JOHAN 19
19
1Chun, chuong lai chun Pilatin Isu a ṭhuoi a, a vuok a.
2Chun, sipaihai chun hling lukhum an phier a, an inkhumtir a, puon sen duk an insiltir bawk a,
3chun, a kuomah an hung a, “Chibai, Judahai Lal,” an ta, an ben a.
4Pilat chu a suok nâwk a, an kuomah, “En ta u, iengkhawm a suol ka hmu nawh ti in hrietna dingin in kuomah ka hung ṭhuoi suok hi,” a ta.
5Chun, Isu chu hling lukhum le puon sen duk chu sil pumin a hung suok a. Chun, Pilatin an kuomah, “En ta u, mihriempa hi,” a ta.
6Chun, thiempu lalhai le manmihai chun ama an hmu phingleh an khêk a, “Krawsah hemde rawh, krawsah hemde rawh,” an ta. Pilatin an kuomah, “Nangnîn fepui unla, krawsah hemde ro; kei chu ieng khawm a suolna ka hmu si nawh,” a ta.
7Judahai chun a kuomah, “Kan dân kawng khat a um, chu dân ang peiin Pathien Naua ân siem leiin, a thi ding a nih,” an ta, an dawn a.
8Pilatin chu thu chu a hrietin a ṭi nâwk zuol a;
9a inah a lût nâwk a, Isu kuomah, “Khâwtienga mi am I ni a?” a ta. Nisienlakhawm, Isûn a dawn nawh.
10Chun, Pilatin a kuomah, “Nangin kei i mi biek naw vei maw? Inthla thei che ka nih, krawsa hemde thei che ka nih ti i hriet naw am a nih?” a ta.
11Isûn, “Chungtienga inthawka pêk i ni naw chun, ka chunga hin thaw thei hrim hrim nei naw ti ni; chuleiin, i kuoma mi petu khan suol a phur zuol a nih,” a ta.
12Chun, chu chena inthawk chu Pilatin inthla a tum a, nisienlakhawm, Judahai an khêk a, “Hi mipa hi în thla chun Kaisar ruolpa ni naw ti ni, tûkhawm lala insiem taphawt chu Kaisar do an nih,” an ta.
13Chun, Pilatin chuong thu chu a hriet phingleh Isu a ṭhuoi suok a, a hming Lungrem, Hebrai ṭawng chun Gabbatha an ta, chu hmuna chun rorêlna ṭhungphaah a ṭhung a.
14(Chun, chu ni chu Fekân Ruoiṭhe Inringlâwk ni a nih, nisa inding vêl a nih.) Chun, ama chun Judahai kuomah, “En ta u, in Lal hi,” a ta.
15Chun, anni chu an khêk a, “Sukbohmang rawh, sukbohmang rawh, krawsah hemde rawh,” an ta. Pilatin an kuomah, “In lal hi krawsah hemdêng ka ti maw?” a ta. Thiempu Lalhaiin, “Kaisar naw chu lal dang kan nei nawh,” an ta, an dawn a.
16Chuongchun, Pilatin krawsa hemde dingin ama chu an kuomah a pêk ta a.
Isu hemdea a um thu
(Mt 27.32-44; Mk 15.21-32; Lk 23.26-43)
17Chuongchun, Isu chu an ṭhuoi ta a. Ama chun mâni ta dinga kraws putin, “Lu ru hmun,” an ti, Hebrai ṭawng chun Golgotha an ti, chu hmun chen chun a va suok a.
18Chutaka chun ama chu krawsah an hemde a, mi dang pahni khawm krawsah an hemde bawk a, a sîr tuokah pakhat ve vein, a laiah Isu.
19Chun, Pilatin lekha a ziek a, kraws lêr tieng a bel a, “NAZARETH ISU JUDAHAI LAL,” tiin ziek a nih.
20Chu lekha chu Judahai tamtakin an tiem a; Isu krawsa an hemdena hmun chu khawpui kâwl a na, Hebrai ṭawng dâm, Latin ṭawng#Rom ṭawng dâm, Grik ṭawng dâmin ziek a nih.
21Chuongchun, Judahai thiempu lalhai chun, Pilat kuomah “ ‘Judahai Lal,’ tiin ziek naw la, ‘Judahai Lal ka nih a tih,’ tiin ziek lem rawh,” an ta.
22Pilat chun, “Ka ziek kha ka ziek zo tah,” a ta, a dawn a.
