1 KORINTH 15

Krista thonâwkna

1Chun, unauhai, Chanchin Ṭha ka hril cheu kha inhriettir nâwk ka ti cheu; chu Chanchin Ṭha chu in lâwm a, chutaka bawk chun in ngîr a;

2ka thu hril cheu kha in awi mei mei a ni naw a, in pawm tlat a ni chun, chutaka bawk chun sandam mêkin in um a nih.

3 # Is 53.5-12 A hmasatakin, ka ihmu ve bawk chu ka hril sâwng cheu kha; khânga Krista chu Pathien Lekha thu hril ang peia ei suolhai leia a thi a,

4 # Sm 16.8-10; Mt 12.40; Tt 2.24-32 an phûm a, Pathien Lekha thu ang peiin ni thum nia keithoin a um a.

5 # Lk 24.43; Mt 28.16-17; Mk 16.14; Jn 20.19 Kipha kuomah a hung inlâr dâm kha; chun, sâwm le pahnihai kuomah ân lâr nâwk a.

6Chu hnunga chun unau za nga nêka tam lai ân lâr nawk a; chuhai laia mi tam lem chu tu chen hin an la dam rawp a; ṭhenkhat ruok chu an in ta a.

7Chun, Jakob kuomah ân lâr nâwk a, chu hnung chun tirkohai po po kuomah;

8chun, a tâwptaka chun, a hun nawa pieng ang keima kuoma khawm ân lâr a.

9 # Tt 8.3; 9.3-6 Kei chu tirko laia chîntak, Pathien kohranhai ka suknawmna leia tirkoa inbûk tlâklo ka ni si a.

10Nisienlakhawm, Pathien lunginsietna leiin ka ni ni ka ni tah; chun, a lunginsietna a mi pêk chu a thlâwnin a um naw a, chuong nêk hmanin anni po po nêkin ka thaw nasa lem kha; nisienlakhawm, keia khâtin ka thaw naw a, Pathien lunginsietna ka kuoma um khan a thaw lem a nih.

11Iengkhawm ni sienla, kei khawmin, anni khawmin khâng ang khan kan hril hlak a, nangniin khâng khan in awi bawk a.

Mithi thonâwkna

12Chun, Krista thu: mithi laia inthawka keithoin a um ti an hril si chun, iengtiziea nangni laia ṭhenkhatin “Mithi thonâwkna hrim hrim a um nawh” in ti?

13Mithi thonâwkna hrim hrim a um naw chun Krista khawm kha keithoin um naw ni;

14chun, Krista chu keithoa a um si naw chun, kan thu hril hi iengkhawm ni naw ni a, in awi khawm iengkhawm ni naw ni.

15Anih, Krista a keitho ti Pathien kan hrietpui lei khan, Pathien tieng thuah hrietpuitu khêlhlip lo ni bawk kan tih Mithihai keithoa an um naw chun, ama khawm keitho da ni ie.

16Mithihai keithoin an um si naw chun, Krista khawm kha keithoin um si naw ni,

17chun, Krista kha keithoa a um naw chun, in iâwi chu iengkhawm ni naw ni, in suolnaa chun in la um zing nîng a tih.

18Chuong chu a ni chun, Kristaa in tahai kha an bohmang tah nîng a tih.

19Tulai dam sûng chaua Krista chunga beiseina nei ei ni chun mi po poa lungsietumtak lo nîng ei tih.

20Nisienlakhawm, Krista chu mithi laia inthawkin keithoin a um tak zet a nih, a inhai tho hmaṭhuoitu a lo ni tah.

21Mihriem leia thina a lo um leiin mihriem lei bawkin mithi thonâwkna a lo um ta bawk a.

22Adama chun mi po po an thi hlak angin, Kristaa chun mi po po sukhringin um bawk an tih.

23Nisienlakhawm, mâni hun seng peiah, keitho ning an tih: ahmasa takin Krista, tho hmathuoitu; chu hnungah, a hung phaleh Ama tahai po.

24Chu hnunga chun a tâwp chu la hung tlung a tih, chu pha chun rorêlnahai po po le thuneina thilthawtheina po pohai a sukbo hnungin, Pathien kuomah, Pa kuoma ngei chun ram chu pêng a tih;

25 # Sm 110.1 a hmêlmahai po po a ke hnuoia a sie hmakhat chu ama chu lala um ding hrim a ni si a.

26Hmêlma nuhnungtak sukboa um ding chu thina hi a nih.

27 # Sm 8.6 “Ama chun a ke hnuoiah iengkim a sie si a”; nisienlakhawm, “A hnuoiah iengkim siein a um”, ti hin, a hnuoia iengkim sietu chu a ṭhang ve nawh ti ân lang zing a nih.

28Chun, a hnuoia iengkim siea a um pha chun, Naupa ngei khawm chu a hnuoia iengkim sietu hnuoia siein um bawk a tih, Pathien chu iengkima iengkim a ni theina dingin.

29Chuong ang a ni naw chun, mithi puola baptisma changhai chu iengtin am thâwng an ta? Mithihai chu keithoa an um dêr si naw ding chun, iengdinga anni puola baptisma an chang hlak?

