha ka jingieit jong ngi ïa phi. 13Ha kane ka rukom un pynkhlaiñ ïa phi, bad phin long kiba janai bad kiba khuid ha ka jingdon ryngkat jong U Blei bad U Kpa jong ngi haba U Jisu uba U Trai jong ngi u wan lem bad baroh kiba dei ki jong u.
Currently Selected:
1 THESSALONI 3: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
