LUKA 12
12
Vervêknaa inthawka fimkhur dinga infuina
(Mt 10.26-27)
1Chu sûnga mipui sâng tamtak insir nuk nuk khawp hiel an hung inkhâwm chun, Isûn a hmasatakin a închûktirhai kuomah, “Pharisaihai chawl, vervêknaa inthawk chun fîmkhur ro.
2 #
Mt 16.6; 4.22; Mk 8.15; Lk 8.17 Inlang lo dinga thuphmang iengkhawm a um si nawh; hriet lo dinga ip iengkhawm a um bawk nawh.
3Chuleiin, inthima in hril taphawt kha varah la hrieng an tih; pindan sûngrila, na bula in thu hril kha in chunga chuongin la khêkpui an tih.
Ṭi ding tak chu
(Mt 10.28-31)
4Chun, ka ruolhai, ka hril cheu hi, taksa sukhluma, chu hnunga iengkhawm thaw nâwk thei ta nawhai chu ṭi naw ro.
5Amiruokchu, tû am in ṭi ding hril lâwk ka ti cheu; a sukhlum hnung khawma Hremhmuna pei theina thuneitu chu ṭi ro; anih, ka hril cheu hi, ama mawl chu ṭi ro.
6Chawngzawng panga dâr tangka pahniin an zawr hlak a ni naw am a nih? nisienlakhawm, anni laia pakhat khawm Pathienin ân hmai ngai si nawh.
7In samzai chen hin tiem vawng a nih in sawnnaw. Ṭi naw ro; chawngzawng tamtak nêk chun in hlu lem a nih.
Mihai hmaah Isu ṭan ding a nih
(Mt 10.32-33; 12.32; 10.19-20)
8“Chun, ka hril cheu hi, mihai hmaa a mi ṭan taphawt chu Pathien vântirkohai hmaah Mihriem Naupa hin ṭan vêng a tih.
9Nisienlakhawm, mihai hmaa mîn phat chu Pathien vântirkohai hmaah inphat ni vêng a tih.
10 #
Mt 12.32; Mk 10.38 Chun, Mihriem Naupa sawisêl chu a sawisêlna chu ngaidam nîng a tih; Thlarau Inthieng meu hrilse ruok chu a hrilsietna chu ngaidam ni naw nih.
11 #
Mt 10.19-20; Mk 13.11; Lk 21.14-15 “Chun, inkhâwmna ina mihai, lalhai, hotuhai hmaa an ṭhuoi pha cheu chun, ‘Iengtin am, ieng thuin am dawn ka ta, ieng thu am hril ka ta,’ tiin lungkham naw ro,
12chu pha taka chun, ieng am in hril ding ti Thlarau Inthieng chun hril a ti cheu,” a ta.
Mi hausa invêt tekhithu
13Mipui laia mi tuin amanih Isu kuomah, “Inchûktirtu, ka u kuomah ro mi sem ve dingin hril rawh,” a ta.
14Nisienlakhawm, ama chun a kuomah, “Mihriem, nangni chungah tûin am rorêltu le, sum semtuah a mi siem a?” a ta.
15Chun, an kuomah, “Fimkhur unla, inhnarna hrim hrima inthawk chun invêng ro, sum hau hi mihriem dam san a ni nawh,” a ta.
16Chun, an kuomah tekhithu a hril a, “Mi hausa tû amanih a lohma a hung hlâwk bêk bêk a.
17Chuongchun, ân ngaituo a, ‘Iengtin am thâwng ka ti aw? ka bu le bâl sie khâwmna ka nei si naw a,’ a ta.
18Chun, ‘Hieng hin thâwng ka tih; ka bu inhai ṭhiek ka ta, a nêka lienin bâwl ka tih; chutaka chun ka bu le ka sum po po sie khâwm ka tih.
