MATTHAI 28
28
Isu thonâwkna thu
(Mk 16.1-8; Lk 24.1-12; Jn 20.1-10)
1Chun, Châwlni zo, ni saria ni hmasatak dinga khuo a var tâwmin, Mari Magdalin le Mari dang chu thlân en dingin an feh a.
2Chun, ngai ta, simkhawleihnuoi nasatakin a hung inhnîng a, Lalpa vântirko vâna inthawkin a hung ṭum a, lung chu a hung inhlum a, a chungah a ṭhung tah a.
3A hmêl umzie chu kâwlinlep ang a na, a silfên chu vûr angin a vâr a.
4Ama an ṭi leiin vêngtuhai chu an inthin a, mithi ang elin an hung um tah a.
5Chun, vântirko chun nuhmeihai chu a biek a, an kuomah, “Nangni chu ṭi naw ro! Isu an hemde kha in zawng ti ka hriet!
6Hitaka hin a um ta nawh; a hril ang ngeiin a thonâwk ta a nih. A zâlna hi hung en hman ta u.
7Chun, fe vak unla, a inchûktirhai kuomah, ‘Mithi laia inthawkin a thonâwk ta a nih, ngai ta u, Galili ramah in hmaah a fe, chutaka chun ama chu hmûng in tih,’ tiin hril ro. Ngai ta u, ka hril ta cheu hi,” a ta.
8Chun, ṭi le lâwm bêk bêk pumin thlâna inthawk chun an fe vat vat a, a închûktirhai hril dingin an tlân tah a.
9Chun, ngai ta, Isûn anni chu ân tuokpui a, “Chibai” a ti tâwl a. Chuongchun, anni chun a ke chu an va chel a, chibai an bûk a.
10Chun, Isûn an kuomah “Ṭi naw ro, fe unla, Galili rama fe dingin ka unauhai va hril ro; chutaka chun mi hmûng an tih,” a ta.
Thlân vêngtuhai thuhril
11Chun, an va fe lai chun vêngtu sipai ṭhenkhat chu khawpuiah an va lût a, thil umzie po po chu thiempu lalhai kuomah an va hril a.
12Chun, upahai leh an inkhâwma an inrâwn zoin sipaihai kuoma chun tangka tamtak an pêk a,
13“ ‘Zânah kan in kârin a închûk- tirhai chu an hung a, ama an inrûk a nih,’ ti ro.
14Chun, Bawrsâpin chu chu a hriet chun ama chu thlêm kan ta, lunginhâng loin siem kan ti cheu,” an ta.
15Chuongchun, tangka chu an lâk a, an iti ang pei chun an ti tah a; chuongchun, tu chen hin chu thu chu Judahai laiah an la hril ta pei a nih.
Isûn sâwm le pakhat hai a tirsuok
(Mk 16.14-18; Lk 24.36-49; Jn 20.19-23; Tt 1.6-8)
16 #
Mt 26.32; Mk 14.28 Nisienlakhawm, inchûktir sâwm le pakhat hai chu Galili ramah, Isûn tlâng a iruot pêka chun an feh a.
17Chun, ama an hmu chun chibai an bûk a, ṭhenkhat ruok chun an ringhlah a.
18Chuongchun Isu chu an kuomah a hung a, anni rawi chu a biek a, “Hnuoi le vâna thuneina po po ka kuomah pêk a ni tah.
19“Chuongchun, fe unla, hnam tina mi inchûktir dâmin siem unla, Pa le, Naupa le, Thlarau Inthieng hming chun baptist unla;#Tit 1.8
20thu ka ipêk po po cheu pawm dingin inchûktir ro. Chun, ngai ta u, kei kumkhuoin khawvêl tâwp chen khawmin in kuomah um pei ka tih,” a ta.
Currently Selected:
MATTHAI 28: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
