MARKA 16

1Chun, Châwlni a hung bo chun Mari Magdalin hai, Mari Jakob nu hai, Salomi hai chun ama nâl dinga an va fe theina ding chun thil riminhnik an inchâwk a.

2Chuongchun, ni saria ni hma- sataka, zîngkâr nisa suok hnungin, thlân chu an va tlung a.

3Chun, “Thlân kawta lung chu tuin am mîn hlum hmangpêk a ta?” an inti lai zingin,

4an hang nghah a, lung chu inhlum hmang sain an hang hmu tah a, a lien hle sih a.

5Chun, thlân sûngah an lût a, tlangvâl pakhat puon vâr silin changtieng panga ṭhung an hmuh a; an lunginzîng tah a.

6Chuongchun, ama chun an kuomah, “Lunginzing naw ro, Isu Nazareth mi, an hemde kha in zawng a ni âwm a, a thonâwk tah a, hi hin a um ta nawh; en ta u, an inzâlna hi.

7 # Mt 26.32; Mk 14.28 Nisienlakhawm, fe unla a închûktirhai le Peter kuoma chun, ‘Galili ramah in hmaa a fe ding a na; in kuoma a hril ang ngei khan chu chun hmûng in tih,’ tiin hril ro,” a ta.

8Chuongchun, an inthin a, an lunginzîng hle lai chun, an suok a, thlâna inthawk chun an tlân ta vang vang a, an ṭi luotin tu kuoma khawm iengkhawm an hril nawh a.

Mari Magdalin kuoma Isu ân lâr

(Jn 20.11-18)

9[Chun, ni saria ni hmasatak, zîngkâra a thonâwk chun, Mari Magdalin, a sûnga inthawka khawhri pasari a hnawt suokpêk kuoma khan ân lâr hmasatak a.

10Chun, ama chu Isu umpui hlakhai kuomah a va feh a, mithi ngaia an ṭaplai chu a hril tah a.

11Nisienlakhawm, anni chun, a hring nâwk a, hmu khawm a hmu ti chu an hriet dea chu an awi si nawh a.

Inchûktir pahni kuoma Isu ân lâr

(Lk 24.13-35)

12Chun, chu hnunga chun anni laia pahni ram tieng pana an fe laiin hmêl danglam putin an kuomah ân lâr nâwk a.

13Chun, anni chun inchûktir danghai kuomah an va hril a, anni thu khawm chu an awi chuong nawh a.

Isûn sâwm le pakhat hai a tir

(Mt 28.16-20; Lk 24.36-49; Jn 20.19-23; Tt 1.6-9)

14Chun, chu hnung nâwka chun buthlêng an awt laiin sâwm le pakhat hai kuom ngeiah ân lâr nâwk a, a thonâwk hnunga a hmutuhai thu chu an awi naw leiin an awi nawna le an lungril ngar kawnga chun a kâwk tâwl a.

15Chun, an kuomah, “Khawvêl po poah fe unla, thilsiemhai po po kuomah Chanchin Ṭha hi hril ro.

16Awia, baptisma chang chu sandamin um an tih; a awi naw ruok chu thiemnaw changin um an tih.

17Chun, hieng inchiknahai hin a awituhai chu zui pei a tih: Ka hmingin khawhrihai hnawt dawk an ta, ṭawng tharhaiin ṭawng an tih.

18Rûlhai kut chungah dawm an ta, thina tûr iengang khawm dâwn hai sienla iengkhawm ti naw ni hai; damnawhai chungah an kut innghat an ta, dam pei an tih,” a ta.

Vâna lâwnna

(Lk 24.50-53; Tt 1.9-11)

19 # Tt 1.9-11 Chuongchun, Lal Isu chu an kuoma thu a hril zo chun vâna zuk ṭhuoiin a um tah a, Pathien changtieng a hang ṭhung tah a.

20Chuongchun, anni chu an fe suok a, ram tinah thu an hril tah a; Lalpain anni ân thlawppui a, a zuitu inchiknahai chun an thu chu a sukdet pei a, Amen]#Ziek ṭhena chu Ch.9-20 hi a um nawh.

Currently Selected:

MARKA 16: HMARCLBSI

Highlight

Copy