2 KORINTH 3

Thuthlung Thara rawngbâwltuhai

1Mâni inhrilmawi ei phut nâwk ding a ni ta maw? Annawleh, in kuoma pêk ding amanih, in kuoma inthawk amanih hrilmawina lekha, mi ṭhenkhat ta dinga a ngai angin, kan ta dingin a ngai ve ding a ni maw?

2Nangni hi kan lekha, kan lungrila ziek, mi po po ihriet le tiem chu in nih,

3 # Ex 24.12; Jer 31.33; Ezek 11.19; 36.26 Krista lekha, keini a mîn ziektir, lekhatuia ziek nilo, Pathien hring Thlaraua ziek lem, lung phêka ziek ni lova, mihriem lungril phêkhaia ziek lem chu in nih, ti chiengtaka inlangtir a ni si a.

4Chun, Pathien tienga chuong ang ringna chu Krista zârah kan nei a nih;

5iengkhawm keinia inthawka suoka ruot dingin keini ngawtin kan tlin kan ti naw a; kan tlin theina chu Pathien kuoma inthawk a ni lem.

6 # Jer 31.33 Ama bawk chun thuthlung thar rawngbâwltuahai a mîn tlin tir a; lekha thu ela rawngbâwltuahai ni lovin, Thlarau rawngbâwltuahai a ni lem; lekha thu ngawt chun a sukhlum hlak si a. Thlarau ruok chun a sukhring hlak a nih.

7 # Ex 34.29 Mosie hmêl a ropui leiin Israel nauhai chun a hmêl an en zing thei naw a. (chu ropuina chu a bo ta riei riei a), thina rawngbâwlna lunga hawrawpa ziek hman, chuong ang khawpa ropuiin a tlung chun,

8Thlarau rawngbâwlna chu ieng ang taka ropuiin am a tlung ding chu?

9Thiemnaw inchangtirna rawngbâwlna hman a ropui chun, felna rawngbâwlna chu ropuina tieng chun a nasa lem bêk bêk ding a nih.

10Sukropuia um ta chun, hi tieng panga hin ropuina hrim a nei si naw a; ropuina nasa chun a khûm leiin.

11Chuoi nâwk el ding hman kha, khâng khawpa ropui a ni chun, a um sawng ding lem chu, a va ropui nasa âwm ngei de!

12Chuongchun, chuong ang beiseina chu kan nei leiin iengkim kan hril suok hlak a nih;

13 # Ex 34.33 Mosie thaw ang khan kan thaw ve nawh, ama chun bo ta riei riei bo tâwpna chu Israel nauhaiin an en zing nawna dingin a hmai chu hmai inkhumnain ân khum a.

14An lungril ruok chu sukngarin a um ta lem a; vawisûn chen khawm hin thuthlung hlui chu an tiemin inkhumna pângngai chu hlîm lovin a um zing si a; chu inkhumna chu Kristaa chun sukboin a um ta a.

15Nisienlakhawm, vawisûn chen hin Mosie Lekhabu an tiem po leh an lungrila chun inkhumna chu a um hlak.

16Nisienlakhawm, an lungril Lalpa tieng an ngha pha pha inkhumna chu lâkhmang ni tâng a tih.

17Chun, Lalpa chu Thlarau chu a na, Lalpa Thlarau umna taphawta chun zalênna a um hlak.

18Chuongchun, keini chu kan rêngin hmai inkhum lovin, hlimen anga Lalpa ropuina sunvarin, ropuinaa inthawka ropui peiin, chu angpui ngeia um dingin, sukdanglamin kan um hlak, Lalpaa (Thlaraua) inthawka kan hmu ang peiin.

Currently Selected:

2 KORINTH 3: HMOVBSI

Highlight

Copy