19Chun, ka thlarau kuomah, Thlarau, kum tamtak sûnga dingin sum tamtak în khâwl hi; châwl la, fain dâwn rawh, tîng ka tih,’ a ta.
20Nisienlakhawm, Pathienin a kuomah, ‘Invêt, vawizân hin i thlarau an hni ding che a nih; i thil suksuokhai kha tû ta am ni tâng a ta le?’ ” a ta.
21“Mâni ta dinga sum inkhâwl a, Pathien tienga hau si naw chu, chuong ang chu a ni hlak,” a ta.
Lungkhamna chung thua kâwkna
(Mt 6.25-34)
22Chun, a inchûktirhai kuomah, “Chuleiin, ka hril cheu hi, ‘Ieng am fâng ka ta aw?’ tiin in hringna thu le, ‘Ieng am silin bil ka ta aw?’ tiin in taksa thu lungkham naw ro.
23Fâk ding nêkin hringna a thupui lem a nih, silfên nêk khawmin taksa a thupui lem a nih.
24Vaâkhai hi ngaituo ro, bu an tu ngai nawh, an sîk ngai nawh, bupanghai, bu inhai khawm an nei nawh; nisienlakhawm, Pathienin a châwm si a; nangni chu vatehai nêk chun in hlut lemzie chu.
25Chun, nangni lai lungkham leiin tûin am mâni dung#Dung” ti hi Grika chun “kum” tina khawm a ni thei tieng tawng khata suksâng chuong thei um cheu?
26Hi el khawm hi thaw thei lo cheu a, iengdinga thil dang in lungkham am a na?
27 #
1 Lal 10.4-7; 2 Chr 9.3-6 “Tûktinpâr inṭhangzie hi ngaituo ro; sin an thaw nawh, pat khawm an kher ngai nawh; nisienlakhawm, ka hril cheu hi, Solomon meu khawm a ropuina po poa ân thuom khan, hieng tûktinpâr pakhat tluk khawm hin cheiin a um nawh.
28Chuongchun, ram sâwlhna vawisûn anga hring, a zînga thuka ti nâwk el ding hman, Pathienin chuong ang lâwma a chei chun, aw, nangni ringna tlâwmhai, chuonghai nêk chun silfên a va pêk âwm cheu de e!
29“Chun, in fâk dinghai, in dâwn dinghai zawng naw ro; lungâwpinkaiin um bawk naw ro.
30Khawvêla hnam po poin chuong po po chu an zawng hlak, chuong chu in mamaw ti in Pa vâna miin a hriet zing si a.
31Ama ram zawng lem ro, chuongchun, chuong thil khawm chu a pêk sa ding cheu a nih.
Vâna ro
(Mt 6.19-21)
32“Pâwl tlâwmhai, ṭi naw ro; ram pêk cheu hi in Pa lâwm zâwng tak a nih.
33In nei taphawt chu zawr unla, pasiehai kuomah pe ro; vânah rukru fe nawnaah, hângthim fâk siet nawnaa chun, tangka ip hlui thei nawhai, ro inhmang thei nawhai, inkhâwl ro.
34In ro umna taphawtah in lungril khawm a um ding a ni si a.
Suok inring zinga umhai
35“Dier kei zingin, in khâwnvar khawm chawk zingin um ro;
36 #
Mt 25.1-13; Mk 13.34-36 miin an pu, inneina ruoiṭhe fa a hung phaa kawtkhâr a hung nawk phaa lo hawngpêk thei nghâl dinga an lo nghâk zing ang hin um ro.
37An pu a hung phaa suok lo nghâk zinga a hmu dinghai chu an hamṭha. Titakzetin ka hril cheu hi, ama chun a dier hung kei a ta, anni chu thlaithlêng awtin inṭhungtir a ta, an rawng hung bâwlpêk a tih.
38Zân rila manih, tho phain amanih a hung a, chuong anga a hung hmu chun, chuong suokhai chu hamṭhâng an tih.
