MARKA 15
15
Pilat hmaah Isu a ngîr
(Mt 27.1-2,11-14; Lk 23.1-5; Jn 18.28-38)
1Chun, zîngkâr a hung ni phingleh thiempuhai chu upa- hai le Dân inchûktirtuhai le rorêltuhai po po leh an inrâwn a, Isu chu an phier a, an ṭhuoi a, Pilat kuomah an pêk nghâl tah a.
2Chun, Pilat chun a kuomah, “Judahai lal i ni am a nih?” tiin ân dawn a; ama chun, “I hril ang chun ka nih,” tiin a dawn a.
3Chun, thiempuhai chun kawng tamtakin an hêk a.
4Chuongchun, Pilatin ân dawn nâwk a, a kuomah, “Iengkhawmin i dawn naw maw? Ngai ta, an hêkna zozai che hi,” a ta.
5Isu ruok chun iengkhawmin a dawn ta nawh a: chuleichun, Pilat chun mak a ti hle a.
Isu thi ding thu an rêl
(Mt 27.15-26; Lk 23.13-25; Jn 18.39—19.10)
6Chun, Pilatin Ruoiṭhe ni chun mi intâng pakhat an ngên taphawt chu ân suopêk hlak a.
7Chun, mi pakhat Barabba an ti chu, helhai laia phiera intâng ve zing a na, chuonghai chun an helnaa chun tuol an that a nih.
8Chun, mipuihai chu an hang feh a, an ta dinga a thawpêk hlak anga thaw dingin an ngên tah a.
9Chuongchun, Pilatin an kuomah, “Judahai lal hi insuopêk lang cheu in nuom am?” a ta.
10(Thiempu lalhaiin an îtsîk leiin an hung ṭhuoi a ni ti a hriet sih a).
11Nisienlakhawm, Thiempu lal- hai chun mipuihai chu Barabba chu insuopêk lem dinga hni dingin an infui a.
12Chun, Pilat chun an kuomah, “Anleh Judahai lal in ti hi iengtin am thaw tâng ka ta?” tiin a dawn nâwk a.
13Anni chun, “Krawsah hemde rawh,” tiin an khêk nâwk a.
14Pilat chun an kuomah, “Iengdingin am ie? Ieng am a suksuol leh?” a ta. Nisienlakhawm, anni chu, “Krawsah hemde rawh,” tiin an khêk zuol sau a!
15Chuongchun, Pilatin mipuihai suklungawi a nuom a, Barabba chu ân suopêk tah a. Chun, Isu chu a vuok zoin krawsa hemde dingin a pêk tah a.
Sipaihaiin Isu nuiza siemnain an hmang
(Mt 27.27-31; Jn 19.2-3)
16Chun, sipaihai chun in inhuonna sûng tuollai Praitorion an tia chun ama chu an ṭhuoi lût a, an pâwla mi po po an ko khâwm a.
17Chuongchun, puon sen duk an insiltir a, hlingin lukhum an phier a, an inkhumtir a.
18Chuongchun, “Chibai, Judahai Lal,” tiin chibai an bûk a.
19Chun, a lua chun luongin an vuok a, chil an sâk khum a, dingṭhaṭhuonin chibai an bûk a.
20Chun, nuiza siemnaa an hmang zo chun, puon sen duk chu an hlîp a, ama puon an insiltir nâwk a. Krawsah hemde dingin an ṭhuoi suok tah a.
Isu hemdea a um
(Mt 27.32-44; Lk 23.26-43; Jn 19.17-27)
21 #
Rom 16.13 Chun, mi invâk mei mei pakhat, rama inthawka hung, Simon Kurinia um, Alexander le Rufa pa chu a kraws puttu dingin an man a.
22Chun, Isu chu Golgotha hmunah an ṭhuoi a, (chu chu “Luru hmun” tina a nih).
23Chun, uoin murra le pawl an pêk a,nisienlakhawm, a lâk nuom nawh a.
24 #
Sm 22.18
Chun, krawsah an hemdeh a, an chang ding hrietna dingin, aisânin a silfênhai chu an insem a.
25Chun, Isu an hemde hun chu vairik lai a nih.
