MARKA 14

Isu sukhlum dân ding thu an rêl

(Mt 26.1-5; Lk 22.1-2; Jn 11.45-53)

1 # Ex 12.1-27 Chun, ni hni hnung chun Fekân Ruoiṭhe le Chawl- ṭhanglo bei Ruoiṭhe a um ding a na; Thiempu lalhai le Dân inchûk- tirtuhai chun ama chu zâwra, mana sukhlum theina dingzie an zawng an zawng a.

2Nisienlakhawm, “Ruoiṭhe sûng chu ni naw sienla, chuong naw chun vântlâng lai buoina hung um hlau rawi a tih,” an ta.

Bethania Isu hriek nâla a um

(Mt 26.6-13; Jn 12.1-8)

3 # Lk 7.37-38 Chun, Bethania phâr Simon ina bu a fâk a, a um laiin nuhmei pakhat alabastar bûra spiknard hriek riminhnik totak chawiin a hung a, a bûr chu a sukkawi a, a lu a buok khum a.

4Nisienlakhawm, a ṭhen chu an lung a sen tâwla, “Iengdinga hriek rim inhnik hi a sukhmangthai mei mei am a na?

5Hi hriek hi duli#Denarion zathum nêka tama zawr a, pasiehai kuoma pêk thei a ni sih a,” an ta. Chuongchun, a chunga chun an chier tah a.

6Isu ruok chun, an kuomah, “To san ro, iengdinga ama in sukbuoi am a na? ka chunga hin thil mawi tak a thaw a nih.

7 # Dt 15.11 Pasiehai chu kumkhuoa in kuoma um an na, in nuom phâ phâ anni chu in lunginsiet thei annâwm, kei ruok chu kumkhuoa in kuoma um ding ka ni nawh hi.

8A thaw thei ang tâwk a thaw a nih; ka taksa hi phûm dingin a lo nâl lâwk a ni hi.

9Chuongchun, titakzetin ka hril cheu hi, khawvêl po poah, khâwlai khawm Chanchin Ṭha an hrilna taphawta chun hi nuhmei thil thaw hi ama hriet zingna dingin hril sa pei an tih,” a ta.

Judain Isûn inmantir a tum

(Mt 26.14-16; Lk 22.3-6)

10Chun, Juda Iskariot, sâwm le pahni laia mi pakhat khan, Isu chu an kuoma ân mantir theina dingin thiempu lalhai kuomah a va feh a.

11Chun, anni chun an hriet phingleh an lâwm hle a, a kuoma tangka pêk an tiem a, chuongchun, a înmantir dingzie remchâng a zawng tah a.

Isûn a inchûktirhai leh Fekân ruoi a fâk

(Mt 26.17-25; Lk 22.7-14,21-23; Jn 13.21-30)

12Chun, Chawlṭhanglo bei Ruoi- ṭhe ni hmasatak Fekan Ruoiṭhena berâmte an thatna hlak nia chun a închûktirhaiin a kuomah, “Fekân Ruoi bu i fâk theina dingin khâwlai am va siem inlang i nuom a?” an ta.

13Chuongchun, a închûktirhai laia mi pahni a tir a, an kuomah, “Khawpuiah va lût unla, pasal bêla tui putin intuokpui a ti cheu a, ama chu zui lût ro.

14Chun, a lûtna naa chun, chu in neitupa kuoma chun, ‘Inchûktirtu chun, ka închûktirhai le Fekân Ruoi bu kan fâkna ding ka mikhuol pindan chu khâwlai am a na? a tih’ ti unla.

15Chuongchun, ama ngei chun pindan chunghnung lientak, thuom- hnaw umsa, inrêlsa diem, inentir a ti cheu a, chu hmuna chun ei ta dingin va siem ro,” a ta.

16Chun, inchûktirhai chu an feh a, khawpuia chun an va lût a; an kuoma a hril ang khan an va hmuh a, chun, Fekân Ruoi bu chu an siem tah a.

17Chun, zântieng a hung ni chun, ama chu sâwm le pahnihai le chun an va fe tah a.

18 # Sm 41.9 Chun, an awt a, an fâk laiin Isûn, “Titakzetin ka hril cheu hi, nangni laia mi pakhat ka kuoma fa ve ngei hin mîn mantir a tih,” a ta.

19Chun, an lungngai ta hle a, pakhat khatin a kuomah, “Kei am ka nih?” an ti seng a.

20Ama chun an kuomah, “Sâwm le pahni laia mi pakhat thlênga a mîn chiepuitu hi a nih.

21Mihriem Naupa hi a chanchin an ziek ang tak khan a fe ding a nih; nisienlakhawm, Mihriem Naupa inmantirtu ding mihriem chung chu a rik; chu mipa chu lo insieng naw sienla a ta dingin ṭha lem a tih,” a ta.

Lalpa Zânbu phunna

(Mt 26.26-30; Lk 22.15-20; 1 Kor 11.23-26)

22Chun, an fâk laiin Isûn bei a lâk a, mal a sâwm zoin a khawi a, an kuomah a pêk a, “La ro, hi hi ka taksa a nih,” a ta.

