1 KORINTH 9
9
A tirko ninaa Paula thuneina
1Zalên ka ni naw am a nih? Tirko ka ni naw am a nih? Ei Lalpa Isu chu ka hmu ta naw am a nih? nangnirawi chu Lalpaa ka sinthaw in ni naw am a nih?
2Mi danghai ta dingin tirko ni naw lang khawm, nangni ta ding bêk chun ka nih; Lalpaa ka tirko nina inchikna chu nangni hi in nih in sawnnaw.
3A mi suosaltuhai ka idawnna chu hi a nih.
4Fa le dâwn dingin thu kan nei naw am a nih?
5Tirko danghai le Lalpa unauhai le, Kipha ang khan ringtu nuhmei ṭhuoi vêl dingin
6kei le Barnabain thu kan nei naw bîk am a nih?
7Sipai tu am mâni inchâwm fâwmin râl kâp hlak an um a? Tuin am a ra fa si lovin Grêp huon a siem hlak leh? Annawleh, tuin am ranruol nênetui dâwn si lovin ranruol a vai hlak a?
8Chuong thu chu mihriem ang elin ka hril am a nih? Dân thu khawmin chuong ngei chu a hril tho ni lo am a nih?
9 #
Dt 25.4; 1 Tim 5.18 Mosie Dân Lekhabua chun, “Sebâwng chalin bu a chîl lai chun a hmûr khit naw rawh,” ti ziek a ni si a. Pathienin sebâwng chal am a ni a ngaituo tak chu?
10Keini ta ding lieu lieua a hril a ni lem naw am a nih? Ni e a, keini ta dingin a nih an ziek, hnuoi inlettu chun beisei neia inlet ding a nih, bu vawtu khawm chun chan nei ve beiseia vuok ding a ni si a.
11 #
Rom 15.27
Keinin thlarau tieng thilhai chu in kuomah kan tu ta chun, in tisa tieng thilhai chu sîk inlang khawm thil hlâwktak am nîng a ti?
12Mi dang hmanin in chunga thuneina chu an chang chun, keini hi chang ding kan ni zuol a ni naw am nih? Nisienlakhawm, chu thuneina chu kan hmang nawh. Krista Chanchin Ṭha kan hluo nawna dingin iengkim kan tuor hrâm hrâm hlak a nih.
13 #
Dt 18.1
Thil ser buotsai vêltuhai chun Pathien biekina thil an fâk le maichâm rawngbâwltuhai chun, maichâm leh chanvo an nei ti in hriet naw am a nih?
14 #
Mt 10.10; Lk 10.7 Chuong ang tak chun Lalpa chun Chanchin Ṭha hriltuhai chu Chanchin Ṭha chu an fâk hmuna dinga a ruot a nih.
15Nisienlakhawm, kei chun chuong chu pakhat khawm ka hmang naw a nih; ka chungah chuong anga in thawna dinga ka ziek a ni bawk nawh; tûkhawmin ka isuong hi iengkhawm ni lova an siem nêk chun thi el lang ka ta dingin a ṭha lem si a.
16Chanchin Ṭha hril lang khawm suong ding hrim hrim ka nei si naw a; thaw mâkmaw ka chungah ân nghat a ni si a; Chanchin Ṭha hril naw lang ka chung a rik ding a ni si a.
17Chu chu mâni ditthlangnaa ka thaw chun lâwmman ka nei a nih; nisienlakhawm, mâni ditthlangna lei a ni si naw chun Chanchin Ṭha enkawlna sin hi inkawltir el nîng ka tih.
18Ka lâwmman chu ieng am ni tâng a ta? Chanchin Ṭhaa ka thuneina chu ka hmang zo nawna dingin Chanchin Ṭha ka hril hin, hlaw boa Chanchin Ṭha rawng ka bâwl thei hi a nih.
Paula ṭhahnemngai zie
19Tû suok khawm ni naw lang khawm mi tam lem ka lâk lût theina dingin, mi po po suokah kân siem tah.
20Chuongchun, Judahai ka lâk lût theina dingin Judahai kuomah Juda mi angin ka um hlak; Dân hnuoia umhai ka lâk lût theina dingin, Dân hnuoia umhai kuomah Dân hnuoia um angin ka um hlak, Dân hnuoia um si lovin.
21Dân neinawhai ka lâk lût theina dingin dân neinawhai kuomah dân neinaw angin ka um hlak, Pathien dân awilo si lovin, Krista dân zâwm siin.
22Hrâtnawhai ka lâk lût theina dingin hrâtnawhai kuoma chun hrâtnaw angin ka um hlak; iengti kawng zâwngin amanih bêka ṭhenkhathai bêk ka sandam theina dingin mi po po kuomah iengkim ka ni tah.
23Chanchin Ṭha leiin iengkim ka thaw hlak, chan ka nei ve theina dingin.
24Intlânsiekhai chu an rêngin an tlân a; nisienlakhawm, pakhat chauin lâwmman a hmu hlak ti in hriet naw am a nih? In hmu theina dingin chuong ang tak chun tlân ro.
25Chun, inruolsieknahai dâma chun a thaw ṭâl ṭâl taphawt chu iengkimah an insûm hlak a nih. Anni chun lallukhum sethei hmu dingin an thaw a,
26eini ruok chu lallukhum setheilo hmu dingin. Chuong angtak chun a san mumal hre lo lovin ka tlân hlak.
27Boruok chau hnek lovin kei le kei kân hnek a, ka taksa ka hnek rak rak a, suokah ka siem hlak; chuong naw chun, mi danghai kuoma tlâng ka însampui hnung khawmin ieng amanih tiin kei ngei khawm hi peithlâkin um rawi ka tih.
Currently Selected:
1 KORINTH 9: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
