1 KORINTH 8
8
Milimhai kuoma inthâwina thu
1Chun, milimhai kuoma inthâwina thilhai thu kha chu: Ei rêngin hrietna ei nei seng ti ei inhriet a. Hrietna hin chu mi a sukuong hlak a, lunginsietna ruok chun mi a siem ṭha hlak.
2Tûkhawmin thil ieng amani hrea ân ngai chun, a hriet ding ang chu a la hriet naw a;
3amiruokchu, mi tûkhawmin Pathien a hmangai chun, chu ngei chu ama ihriet a nih.
4Chuongchun, milimhai kuoma inthawina thil fâk kawnga chu, khawvêla hin milim hrim hrim chu iengkhawm an ni nawzie le, pakhat chau naw chu Pathien dang hrim an um naw chu ei hriet a.
5Vâna manih, hnuoia manih pathien hmingput um hai sienkhawm, (chuong ang pathien tamtak le lalpa tamtak an um si a,)
6Eini ta ding chun Pathien pakhat chau (Pa chu) a um a, ama kuoma inthawkin tinrêng a suok a, eini khawm ama ta dinga um ei nih; Lalpa pakhat chau (Isu Krista chu) a um bawk a, ama leiin iengkim a um a, eini khawm ama lei bawka um ei nih.
Unau sie le ṭha hrietna hrâtnaw vêngpêk dân
7Amiruokchu, chu hrietna chu mi po po kuomah a um nawh, chuongchun, mi ṭhenkhatin tu chen hin milim be ṭhang an ni leiin, milim kuoma inthâwina thil angtaka ngaiin an fâk hlak; chuongchun, an sie le ṭha hrietna chu a hrât naw leiin a hung inthiengnaw hlak.
8Nisienlakhawm, fâk ding hin Pathien mit mîn tlungtir chuong naw ni; fa naw inla khawm se chuong naw bawk ei tih; fa inla khawm ṭha chuong naw bawk ei tih.
9Nisienlakhawm, fîmkhur ro, chuong naw chun, nuom nuoma in tlat theina hi mi hrâtnawhai ta dingin tlûkna ni rawi a tih.
10Nang hrietna nei mi, tûkhawmin milim biekna ina thlaithlêng awta an hmu si che chun, anni chu mi hrâtnaw lo ni hai sienla an sie le ṭha hrietna chun milim kuoma inthâwina thil fâk a hung ngam ding a ni naw am a nih?
11Chuongchun, i hrietna lei chun mi hrâtnaw (unau a thi ai Kristain a thipêk) chu suksietin um a tih.
12Unauhai chungah chuong ang thil in suksuola, an sie le ṭha hrietna a hrât naw nâklai, in inhliem hlau chun, Krista chungah thil in suksuol a nih.
13Chuleiin, fâk dingin ka unau a sukthlûk chun, ka unau ka sukthlûk nawna dingin kumkhuoin sa hrim hrim fa ta naw ning.
Currently Selected:
1 KORINTH 8: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
