ROM 10
10
1Unauhai, ka lung nuom zâwng le, anni ta dinga Pathien kuoma ka ṭawngṭaina san tak hi, sandam an hung ni theina ding a nih.
2Pathien tieng ṭhahnem an ngai ti ka hrietpui a nih, hrietna indiktak leia ṭhahnemngaina ruok chu a ni nawh.
3Pathien felna hre loin, anni felna sukdet an tum a, Pathien felnaah an inpêk lût si nawh.
4Krista chu ama ringhai po ta dingin felna an hmu theina dinga Dân suktâwpna a ni sih a.
Mi popo ta dinga sandamna
5Mosie chun, “Mi Dâna felna zâwm chu, chu felna zâra chun hring a tih,” tiin a ziek a.
6Ringnaa felna ruok chun, hieng hin a hril, “In lungrilin, ‘Tu am vânah lâwn a ta?’ (chu chu Krista hung ṭhuoi thla ding tina a nih)
7amanih, ‘Tu am vânsamah zu ṭum a ta?’ (chu chu mithi laia inthawka Krista zu ṭhuoi suok ding tina a nih) ti naw ro,” tiin.
8Anleh, ieng am a hril a? “Thu chun a hnai che, i bau le i lungrila khawm a um,” tiin a hril a nih. Chu chu ringna thu ei hril hlak hi a nih:
9I bauin, “Isu chu Lalpa a nih” tia i ṭan a, mithi laia inthawkin Pathienin a keitho ti i lungrila i ring phawt chun sandamin um i tih.
10Mihaiin an lungrilin an ring a, felna an hmu hlak, bauin an ṭan a, sandamna an hmu bawk hlak a nih.
11 #
Is 28.16 Pathien Lekha Thuin, “Tû- khawm ama ring taphawt chu muolpho naw ni hai,” a ti a nih.
12Juda le Grik mihai chu ienga khawm an danglam chuong si nawh a. Lalpa pakhat an rênga chunga Lalpa a nih; ama lamtuhai po chunga chun ṭhatna a hau sih a.
13 #
Joel 2.32
“Tukhawm Lalpa hming lam taphawt chu sandamin um an tih,” a ti a nih.
14Anleh, an awi naw chu iengtin am lam an ta? A thu an hriet naw chu iengtin am awi an ta? Thuhriltu um loin iengtin am hrieng an ta?
15Tir an ni naw chun iengtin am thu hril an ta? “Thil ṭha chanchin lâwmum intluntuhai ke chu a va mawi de!” tia ziek ang khan.
16 #
Is 52.7; 53.1 Nisienlakhawm, Chanchin Ṭha chu an rêng chun an ring vawng nawh. Isaiin, “Lalpa, kan thu hril tuin am a ring a?” a ti sih a.
17Chuongchun, ringna chu hrietna leiin a hung um hlaka; chun, hrietna chu Isu Krista leiin a hung um.
18 #
Sm 19.4
Anleh, an nain an hriet naw am a nih? Hreh e le!
“An ri chu ram tinah ân thang a,
An thu chu kâwlkawdawng chenin ân thang suok tah.”
19 #
Dt 32.21
Anleh, Israel mihaiin an hriet naw am a nih?
“Chia hril khawp lohai chu hmangin,
Inthîktir ka ti cheu a,
Hnam invêthai chu hmangin,
Suklungsen ka ti cheu,” tiin
Mosiein a hril hmasatak a.
20Chun, Isaiin huoitakin,
“A mi zawng nawhai hmuin ka um a,
A mi lam nawhai kuomah inhriettirin ka um a,” a tih a.
21 #
Is 65.1-2
Amiruokchu, Israelhai thua chun,
“Mi timawhai le sêlhrâthai ta dingin,
Sûnnithlâkin ka bânhai ka phar hlak kha,” a tih a.
Currently Selected:
ROM 10: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