23Chun, no a lâk a, lâwmthu a hril zoin anni a pêk a, chuongchun, an rêngin an dâwn ta seng a.

24 # Ex 24.8; Jer 31.31-34 Chun, ama chun, an kuomah, “Hi hi ka thisen, mi tamtak ta dinga suok ding thu thlungna#Ziek ṭhena chu, “Thuthlung Thar”, ti a nih chu a nih.

25Titakzetin ka hril cheu hi, Pathien rama a thar ka dâwn ni a tlung hmâkhat chu, grêp hrui raa hi dâwn nâwk ta naw ning,” a ta.

26Chuongchun, hla an sak zo chun an fe suok a, Oliv tlânga chun an fe tah a.

Peterin ân phat ding thu Isûn a hrillâwk

(Mt 26.31-35; Lk 22.31-34; Jn 13.36-38)

27 # Zek 13.7 Chun, Isûn an kuomah, “In rêngin lungniloin la um vawng in tih, ‘Berâmpu vuong ka ta, berâmhai chu indar an tih,’ ti ziek a ni sih a.

28 # Mt 28.16 Nisienlakhawm, ka thonâwk hnungin Galili ramah in hmaah fêng ka tih,” a ta.

29Peter ruok chun a kuomah, “An rêngin lungniloin um hai sienla khawm, kei chu um naw ning,” a ta.

30Nisienlakhawm, Isûn a kuom- ah, “Titakzetin ka hril che, vawisûn, vawizân le le hin âr vawi hni a khuong hmâin nangin vawi thum mîn phat i tih,” a ta.

31Ama ruok chun nasatakin, “I thinaa chun thi ve ding ni lang khawm, inphat naw tawp ka ti che,” a ta. Chuongchun, ama ang chun an ti ta seng a.

Gethsemane huona Isu a ṭawngṭai

(Mt 26.36-46; Lk 22.39-46)

32Chun, Gethsemane an ti hmun chu an tlung a; chuongchun, ama chun a închûktirhai kuomah, “Ka ṭawngṭai sûng po hitaka hin lo ṭhung ro,” a ta.

33Chun, Peter hai, Jakob hai, Johan hai chu a ṭhuoi a; nasatakin a thlaphângin a lunginzing ta bêk bêk a.

34Chuongchun, an kuomah, “Ka lungril a lungngai bêk bêk a, thipui khawp rau a nih, hitaka hin um unla inring zing ro,” a ta.

35Chun, hmatieng chun a va fe hlek a, hnuoia chun a bawkkhup a, thaw thei ni sien chu chu hun chun ama khêl dingin a ṭawngṭai a.

36“Abba, (Pa,) tinrêng i thaw thei a, hi no hi ka kuoma inthawkin la sawn rawh; nisienlakhawm, keia thu ni loin, nangma thu thu ni lem raw se,” a ta.

37Chun, a hung a, annirawi chu inin a hung hmuh a; chuongchun, Peter kuomah, “Simon, i in a ni maw? Dâr kâr khat khawm inring zingin i um thei naw maw?

38Thlêmnaa in lût nawna dingin inring zingin ṭawngṭai ro. Thlarau chun chu a pei a, tisa ruok chu a hrât naw a nih,” a ta.

39Chun, a va fe nâwk a, a thu hril ngai bawk chu hrilin a ṭawngṭai nâwk a.

40Chun, a hung kîr nâwk chun annirawi chu inin a hung hmu nâwk a, an îmu a suok hle sih a, ama dawn ngaina an hriet nawh a.

41Chun, a hung a, a vawi thumnaa chun an kuomah, “Tuhin chu in unla châwl ta ro, a hun tâwk tah! a hun chu a tlung a ni ta hi! Ngai ta u, Mihriem Naupa hi mi suolhai kutah an inmantir ding a ni hi.

42Tho unla fêng ei tiu, en ta u, a mîn mantirtu ding chu a hung hnai ta hi,” a ta.

Isu inmantirin a um

(Mt 26.47-56; Lk 22.47-53; Jn 18.2-11)

43Chun, a la hril lai zingin, Juda, sâwm le pahnihai laia mi pakhat chu a hung tlung nghâl el tah a, ama ruol chun thiempu lalhai le Dân in- chûktirtuhai le upahai kuoma inthawk, mipui chu, kâwlhnâm le hembâwk dâm chawiin an hung tlung bawk a.

44Chun, a înmantirtu ding chun, “Ka ifâwp chu ama nîng a ta, man unla feltakin ṭhuoi hmang el ro,” tîn a hmân inchikna dâm a lo hril vawng ta sa a na.

45Chuongchun, a tlung phingleh ama a va pan nghâl tah a, “Rabbi,” tiin a fâwp ngâwi ngâwi a.

46Chun, ama chu an chel a, an man tah a.

47Chun, a kuoma ngirhai laia tuin amanih a kâwlhnâm a phawi a. Thiempu Laltak suokpa chu a sât a, a nakâwr a sât thlâkpêk a.

