1 THESSALONI 2
2
Ka jingtrei u Paul ha Thessaloni
1Ko parabangeit jong ngi, phi hi phi tip ba ka jingwan jngoh jong ngi ïa phi kam shym la long kaba sep-ei. 2#Ki Kam. 16:19-24; Ki Kam. 17:1-9Phi tip kumno ba ngi la shah lehbeiñ bad shah krenbeiñ ha Philippi shuwa ba ngin wan sha phi ha Thessaloni. Bad wat la ka la don ka jingpyrshah kaba jur, U Blei jong ngi u la ai ha ngi ka jingshlur ban ïathuh ha phi ïa ka Khubor Babha kaba wan na u. 3Ka jingkyrpad jong ngi ïa phi kam dei kaba pynshong nongrim ha ka jingbakla lane ha ki jingthmu bymkhuid, lymne ba ngi pyrshang ban shukor ïano ïano. 4Pynban, ngi kren borabor kumba U Blei u kwah ïa ngi kumta, namar u la ñiew ïa ngi kiba bit ban shaniah ïa ka Khubor Babha. Ngim shym pyrshang ban pynsngewbha ïa ki briew, hynrei, ban pynsngewbha ïa U Blei, uba tynjuh ïa ki jingthmu jong ngi. 5Phi tip bha ba ngim shym la wan ha phi da ki jingkren jali ja-um, lymne ba ngi la pyndonkam ïa ki kyntien ban da 'rap-jot ïa ka jinglalot — U Blei u long u sakhi ïa ngi! 6Ngim shym pyrshang ban ïoh jingïaroh nano nano, la ka long na phi lane na kiwei, 7wat la kum ki apostol jong U Khrist ngi lah ban dawa na phi. Hynrei ngi la long kiba jai jai mynba ngi la don bad phi, kumba ka kmie ka sumar ïa ki khun jong ka. 8Namar ka jingieit jong ngi ïa phi, ngi la long kiba la kloi ban ïabynta bad phi ym tang ïa ka Khubor Babha na U Blei hynrei wat ïa ka jingim jong ngi ruh. Phi la long kiba ieit thep mynsiem eh jong ngi! 9Da shisha phi kynmaw, ko parabangeit jong ngi, kumno ba ngi la minot bad trei shitom! Ngi la trei mynsngi bad mynmiet khnang ba ngin ym bankhia ïa phi haba ngi la ïalap ha phi ïa ka Khubor Babha na U Blei.
10Phi long ki sakhi jong ngi, bad kumta U Blei ruh, ba ka jingleh jong ngi ïa phi kiba ngeit ka long kaba sngur, kaba dei bad kaba khlem jingbakla. 11Phi tip ba ngi leh ïa uwei pa uwei na phi kumba u kpa u leh ïa ki khun jong u hi. 12Ngi la pynshlur ïa phi, ngi la pyntngen ïa phi, bad ngi ïai kyrpad ïa phi ban im ka jingim kaba pynsngewbha ïa U Blei, uba khot ïa phi ban ïa-ïoh bynta lem ha ka Hima bad ka burom jong u hi.
13Bad don sa kawei pat ka daw balei ba ngi ainguh borabor ïa U Blei. Haba ngi la wallam ha phi ïa ka khubor jong U Blei, phi la ïohsngew bad pdiang ïa ka, ym kum ka khubor na ki briew hynrei kum ka khubor jong U Blei, kaba long shisha kumta. Naba U Blei u trei ha phi kiba ngeit. 14#Ki Kam. 17:5Ko parabangeit jong ngi, kijuh kiei kiei kiba la jia ha phi ki la jia ha ki balang jong U Blei ha Judia, ha ki briew hangta kiba long ki jong U Khrist Jisu. Phi la shah ïa kijuh ki jingpynshitom beiñ na ki briew ki para ri jong phi hi kiba ki la shahshitom na ki Jiw, 15#Ki Kam. 9:23,29; 13:45,50; 14:2,5,19; 17:5,13; 18:12kiba la pynïap ïa U Trai Jisu bad ïa ki nongïathuhlypa, bad ki la pynshitom beiñ ïa ngi. A kumno ki la long ki bym pynsngewbha ïa U Blei! A kumno ki la long kiba shun iwei ïa iwei! 16Ki la pyrshang wat ban pynsangeh ïa ngi na kaba ïalap ha ki Jentil ïa ka khubor ka ban wallam ka jingpynim ha ki. Ha kane ka rukom ki la pyndep ïa baroh ki pop kiba ki la ju ïai leh. Bad mynta ka jingbitar jong U Blei ha kaba kut ka la wan hiar halor jong ki!
Ka jingangnud jong u Paul ban leit jngoh pat ïa ki
17Te ma ngi, ko parabangeit, haba ïa ngi la pynïakhlad na phi shipor — ym ha ki jingpyrkhat jong ngi, shisha, hynrei tang ha ka met — kumno ba ngi la sngewkynjah khlem ma phi bad katno ngi la pyrshang jur ban ïohi pat ïa phi! 18Ngi la kwah ban wan phai pat sha phi. Nga hi nga la pyrshang ban leit phai pat palat ïa ka shisien, hynrei u Soitan um ailad ïa ngi. 19Nalor baroh, dei ma phi — ma phi keiñ, khlem duna ïa kiwei pat! — kiba long ka jingkyrmen jong ngi, ka jingkmen jong ngi, bad ka daw jong ngi ban sngewsarong ïa ka jingjop jong ngi ha khmat jong U Jisu uba U Trai jong ngi haba u wan. 20Da shisha, phi long ka jingsarong bad ka jingkmen jong ngi!
Currently Selected:
1 THESSALONI 2: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
