LUKA 11
11
Isûn ṭawngṭai dân ân chûktirna
(Mt 6.9-15; 7.7-11)
1Chun, Isu khâwlai hmuna manih a ṭawngṭai a, a ṭawng- ṭai zo chun a închûktir mi pakhatin a kuomah, “Lalpa, ṭawngṭai dân Johanin a închûktirhai ân chûktir ang khan mîn chûktir ve ta la,” a ta.
2Chun, ama chun an kuomah, “In ṭawngṭai chun hieng ang hin ti ro,
‘Kan Pa,
I hming inzaum raw se.
I ram hung tlung raw se,
3Ni tin kan fâk khawpin bu mi pe la,
4Kan suolhai mi ngaidam la,
Keini khawmin kan chunga thil suksuoltuhai kan ngaidam hlak angin.
Thlêmnaa chun mi ṭhuoi lût naw rawh,’ tiin,” a ta.
5Chun, ama bawkin an kuomah, “Nangni laia tûin amanih ruol nei sienla, zânrilah a kuomah fein, ‘Ruola, beiphêk pathum mîn pûktir rawh;
6ka ruolpa inzinin a mi hung sir a, ama infâktir ding iengkhawm ka nei si nawh,’ ti sienla,
7in sûnga mîn, ‘Mi sukbuoi naw, tuhin chu kawt khâr a ni ta a, ka nauhai khawm ka kuomah khumah an zâl ta a, thoin ka va pêk thei naw che,’ tiin dawn sienla.
8Ka ti cheu hi, a ruolpa a ni leiin thoin a va pêk nawa chu, a hni tlut tlut leiin, a dit zât zât va pêng a tih.
9“Chuongchun, ka ti cheu hi, hni ro, chuongchun, pêkin um in tih; zawng ro, chuongchun, hmûng in tih; nawk ro, chuongchun, hawngpêkin um in tih.
10Tûkhawm a hni taphawt chun an hmu hlak; tûkhawm a zawng chun an hmu hlak, tûkhawm a nawk chu hawngpêk ning an tih.
11Nangni laia pa hi, a naupain beiphêk hni sienla, tûin am lung pêng a ta? anleh, nga hni sienla, tûin am nga aiah rûl pêng a ta?
12Anleh, ârtui hni sienla, ainuvêt a pêk ding am a nih?
13Chuongchun, nangni mi suol hmanin in nauhai thil ṭha pêk nachâng in hriet chun, in Pa vâna mi chun a hnituhai chu Thlarau Inthieng a va pêk âwm ngei de e!” a ta.
Isu le Beelzebub
(Mt 12.22-30; Mk 3.19-27)
14Chun, Isûn khawhri ṭawngtheinaw pakhat a hnawt dawk a. Chun, khawhri chu a suok phingleh ṭawngtheinaw chu a ṭawng ta a; chuongchun, mipuihaiin mak an ti hle a.
15 #
Mt 9.34; 10.25; 12.36; 16.1; Mk 8.11 Nisienlakhawm, a ṭhen chun, “Khawhri lal Beelzebub leiin annâwm khawhrihai a hnawt dawk hlak chu,” an ta.
16Chun, a ṭhenin ama fiena dingin vâna inthawkin inchikna an hni a.
17Ama ruok chun, an ngaituohai chu a lo hriet a, an kuomah, “Khâwlai ram khawm mâni le mâni indo taphawt chu an bohmang hlak; sûng khat khawm mâni le mâni indo chu an bohmang hlak.
18Setan khawm ama le ama ân do chun, a ram iengtin am ngîr suok a ta?
19Chun, kei Beelzebub#Ziek ṭhenah “Beelzebul” leia khawhrihai hnawt dawk hlak ka lo ni chun, in nauhaiin tû leiin am an hnawt dawk hlak a le? Chuleiin, anni chu nangni ngaituotu dinghai nîng an tih.
20Amiruokchu, kei Pathien kut pâr leia khawhrihai hnawt dawk hlak ka ni chun, Pathien ram in kuomah a hung tlung tah nîng a tih.
21“Mi hrât chun hriem famkim chawia a in a vêng sûng po, a sum chu himtakin a um zing hlak;
22nisienlakhawm, ama nêka hrât lemin a hung thaw a, a hne pha chun, ân ringna râlthuom famkim chu a lâkpêk a, a râllâk thil chu a sem dar hlak.
23 #
Mk 9.40
Tûkhawm, keia tienga ṭhang naw chu a mi do a nih; tûkhawm a mi lâk khâwmpui naw chun, a the dar a nih.
Khawhri inthieng naw hung kîr nâwk thu
(Mt 12.43-45)
24“Khawhri inthieng naw chu mi sûnga inthawka a suokin, châwlna zawngin tui um nawna hmunahai ân vâk a. Châwlna hrim hrim a hmu naw a, ‘Ka suokna ina khan kîr nâwk el ka tih,’ a ta,
25chun, a va tlung chun phît faia cheimawiin a va hmu a.
26Chu phingleh a fe a, ama nêka suol lem khawhri dang pasari a hung ṭhuoi a, chutaka chun an lût a, an um zing hlak a; chu mihriem umzie nuhnung chu a hmasa nêkin a hung ṭha naw lem hlak a nih,” a ta.
Hamṭhatna indik chu
27Chun, chuong thu chu a hril laiin, mipui laia nuhmei pakhat a khêk suok a, a kuomah, “Nangma vawnna phîng chu a hamṭha ie, i nêne nêk khawm,” a ta.
28Ama ruok chun, “Anih, nisienlakhawm, Pathien thu hrea zâwmhai hi mi hamṭha an ni lem,” a ta.