26Chun, a hêkna lekha a chungah an ziek a, “JUDAHAI LAL,” tiin.
27Chun, ama ruol chun suom- hmang pahni an hemde veh a, a chang- tieng pakhat, a vawitieng pakhat.
28 #
Is 53.12 [Pathien Lekhathu, “Bawsetu- hai leh tiemsain a um tah” ti kha a hung tlung tah a.]#Ziek ṭhena Ch.28 hi a um nawh
29 #
Sm 22.7; 109.25; Mk 14.58; Jn 2.19 Chun, mi fe vêl po chun an lu thinin, “A hei! nang Pathien biekin ṭhiek a, ni thum kâra bâwl nâwktu,
30insukdam la kraws lêra kha hung ṭum ta la,” tiin an ti el a.
31Chuong ang bawkin thiempu lalhai chun, Dân inchûktirtuhai leh, anni lai chun ti elin, “Mi dang hman a sukdam hlak a, ama ân sukdam thei si nawh a.
32Ei hmuh a, ei awi theina dingin Krista, Israelhai lal chu, tuhin kraws lêra inthawkin hung ṭum ta sienla,” an ta. Chun, ama ruola an hemde vehai khawm chun ama chu an hal a.
Isu thi thu
(Mt 27.45-55; Lk 23.44-49; Jn 19.28-39)
33Chun, nisa inding huna chun, zânbu suong pha chenin khawvêl a hung inthim ta vawng a.
34 #
Sm 22.1
Chun, zânbu suong phâ chun Isu chu râwl inringtakin, “Eloi, Eloi, lama sabakthani?” tiin a khêk suok a. (Chu chu “Ka Pathien, ka Pathien, iengdinga i mi mâksan?” tina a nih).
35Chun, a kuoma ngîr ṭhenkhat chun chu chu an hrietin, “Ngai ta u, Elija a ko a nih,” an ta.
36 #
Sm 69.21
Chun, mi pakhat a tlân a, sponj uoin thûra inchie sipin, hmawl lêrah a târ a, a hang indâwntir a. “Hun raw se, ama la thla dingin Elija a hung am en ei tiu,” an ta.
37Chun, Isu chu râwl inringtakin a khêk a, a thlarau ân thla tah a.
38 #
Ex 26.31-33
Chun, Pathien biekina puonzâr chu a chungtienga inthawkin a mawng tlung rakin a lo inthlêr suo tah a.
39Chun, a hmaa sipai za hotu ngîr chun, a thlarau chuonga ân thla a hmu chun, “Hi mipa hi Pathien Naupa a ni ngei el,” a ta.
40Chun, nuhmeihai khawm hlataka thlîrin an um a; chuhai lai chun, Mari Magdalin hai, Mari, Jakob chîn le Jose nu hai dâm, le Salomi hai an ṭhang a, (chuonghai chu Galili rama a um laia ama zuia a rawng bâwlpêk hlak hai chu an nih);
41 #
Lk 8.2-3
nuhmei dang tamtak Jeru- salema ama ruola hang fe vehai chu an ṭhang bawk a.
Isu phûma a umna
(Mt 27.57-61; Lk 23.50-56; Jn 19.38-42)
42Chun, zântieng a hung ni chun Inringlâwk ni a ni leiin (chu chu Châwlni hmaa ni hi a nih),
43Josef Arimathaia mi, rorêltu inzaum, Pathien ram beisei ve mi bawk, a hung a, huoitakin Pilat kuomah a lût a, Isu ruong chu a hni tah a.
44Chuongchun, Pilatin a thi vak chu mak a ti hle a; sipai za hotu chu a ko a, a thina a sâwt ta amanih ti ân dawn a.
45Chun, sipai za hotu baua thu a hriet phing chun a ruong chu Josef kuomah a pêk a.
46Chun, ama chun puon innêm ân châwk a, ama chu a lâk thlâk a, puon innêm chun a tuom a, thlân, lung inkerkuoah ân zâl a, thlân kawtkhâr chu lungin ân del a.
47Chun, Mari Magdalin le Josef nu Mari chun an inzâlna chu an hmu zing a.
Currently Selected:
MARKA 15: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
