1 KORINTH 10
10
Israelhai chanchina inthawka zilna
1 #
Ex 13.21-22; 14.22-29 Unauhai, hieng hi in hriet naw ka nuom naw ie, khânga ei thlatuhai po po sûm hnuoiah an um vawng a, an rêngin tuipuia khawm an kai vawng a;
2sûma le tuipuia khan an rêngin Mosieah baptisin an um vawng a,
3an rêngin thlarau tieng bu hmunkhat an fâk seng a,
4 #
Ex 16.35; 17.6; Nam 20.11 an rêngin thlarau tieng dâwn ding hmunkhat khawm an dâwn seng kha; anni zuitu thlarau tieng lungpuia kha an dâwn seng kha; chu lungpui chu Krista a nih.
5Nisienlakhawm, anni laia mi tam lem chunga chun Pathien a lungni ta naw a, thlalêra khan tluhlumin an um a.
6 #
Nam 14.29-30; 11.4; 10.7; Ex 32.6 Chun, chuong chu eini ta dingin inentirna a nih, thil suol an châk ang bawk khan ei châk ve nawna dingin.
7Anni laia mi ṭhenkhat milim betu an ni ang khan milim betu ni naw ro, “mipui chu fa le dâwn dingin an ṭhung tâwl a, infiem dingin an tho nâwk a,” ti ziek ang khan.
8Anni laia mi ṭhenkhatin nunghâk an dit a, ni khata sîng hni le sâng thumin an tlûkhlum pha ang khan, in dit ve nâwng ei tiu.
9Anni laia mi ṭhenkhatin Lalpa#MSS thena chun “Krista” ti a nih an fie a, rûla sukbohmanga an um pha ang khan Lalpa chu fie nâwng ei tiu.
10 #
Nam 25.1-18; 21.5-6; 16.41-49 Anni laia ṭhenkhat an chier a, sukbohmangtu sukbohmanga an um ang khan chier naw bawk ei tiu.
11Chun, chuong chu inentirna dingin an chungah a hung tlung a ni kha; eini hun tâwp hung tlungnahai hi mi zil dingin an ziek a n i bawk a.
12Chuleiin, ngîra inngai in ni chun, in tlûk nawna dingin fimkhur ro.
13Mihriem ituor thei ang bâk chu thlêmna hrim hrim in chungah a tlung ngai nawh. Pathien chu a ringum a nih; ama chun in tuor thei bâk chu thlêmna in tuor phal naw ni; in tuor theina dingin thlêmna ruolin tlân suokna lampui siem nghâl lem a tih.
Milim biek hi tlânsan ding a nih
14Chuleichun, ka idittakhai, milim biek hi tlânsan ro.
15Mi varhai kuoma hril angin ka hril a nih; ka thu hril hi ngaituo ro.
16 #
Mt 26.26-28; Mk 14.22-24; Lk 22.19-20 Malsâwmna no mal ei isâwm hlak hi, Krista thisen inṭawmpuina a ni naw am a nih? Bei ei khawi hlak hi Krista taksa inṭawmpuina a ni naw am a nih?
17Eini mi tamtak hi, bei tlang khat, taksa pumkhat ei ni hi; ei rêngin bei tlang khata inthawkin ei chang seng si a.
18 #
Lev 7.6
Taksa tienga Israelhai chu en ta u; inthâwina sa fatuhai chun maichâm chu an inṭawmpui a ni naw am a nih?
19Ieng am a na ka hril? Milim hmaa thil inhlân chu hlutna nei thil am a nih? Milim khawm chu thil tlâktlai am a ni ?
20 #
Dt 32.17
Jentailhai inthâwina chu Pathien kuomah ni lovin, khawhrihai kuomah an inthâwi hlak ti ka hril lem a nih; nangnirawi chu khawhrihai in inṭawmpui ka nuompêk naw cheu a ni hi.
21Lalpa no le khawhri no dâwn kawp thei naw ti niu, Lalpa dawkâna le khawhri dawkâna chu fa kawp thei naw bawk in tih.
22Annawleh, Lalpa chu thîk dingin chawk tho ei tum a ni maw? Ama nêkin ei hrât lem am a nih?
Iengkim Pathien ropuina dinga thaw ding
23 #
1 Kor 6.12
Thil iengkim thaw a thieng a; nisienlakhawm, thil iengkim thaw a ṭha kher nawh. Thil iengkim thaw a thieng a; nisienlakhawm, thil iengkim thawin a mi siem ṭha kher nawh.
24Tûkhawmin mâni ṭhatna ding zawng lovin mi dang ṭhatna ding zawng lem raw se.
25Sa dâwra an zawr taphawt chu sie le ṭha hrietna leia iengkhawm indawn lovin fa el ro;
26 #
Sm 24.1; 11.1; 1 Kor 4.16; Phil 3.17 hnuoi le a sûnga um po po hi Lalpa ta a ni si a.
27Awinaw laia mi tuin amanih a fiel cheu a, fe in nuom si chun, sie le ṭha hrietna leiin iengkhawm indawn chuong lovin an pêkhai taphawt cheu chu fa el ro.
28Amiruokchu, tûin amanih, “Hi hi inthâwina a nih,” tiin a hril cheu chun, ân hriettirtu cheu lei le, a sie le ṭha hrietna leiin fa naw ro;
29nang a sie le ṭha hrietna ka ti naw a, mi dang sie le ṭha hrietna chu ka ti lem a nih. Iengdinga mi dang sie le ṭha hrietna chun ka zalênna a sawisêl am a na?
30Lâwmtaka ka chang chun, a chunga lâwmthu ka hrilna chunga hin, iengdinga hrilsieta um am ka na?
31Chuongchun, in fâk khawmin, in dâwn khawmin, in thaw taphawta chun Pathien ropuina ding ruokin thaw ro.
32Judahai ta ding khawmin, Grik mihai ta ding khawmin, Pathien kohranhai ta ding khawmin an tlûk phâna ding hrim hrim iengkhawm thaw naw ro.
33Keiin mâni ta dinga ṭangkaina zawng lova sandam an ni theina dinga mi tamtak ta dinga ṭangkaina zawng lemin, mi po po iengkimah ka suklâwm ang tak hin.
Currently Selected:
1 KORINTH 10: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