30Iengleiin am eini khawm hi dârkâr tina inlaua ei um hlak am a na?

31Unauhai, ei Lalpa Isu Kristaa ka suongna cheu chu sâlin, “Ni tinin ka thi hlak,” ka ti a nih.

32 # Is 22.13 Mihriem thaw dân ang ringawta Ephesia sahrânghai kha insuolpui ka ni chun, ka ta dingin ieng am ṭhahnem a ta? mithi keithoa an um naw ding chun, fain dâwn ei tiu, zîngah ei thi el ding annâwm.

33Hlêmin um naw ro, “Ruol rilohaiin nungchang ṭha an sukkhawhlo hlak.”

34Feltakin har unla, suksuol naw ro; ṭhenkhat chun Pathien hrietna hrim in nei naw hi; hi hi in inzakna dinga ka hril a nih.

Thonâwkna Taksa

35Nisienlakhawm, tuin amanih, “Mithi hai chu iengtin am keithoin um an ta? taksa ieng ang putin am hung an ta?” a ti a ni thei a.

36Nang mi invêt, nang ngeiin i tu hlak khawm hi, a thi zet naw chun sukhringin a um ngai lem,

37chun, i tu hlak khawm hi a taksa la um ding chu i tu naw a, a mal el i tu lem hlak a, bu mal amanih, chi dang mal amani khawm a ni thei a;

38nisienlakhawm, Pathienin ama nuom ang peiin taksa a pêk hlak, a mal tin kuomah mani taksa seng chu.

39Tisa po po hi tisa chi khat an ni naw a; mihriem tisa a dang a, sa tisa a dang a, vate tisa a dang a, nga tisa a dang a nih.

40Vân taksahai a um a, hnuoi taksahai khawm; nisienlakhawm, vân taksa ropuina chu a dang a, hnuoi taksa ropuina chu a dang a nih.

41Nisa ropuina chu a dang a, thla ropuina chu a dang a, arasihai ropuina chu a dang a, arasi le arasi khawm ropuinaa chun an inang si nawh.

42Mithi thonâwkna khawm hi chuong ang bawk chu a nih. Hmawn theia tuin a um a, hmawntheilova keithoin a um;

43chawimawilova tuin a um a, ropuitaka keithoin a um; hrâtlova tuin a um a, thilthawtheina neia keithoin a um;

44mihriem tieng taksaa tuin a um a, Thlarau tieng taksaa keithoin a um, mihriem tieng taksa a um chun thlarau tieng taksa khawm um a tih.

45 # Gen 2.7 Chuong ang bawkin, “Mihriem hmasatak Adam chu mi hring a hung nih,” ti ziek a nih; Adam nuhnung lem chu hringna petu thlarau a nih.

46Nisienlakhawm, thlarau tieng chu a um hmasa naw a, mihriem tieng chu a um hmasa lem; chu hnunga chun thlarau tieng chu a um.

47Mihriem hmasatak chu hnuoia mi pila siem a nih; mihriem pahnina chu vâna mi a nih.

48Pila siem mihai chu, pila siem mi ang kha an nih; vâna mihai chu vâna mi ang kha an nih.

49Chun, hnuoia siem mi puona kha ei nei ang bawkin vâna mi puona chu ei nei bawk ding a nih.

50Unauhai, “Tisa le thisen hin Pathien ram hluo thei naw ni a, hmawn thei hin hmawntheilo chu hluo chuong bawk naw ni” ti ka hril a ni hi.

51Ngai ta u, thurûk ka hril ding cheu a ni hi; ei rêngin in kher nâwm ei ni a,

52 # 1 Thes 4.15-17 nisienlakhawm, ei rêngin tawtawrâwt nuhnungtak inri pha chun sâwt nawtêa, mitkhap kâr lova sukdanglamin um vawng tâng ei tih; tawtawrâwt chu ân ri ding a ni si a; chuongchun, mithihai chu hmawntheilova keithoin um an ta, eini khawm sukdanglamin um tâng ei tih.

53Hi hmawnthei hin hmawntheilo a sil ding a na, hi thi thei khawm hin thi theinawna a sil bawk ding a nih.

54 # Is 25.8 Chuongchun, hi hmawnthei hin hmawntheinawna a sila, hi thithei hin thitheinawna a sil pha chun, “Hnenain thina a lem zo tah,”

55 # Hos 13.14 “Aw thina, i hnena chu khâwlai am a um ta a? Aw thina, i tûr chu khâwlai am a um ta a?” ti thuziek hi hung tlung tâng a tih.

56Thina tûr chu suol a na, suol thilthawtheina chu dân thu chu a nih.

57Nisienlakhawm, ei Lalpa Isu Krista zâra hnena mi petu Pathien kuoma chun lâwmthu um raw se.

58Chuleichun, ka unau dittakhai, dettakin, sukchâng ruollovin Lalpa sin ṭhahnem ngaitaka thaw rawpin um ro, in inrimna chu Lalpaa chun a thlâwn ngai nawh ti in hriet si a.

Currently Selected:

1 KORINTH 15: HMOVBSI

Highlight

Copy