JOHAN 20
20
Isu thonâwkna
(Mt 28.1-10; Mk 16.1-8; Lk 24.1-12)
1Chun, ni saria ni hmasatakah, zîngkâr, khuo a lân thim laiin, Mari Magdalin chu thlâna chun a va fe a, lung chu thlâna inthawka lâk sawnin a hmu a.
2Chuongchun, a tlân a, Simon Peter le inchûktir dang Isûn a ihmangai kuoma chun a hung a, an kuomah, “Thlâna inthawk khan Lalpa chu an fe hmangpui tah, an siena chin hrim kan hriet nawh,” a ta.
3Chuongchun, Peter chu a suok a, inchûktir dang le chun; chun, thlântieng an pan ta a.
4An tlân rêl a, inchûktir dang chun Peter a lekhêl a, thlân chu a tlung hmasa a.
5A kûn a, a bi a, puon zai inhmi um chu a hmu a; nisienlakhawm, a sûngah a lût nawh.
6Chun, Simon Peter khawmin a hnungah a hung hnawt phâk a, thlân sûngah a lût a; puon zai inhmihai um le
7a lua inhrûkna puon um chu, puon zai inhmihai laia um lovin, ziel sain hmun tuma um a hmu a.
8Chuongchun, inchûktir dang, thlân tlung hmasapa khawm chu a lût ve a, a hmu a, a awi a.
9Mithi laia inthawkin a thonâwk ding a ni ti Pathien Lekha Thu kha an la hriet si naw a.
10Chuongchun, inchûktirhai chu anni inah an fe nâwk ta a.
Mari Magdalin kuoma Isu ân lâr
(Mt 28.9-10; Mk 16.9-11)
11Nisienlakhawm, Mari chu tuolah thlân kâwla chun ṭap pumin a ngîr a; chuongchun, ṭap pumin a kûn a, thlân sûng chu a bi a;
12chun, vântirko pahni puon vâr silin, Isu ruong inzâlna hmuna chun, pakhat a lu tieng, pakhat a ke tienga ṭhung a hmu a.
13Anni chun a kuomah, “Nuhmei, iengdinga i ṭap am?” an ta. Ama chun an kuomah, “Ka Lalpa an fehmangpui a, an siena chin ka hriet naw leiin,” a ta.
14Chun, chuonga a hril phingleh a hnung tieng a ngha a, Isu ngîr chu a hmu a, Isu a ni ti a hriet si naw a.
15Isûn a kuomah, “Nuhmei, iengdinga i ṭap am? Tû am i zawng a?” a ta. Ama chun huon enkawltu amanih a ti a, a kuomah, “Pu, ama hitaka inthawka i fepui a ni chun i siena chin mi hril rawh, chuongchun lâng ka tih,” a ta.
16Isûn a kuomah, “Mari,” a ti a. Ama chu a ngha a, a kuomah, Hebrai ṭawngin, “Rabboni,” a ta; (chu chu Inchûktirtu tina a nih.)
17Chun, Isûn a kuomah, “Mi chel naw rawh, tu chen khawmin Pa kuomah ka la hang fe nawh; amiruokchu, ka unauhai kuomah va fe la, an kuomah, ‘Ka pa, in Pa, Ka Pathien, in Pathien kuomah ka lâwn ding a nih,’ a tih, va ti rawh,” a ta.
18Mari Magdalin chu a va fe a, închûktirhai kuomah, “Lalpa chu kan hmu tah,” tiin a puong a; chu chu Isu'n a kuoma a lo hril thu khawm a hril a.
A inchûktirhai kuomah Isu ân lâr
(Mt 28.16-20; Mk 16.14-18; Lk 24.36-49)
19Chun, chu ni, ni saria ni hmasatakah, khuo a hung inhnu chun, Judahai ṭi leia inchûktirhai umna kawtkhârhai chu khâr a ni hnungin, Isu anni lai a hung ngîr a, an kuomah, “In chungah thlamuongna um raw se,” a ta.
20Chu chu a hril zo chun, a kut le a nâk an kuomah ân entir a. Chun, Lalpa chu an hmu chun inchûktirhai chu an lâwm ta a.
21Chun, Isûn an kuomah, “In chungah thlamuongna um raw se, Pain kei a mi tir ang bawkin ka tir cheu hi,” a ti nâwk a.
22Chun, chuong thu chu a hril zoin, an chungah ân thuok a, an kuomah, “Thlarau Inthieng nei ro,
23 #
Mt 16.19; 18.18 tu suol khawm in ngaidam taphawt chu ngaidam nîng a tih; tu suol khawm in ngaidam naw taphawt chu, ngaidam naw nîng a tih,” a ta.
Thoma ringhlana
24Chun, Isu a hung lai khan, sâwm le pahnihai laia ṭhang ve Thoma (Didum an ti bawk) chu an kuomah a um ve naw a.
25Chuongchun, inchûktir danghai chun a kuomah, “Lalpa chu kan hmu tah,” an ta. Nisienlakhawm, ama chun an kuomah, “A kuta thîr kilna serhai kha ka hmu a, thîr kilna serhaia chun ka kut pârhai ka khîk lûta, a nâka ka pur meu naw chun, ring naw ning,” a ta.
26Chun, ni riet hnungah, a inchûktirhai chu in sûngah an um nâwk a, Thoma khawm an kuomah a um ve a. Chun, Isu a hung a, kawthai chu khâr a ni si a, anni lai a hung ngîr ta a, an kuomah, “In chungah thlamuongna um raw se,” a ta.
27Chun, Thoma kuoma chun, “I kut pârin hang them la, ka kuthai en rawh; i kut hang ban la, ka nak pur rawh; ring lovin um naw la, ring el rawh,” a ta.
28Thoman a kuomah ,“Ka Lalpa le ka Pathien i nih,” a ta, a dawn a.
29Isûn a kuomah, “Nangin kei i mi hmu leiin i ring a ni maw? Hmu lova ring taphawthai chu an hamṭha,” a ta.
Hi Chanchin Ṭha thiltum chu
30Chun, Isûn inchûktirhai hmaah inchikna dang tamtak a thaw a, chuonghai chu hi lekhabua hin ziek a ni nawh.
31Nisienlakhawm, hieng hi, Isu chu, Krista, Pathien Naupa a nih ti in ringna ding le, in ring a, a hminga hringna in neina dinga ziek a nih.
Currently Selected:
JOHAN 20: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