Ruolthar suoltakhaiin inchikna an zawng
(Mt 12.38-42; Mk 8.12)
29 #
Mt 16.14; Mk 8.12 Chun, mipuihai chu a kuoma an hung inkhâwm laiin Isûn, “Tulai ruoltharhai hi ruolthar suoltak an nih; inchikna an zawng a; nisienlakhawm, Jona inchikna chau naw chu an kuomah inchikna hrim hrim pêk ni naw ni.
30 #
Jn 3.4
Jona chu Ninevi khuoa mihai ta dinga inchikna a lo ni ang khan, Mihriem Naupa khawm tulai ruoltharhai ta ding hin inchikna la nîng a tih.
31“Simtieng lalnu kha ngaituo pha chun tulai ruoltharhai kuoma hin tho vêng a ta, thiemnaw inchangtir a tih; Solomon var ngai ding hmanin kâwlkawdawnga inthawkin a hung si a; ngai ta u, Solomon nêka ropui lem hitaka hin a um.
32 #
1 Lal 10.1-10; 2 Chr 9.1-12; Jn 3.5 “Ninevi khuoa mihai chu ngaituo pha chun tulai ruoltharhai lai hin ngîr vêng an ta, thiemnaw inchangtir an tih, Jona thu hril leiin an sim si a; ngai ta u, Jona nêka ropui lem hitaka hin a um annâwm.
Taksa khâwnvar chu
(Mt 5.15; 6.22-23)
33 #
Mt 5.15; Mk 4.21; Lk 8.16 “Tukhawmin khâwnvar an sitin in hnuoi kilah an sie ngai nawh, leikhâwr hnuoiah an sie ngai bawk nawh, mi lûthai chun a var an hmu theina dingin a sienaa chun an sie lem hlak a nih.
34“I taksa khâwnvar chu i mit a nih, i mit a var chun i taksa khawm apumin a var suok hlak; a se ruok chun i taksa khawm ân thim zo vawng hlak.
35Chuongchun, i sûnga var um chu inthim a lo ni el râwm, fîmkhur rawh.
36Chuongchun, i taksa hi khâwlai khawm inthim lova a puma a var suok chun, khâwnvar var nasatakin a el che angin var suok a tih,” a ta.
Isûn Pharisaihai le Dân inchûktirtuhai a halna
(Mt 23.1-36; Mk 12.38-40; Lk 20.45-47)
37Chun, a hril laiin, Pharisai pakhatin ama chu a kuoma bu fa dingin a fiel a; chuongchun, a lût a, buthlêng chu a awt a.
38Chun, Pharisai chun bu fâk hmaa a kut a sâwp naw chu a hmuin mak a ti hle a.
39Chun, Lalpa chun a kuomah, “Nangni Pharisaihaiin no le thlêng puo tieng chu in sâwp fai hlak luo a; in sûng tieng ruok chu hlêprûkna le suolin a sip si a.
40Mi invêthai, a puo tieng siemtu chun a sûng tieng khawm a siem naw am a nih?
41Nisienlakhawm, a sûnga thil um chu mi rimsihai kuoma pêk dingin hmang ro; chuongchun, ngai ro, in ta dingin iengkim ân thieng tah a nih.
42 #
Lev 27.30
“Nangni Pharisaihai, in chung a rik ie! Pudina dâm, pardi dâm, thlai tinrêng dâm sâwma pakhat in pêk hlak a, felna le Pathien hmangaina chu in ngaitha hlak si a. Nisienlakhawm, chuong chu a nih in sawnnaw in thaw ding chu, a danghai chu thaw ṭhul chuong lovin.
43Nangni Pharisaihai in chung a rik ie! Inkhâwmna ina ṭhungpha ṭhatak le dâwrhmuna chibai bûkhai in ngaina si hlak a.
44In chung a rik ie! Thlân ti inhriet lo, a chunga hre lova mi an fe hlakna ang chu in nih,” a ta.
45Chun, Dânhretu pakhatin a kuomah, “Inchûktirtu, hieng thu i hril hi keini khawm mi hal i ni hi,” a ta, a dawn a.
46Ama chun, “Dân hretuhai, nangni khawm in chung a rik ie! Thil phur rinumtakhai mihai in bel hlak a, nangni chun phurhai chu in kutpâr pakhat khawmin in them ngai si nawh.
47In chung a rik ie! Zâwlneihai thlân inhai in bâwl hlak a, in thlatuhai ithat an ni si a.
48Chuongchun, in thlatuhai thilthawhai chu in hrietpuiin in remtipui a nih; annîn an that a, nangnîn an thlân inhai in bâwl si a.
49Chuleiin, Pathien varna khawm- in, ‘An kuomah zâwlneihai le tirkohai tir ka ta, a ṭhen that an ta, a ṭhen suknawmnâng an tih;
50zâwlnei po po thisen, leilung insieng tîra inthawka kha tulai ruoltharhai chunga phuba lâk a ni theina dingin.
51 #
Gen 4.8; 2 Chr 24.20-21 Abel thisen suoka inthawk, Zakaria maichâm le biekin inkâra thi, thisen suok chena mi kha.’ Anih, ka hril cheu hi, tulai ruoltharhai chunga hin phuba lâng an tih.
52Nangni Dân hretuhai, in chung a rik ie! Varna chabi chu in fe hmangpui a; nangni hlak in lût nuom si naw a, mi lût ding hlak in khap si a,” a ta.
53Chun, chutaka inthawka a suok chun, Dân inchûktirtuhai le Pharisaihai chun an tai ta rân a, thu tinrêng an inhriltir a;
54a ṭawng suol hlaua man tumin an inchân zing a.
Currently Selected:
LUKA 11: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