23Chun, sipaihaiin Isu chu krawsa an hemde zo chun, a silfênhai an lâk a, phêk liin an siem a, sipaihaiin phêk khatin an chang seng a; a zakuo an lâk bawk a. Zakuo chu ṭhuilo zakuo a na, a rînga inthawka a puma khâwng vawng a nih.
24 #
Sm 22.18
Chuleiin, anni chun, “Kei thlêr nâwng ei tiu, tu ta tak ding am a na, ṭhum vâwr lem ei tiu,” an in ti a, Pathien Lekha Thu,
“Ka silfênhai an insem a,
Ka zakuo dingin ṭhum an vâwr a,”
ti a tlungna dingin. Chuong thil chu sipaihaiin an thaw a nih.
25Chun, Isu kraws kâwlah a nu le a nu zuorpuinu Mari, Kleopa nuhmei, le Mari Magdalin an ngîr a.
26Chun, Isûn a nu le a inchûktir a ihmangai kha a kâwla ngir a hmu a, a nu kuomah, “Nuhmei, en ta, i naupa kha!” a ta.
27Chun, inchûktir kuoma khawm chun, “En ta, i nu kha!” a ta. Chun, chu chena inthawk chu, chu inchûktir chun amanu chu a inah a ṭhuoi ta a.
Isu thi thu
(Mt 27.45-46; Mk 15.33-41; Lk 23.44-49)
28 #
Sm 22.15; 69.21 Chu hnunga chun Isûn thil iengkim tuhin a kim tah ti a hriet a, Pathien Lekha Thu kha a tlungna dingin, “Ka dang a châr ie,” a ta.
29Chutaka chun bêl pakhat uoin thûra sip an intung a, chuongchun sponj pakhat chu uoin thûra inchie sipin husop hmawlah an târ a, a hmûr an hang intlun a.
30Chun, Isûn uoin thûr chu a lo dâwn zo chun, “A kin tah,” a ta. A lu a kûn a, a thlarau ân thla ta a.
Isu nâk feia sun thu
31Chun, Inringlâwk ni a ni leiin, ruonghai chu Châwlnia krawsa a um zing nawna dingin, (chu Châwlni chu ni ropui a ni si a,) Judahaiin Pilat kuomah an kehai suktlieka, an ruong fepui dingin an ngên a.
32Chun, sipaihai chu an hung a, a kuoma krawsa an hemde a tawntira mi le mi dang chu an kehai an suktliek a.
33Nisienlakhawm, Isu kuomah an hung a, a thi ta zing ti an hriet a, a kehai an suktliek ve naw a.
34Nisienlakhawm, sipaihai laia mi pakhatin a nâkah feiin a sun a, chuongchun, thisen le tui a suok nghâl ta a.
35A hmutu chun ân hriettir tah (a thu inhriettir chu ân dik a nih, a hril indik ti khawm a hriet,) nangni khawmin in ringna dingin.
36 #
Ex 12.46; Nam 9.12; Sm 34.20 Pathien Lekha Thu, “A ru pakhat khawm suktliek ni naw ni,” ti a tlungna dingin chuong thil chu a hung um tah a nih.
37 #
Zek 12.10; Tp 1.7 Chun, Pathien Lekha Thu dangin “An isun ngei chu la en an tih,” a ti bawk a.
Isu phûma a um thu
(Mt 27.57-61; Mk 15.42-47; Lk 23.50-56)
38Chun, chuong thil thaw zo chun, Josef Arimathai khuoa mi, Isu inchûktir a nih, nisienlakhawm, Judahai a ṭi leiin a rûka um a na, ama chun Isu ruong chu fepui dingin Pilat kuomah a hni a, chun Pilatin a phal a. Chuongchun, a hung a, a ruong chu a fepui ta a.
39 #
Jn 3.1-2
Chun, Nikodem, (a tîra zâna a kuoma hung khan,) murra le aloe inpawlsa bûk sâwmnga lai chawiin a hung ve a.
40Chun, Isu ruong chu an lâk a, Judahai inphûm dân angin thil rim inhnikhai le chun puon zai inhmiin an tuom a.
41Chun, krawsa an hemdena hmuna chun huon pakhat a um a, huona chun tukhawm lân zâlna ngainaw thlân thar pakhat a um.
42Chun, Judahai Inringlâwk ni a ni leiin, thlân chu an kâwl el a ni si a, chutaka chun Isu chu an inzâl ta a.
Currently Selected:
JOHAN 19: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
