ROM 9
9
Pathienin Israelhai a thlangna
1Kristaa chun thu taktak ka hril a nih, khêl ka hril nawh, Thlarau Inthieng zâra chun,a ka sie le ṭha hrietna khawmin a mi hrietpui a,
2ka lungrila hin rinumna nasatak le lungngaina bo thei naw ka nei in sawnnaw.
3Ka unauhai, tisa tienga ka chipuihai aiin, kei hi Krista kuoma inthawka ṭhe thlâk khawp hiela thusie phurin um lang ka ti lem a nih,
4 #
Ex 9.4
Israel mi an ni sih a; nau nina dâm, ropuina dâm, thuthlung po po dâm, Dân pêkna dâm, Pathien rawngbâwlna dâm, thutiemhai po po an ta a nih;
5thlatu bulhai chu an ta a ni bawk a, tisa tieng thuah Krista chu anni laia inthawka hung suok a ni sih a; ama chu thil tinrêng chunga um a na, chatuona inpâk tlâk Pathien a nih. Amen.
Pathien thutiem chu a thlâwn nawh
6Nisienlakhawm, Pathien thu chu iengkhawm ni lo anga um ta a ni nawh a. Israelhai chu Israel mi an ni vawng chuong nawh.
7 #
Gen 12.12 Abraham thlahai an ni leiin an rêngin a nauhai an ni chuong bawk nawh; “Isaka hin i thlahai tîng an tih,” ti a ni lem.
8Chu chu, tisa nauhai chu Pathien nauhai an ni nawh a, thutiem nauhai chu Abraham thlaa ngai an nih tina a nih:
9 #
Gen 18.10
Thutiem chu hi hi a nih: “Tu phâ ang hin hung ka ta, Sara chun naupasal nei a tih,” ti hi.
10Chu chau chu a ni nawh a, Rebeka khawma mi pakhat ei pa Isaka inthawka phîr a vawn lai khan,
11naute chu an la suok hmaa, a sie le aṭha an la hriet hmain thil thaw lei ni loin,
12 #
Gen 25.23
a kotu dit lei ni lemin, thlang tieng thua Pathien thu ruot chu a det theina dingin, a kuoma chun, “A upa lemin a naupang lem rawng bâwl a tih,” Pathienin a ti kha.
13 #
Mal 1.2,3; Dt 30.12,14 “Jakob chu ka hmangai a, Esau chu ka theida,” tia ziek ang khan.
Pathien chu mi fel a nih
14Ieng am hril tâng ei ta? Pathiena chun fel nawna a um am a nih? Teu lo e a!
15Ama chun, “Ka lunginsiethai po chu lunginsiet ka ta, zâ ka ngainahai po chunga chun za ngai ka tih,” tiin Mosie kuomah a hril si kha.
16Chuleiin, a dittu lei a ni nawh a, a hnawttu lei a ni bawk nawh, a lunginsiettu Pathien lei a ni lem a nih.
17Pathien Lekha Thuin Pharao kuomah, “Ahi lei ngawt hin ka tungding che a nih, nangmaa chun, ka thilthawtheina kân entir theina ding le khawvêl po poa ka hming ân thang theina dingin,” a ti sih a.
18Chuongchun, Pathienin a nuom po a lunginsiet a, a nuom po a suklulul hlak a nih.
Pathien lungsenna le zangaina
19Nang chun ka kuomah “Ieng dinga a la dem rawp am a na? A dit zâwng tûin am a kal a?” i ti ding a ni âwm a.
20Nisienlakhawm, aw mihriem, Pathien sêl veitu chu tû ang am i ni lie? Thilsiem chun a siemtu kuomah, “Ieng dinga hieng anga i mi siem am a na?” a ti ding am a nih?
21Bepil tlang khata bêl pakhat hlutak, bêl pakhat hlu nawtaka siem dingin bêl hemtu chun bêl chungah thu a nei naw am a nih?
22Lunginsenna bêl bohmang tlâkhai chunga chun, Pathienin a lunginsenna le a thilthawtheina inlangtir nuom sien khawm, a daw hrâm hrâm chun ieng am pawi a ta?
23Lunginsietna bêl, ropui dinga a lo buotsai lâwkhai chunga chun a lunginsietna hau zie ân entir theina ding a ni phawt chun.
24Chu lunginsietna bêlhai chu Judahai lai chau ni loin, Jentailhai laia inthawka kohai khawm ei nih.
25Hosea lekhabua,
“Ka mihai ni ngai lo chu, ‘Ka mihai’ tîng ka ta,
Chun, ka ihmangai ngainawnu chu, ‘Hmangainu’ tîng ka tih.
26Chun, hieng hi hung nîng a ta, an kuoma,
‘Ka mihai in ni nawh,’ tia an umna hmun ngeia chun,
Pathien hring nauhai inbûkin um an tih,” tia a hril ang ngei khan.
27Isai khawma Israelhai thu khêkpuiin,
“Israel mihai chu tuisuorieta phaiphin zâtin tam hai sien khawm, a ihrem bâk chau chu sandamin um an tih.
28Lalpa chun inrangtakin hnuoi chunga a rorêlna chu a hlen ding a ni sih a,” a ti kha.
29Isai bawkin,
“Mipuihai Lalpa chun chithlâtu mi lo hlapêk naw sien chu,
Sodom angin lo um tâng ei ta,
Gomorra anga siemin lo um tâng ei tih,” tia a lo hrillâwk ta ang khan.
Israel le Chanchin Ṭha
30Ieng am hril tâng ei ta? Jentail, felna hnawt nawhai chun felna an lo phâk tah a nih — ringna leia felna chu.
31Israel, felna dân hnawttuhai ruok chun felna dân chu an phâk zo ta nawh.
32Ieng lei am a na? Ringna leh an hnawt nawh a, thilthawa an hnawt lei a nih. Tlûkna lunga chun an tlu ta sih a;
33“Ngai ta, Ziona chun Tlûkna lung le,
Dangna lungpui ka sie a;
Tûkhawm ama ring taphawt chu
Muolpho naw ni,”
tia ziek ang khan.
Currently Selected:
ROM 9: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