48Chun, Isûn anni chu a biek a, an kuomah, “Kâwlhnâmhai, hembâwk- hai chawiin suomhmang man ding ang elin, mi man dingin in hung a ni maw?

49 # Lk 19.47; 21.37 Pathien biekinah ni tin inchûktirin ka um hlak a, in mi man si nawh a. Nisienlakhawm, Pathien Lekha Thu chu a hung tlung theina ding a ni hi,” a ta.

50Chun, an rêngin ama chu an zâmsan a, an tlân hmang vawng tah a.

Tlangvâl tlânsie

51Chun, tlangvâl tu amanih puon zai inhmi chaua inbelin, ama chu a zui a; chuongchun, ama chu an lo man a.

52Nisienlakhawm, a puon zai inhmi chu a mâksan a, ruokin a tlân hmang tah a.

Isu rorêltuhai hmaa a ngîr thu

(Mt 26.57-68; Lk 22.54-55,63-71; Jn 18.12-14; 19.24)

53Chun, Isu chu Thiempu Laltak kuomah an ṭhuoi a; ama ruol chun thiempu lalhai, upahai, Dân in- chûktirtuhai po po an hung khâwm a.

54Chun, Peterin hlataka hin ama chu, Thiempu Laltak in in huonna sûng tuol chen chun a zui a; chuongchun, manmihai lai chun mei lum awiin a ṭhung veh a.

55Chuongchun, Isu chu an sukhlum theina dingin thiempu lalhai le rorêltuhai po po chun ama hêkna an zawng a; an hmu si nawh a.

56Mi tamtakin khêlin an hêk a; nisienlakhawm, an hêkna thuhai chu ân hmu thei si nawh a.

57Chun, tuhai amanih an ngîr a, khêlin an hêk a,

58 # Jn 2.19 “Hi mipa hin, ‘Hi Pathien biekin kuta bâwl hi ṭhiek ka ta, ni thum kâr chauin biekin dang, kuta bâwl naw mi bâwl ka tih,’ a ti kan hriet,” an ta.

59Chuong khawm chun an hêkna thu ân hmu thei chuong nawh a.

60Chun, Thiempu Laltak chu a ngîr suok a, Isu kuomah, “Ieng- khawmin i dawn naw maw? Hienghaiin an hêkna che hi ieng tizie am a na?” tiin ân dawn a.

61Ama ruok chu a to zing a, iengkhawmin a dawn nawh a. Thiempu Laltak chun a kuomah, “Krista, Inpâk tlâk Naupa chu i ni maw?” tiin ân dawn a.

62 # Dan 7.13 Chun, Isûn, “Ni e, Mihriem Naupa hi thilthawtheina chang tienga ṭhunga, vân sûm laia hung la hmûng in tih,” a ta.

63Chun, Thiempu laltak chun a silfênhai a keithlêr a, “Hretu dang ieng dingin am ngai tâng ei ta?

64 # Lev 24.16 Pathien a hrilsietzie hlak chu in hriet tah a; iengtin am in ngai?” a ta. Chun, an rêngin ama chu thi tlâkah an ruot tâwl tah a.

65Chuongchun, aṭhen lem chun chil an sâk khum phut nghâl el tah a, a hmai an tuom a, an vuok a, a kuomah, “Hril rawh!” an tih a. Chun, manmihai khawm chun chel pumin an ben sawk sawk a.

Peterin Isu ân phat

(Mt 26.69-75; Lk 22.56-62; Jn 18.15-18,25-27)

66Chun, Peter chu hnuoi tienga in inhuonna sûng tuollaia a um laiin, Thiempu Laltak rawngbâwltu nu- nghâkhai laia pakhat a hung a.

67Peter mei lum awi chu a hmuh a, a en zing a, “Nang khawm hi Isu Nazareth mi kuoma um kha i ni hi,” a ta.

68Ama ruok chun, “I thu hril chu ka hriet naw tawp el, a ngaina hrim hrim khawm ka hriet naw tawp el,” tîn ân phah a. Chun, tuolkawt bula chun a va suok a, chuongchun, âr a khuong tah a.

69Chun, nunghâk chun a hmuh a, a kâwla ngîrhai kuoma chun, “Hi mipa hi anni laia mi a nih,” a ti nâwk a. Nisienlakhawm, ân pha nâwk a.

70Chun, a nakie deu chun a kâwla ngîrhai chun Peter kuomah, “Anni laia mi i ni ngei hi maw, Galili rama mi i ni sih a,” an tih a.

71Ama ruok chun, “Chu mihriem in hril chu ka hriet naw tawp,” tiin ṭawngsie inphurin ân khâm a.

72Chun, âr khuong vawi hnina chu a khuong nghâl tah a; chun, Peter chun Isûn a kuoma, “Âr vawi hni a khuong hmain nangin vawi thum mîn phat i tih,” a ti thu kha a hung hriet suok tah a. Chuongchun, chu thu chu a ngaituoin a ṭap tah a.

Currently Selected:

MARKA 14: HMARCLBSI

Highlight

Copy