39Amiruokchu, hi hi hre ro, inru a hung ding hun in neitu chun hre sienla, vêng a ta, a in inverpawptir naw ni.
40 #
Mt 24.43-44
Nangni khawm inring zingin um ro, in ring naw hunah Mihriem Naupa chu a hung ding a ni si a,” a ta.
Suok ringum le ringum naw
(Mt 24.45-51)
41Chun, Peterin a kuomah, “Lalpa, hi tekhithu hi keini chau am a nih i mi hril, mi po po?” a ta.
42Chun, Lalpain, “Sum enkawltu ringum, var tak, a puin a hun poa an bu chan ding sempêk dingin a sûnghai chunga hotua a siem ding chu tû tak am nîng a ta?
43A pu a hung phaleh suok chuong anga thawa a hung hmu ding chu a hamṭha.
44Indiktakin ka hril cheu hi, a nei po po chunga hotuah siem a tih.
45Amiruokchu, chu suok chun, a lungrilin ‘Ka pu hung vak naw ni,’ tiin suoknuhai, suokpahai lo vaw sienla, fain dâwnin lo inrui ta sienla;
46chu suok pu chu a ring naw niah, a hriet naw kâr hung a ta, bawng hni hung insuong a ta, mi ringum nawhai chan ang hung inchangtir a tih.
47Suok a pu dit zâwng hre zing sia, lo inring lova, a pu dit zâwng ang khawma thaw lo chu, vawi tamtak vuong an tih.
48Amiruokchu, hriet naw leia vuokna khawp thil thaw chu, vawi tlâwmtê vuong an tih. Tûkhawm tamtak an ipêk kuoma chun tamtak phût an tih; tûkhawm tamtak an inkawltir kuoma chun tam deu phût an tih.
Isu, inrem nawna inumtirtu
(Mt 16.2-3)
49“Khawvêlah mei thlâk thla dinga hung ka nih; tu khawm hin kâng nghâl ta sien ka va ti de!
50 #
Mt 10.38
Nisienlakhawm, baptisma chang ding ka nei, chu chu tleitlâk hmakhat chu ka chung a va rik de aw!
51Khawvêlah inremna inlêngtir dinga hung in mi sâwn am a nih? Teu lo e, ka hril cheu hi, indo inlêngtir dinga hung ka ni lem a nih;
52tuta hnung chu sûngkhata mi panga indo an tih, pathumin pahni, pahniin pathum.
53 #
Mik 7.6
Pain a naupa, naupain a pa, a nuin a naunu, a naunu chun a nu; a piin mo, moin a pi, do a tih,” a ta.
Hunhai en ngun ding
(Mt 16.1-4; Mk 8.11-13)
54Chun, mipui kuoma khawm chun, “Thlang tienga sûm suok in hmu chun ‘Ruo a sûr ding a nih,’ in ti nghâl hlak a, chun, a hung ni ngei hlak.
55Chun, sim thli hrâng in hriet chun, ‘Khuo a sa ding a nih,’ in ti hlak a; chun, a hung ni ngei hlak.
56Nangni vervêkhai, khawvêl le vân umzie khawm in hriet fie thei si a, iengdinga tulai thil in hriet fie thei naw am a na?
Mâni khingpui le inrem zet ding
(Mt 5.25-26)
57“Iengdinga nangnîn a fel chu in ngaituo naw am a na?
58Rorêltu hmaa i khingpui leh i fe pha, fe malamin amaa inthawka fihlîmna mawl zawng rawh; chuong naw chun rorêltu hmaah ṭhuoi ṭâl a ti che a, rorêltu chun mi man hotu inmantir a ti che a, mi man hotu chun intângna inah khum hlau rawi a ti che.
59Ka hril cheu hi, dâr tangka dere#Lepton hlek chen khawma i tlâk kim hmakhat chu, chutaka inthawk chu suok naw tawp in tih,” a ta.
Currently Selected:
LUKA 12: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
