MARKA 1

Baptistu Johan le a thu hril

(Mt 3.1-12; Lk 3.1-9,15-17; Jn 1.19-28)

1Pathien Naupa Isu Krista Chanchin Ṭha hung tlung phutna chu.

2 # Mal 3.1 Zâwlnei Isai lekhabua,

“Ngai ta, ka tirko i hmaah ka tir a,

Ama chun i lampui siem a tih,”

3 # Is 40.3 Thlalêra mi khêk râwl chun,

‘Lalpa lamlien buotsai unla,

A lampuihai suktlûn ro,’ a tih,” tia inziek ang khan.

4Johan, thlalêra Baptistu kha suksuolnahai ngaidamna dingin sim- na baptisma thu hrilin a hung suok a.

5Chun, Judai rama mi po po le Jerusalema mi po pohai chu a kuomah an feh a, an suolhai thupha chawiin Jordan vadungah a kuomah baptisma an chang tâwl a.

6 # 2 Lal 1.8 Chun, Johan chu sanghâwngsei hmul puonin ân thuom a, a kâwngah savun kâwngkhiin ân khit a, rama khuoizu le khâuṭhikṭhi buin a ring a.

7Chun, “Ka hnungah keia nêka ropui lem a hung zing a nih; kûna a kekawk hrui sût tlâk khawm ka ni nawh.

8Kei chun tuiin ka baptis hlak cheu a; ama ruok chun chu Thlarau Inthiengin a baptis ding cheu a nih,” tiin a hril a.

Isu baptisma changna

(Mt 3.13-17; Lk 3.21-22)

9Chuong nihaia chun Isu Galili rama Nazaretha inthawkin a hung a, Jordan vadungah Johan kuomah baptisma a chang tah a.

10Chuongchun, tuia inthawka a hung suok phingle chun, vân in- hawnga Thlarau vâṭhu angin ama chunga hung ṭum a hmu tah a.

11Chun, “Nang ka Naupa dittak i nih, i chungah ka lungni bêk bêk a nih,” tiin vâna inthawkin râwl a hung suok a.

Isu thlêma a um thu

(Mt 4.1-11; Lk 4.1-13)

12Chu phingleh Thlarau chun thlalêrah ama a tir suok tah a.

13Chuongchun, Setan ithlêmin ni sâwmli zet thlalêra chun a um a, ramsahai lai a um a, vântirkohai chun a rawng an bâwlpêk a.

Isûn a sinthaw a phut

14Chun, Johan an man hnungin Isu, Pathien Chanchin Ṭha hrilin Galili ramah a hung a;

15 # Mt 3.2 “Hun chu a hung tlung tah a, Pathien ram khawm a hung hnai tah a, sim unla Chanchin ṭha hi ring ro,” a ti pei a.

Isûn nga mantu pali a ko

(Mt 4.18-22; Lk 5.1-11)

16Chun, Galili dîl panghrûla a fe laiin Simon le Simon unaupa Andri chu dîla chun lên dêngin a hmuh a; nga mantu an ni hrim a.

17Chun, Isûn an kuomah, “Mi zui ro, chuongchun, mihriem mantu dingin siem ka ti cheu,” a ta.

18Chuongchun, lênhai chu mâk- sanin an zui tah a.

19Chun, tâwite a hei fe chun, Zebedai naupa Jakob le a unau Johan chu a hmuh a, anni khawm chu an lênhai siemṭhain lawnga bawk an um a.

20Chun, anni khawm chu a ko nghâl tah a: chuongchun, an pa Zebedai chu inhlawfa an iruoihai kuoma chun lawngah an mâksan a, an zui tah a.

Khawhri inthiengnaw iman chu

(Lk 4.31-37)

21Chun, Kapernaumah an va feh a, chun Châwlni chun inkhâwmna inah a lût a, ân chûktir nghâl tah a.

22 # Mt 7.28-29 A thu inchûktir chu mak an ti hle a, Dân inchûktirtuhai ang loa, thuneina nei taka anni ân chûktir leiin.

23Chun, an inkhawmna ina chun khawhri inthieng naw nei mi pakhat a lo um a;

24ama chun, “Nazareth Isu, keini le nang ieng am ei inzâwlna a um a? Mi sukbohmang dingin i hung am a nih? Nang ka hriet che, Pathien mi inthieng i nih,” tiin a khêk suok nghâl tah a.

25Chun, Isûn a hal a, “To la, a sûnga inthawkin hung suok rawh,” a ta.

26Chun, khawhri inthieng naw chun ama a sawisah a, inringtakin a khêk a, a sûnga chu a hung suok tah a.

27Chun, an rêngin mak an ti ta bêk bêk a, chuongchun, “Ahi ieng am a ni ta leh, inchûktirna thar a ni hi tên! Khawhri inthieng naw khawm thuneitakin thu a pêk a, a thu an awi pei el hi,” tiin an insêl a.

28Chun, Galili ram vêl po poah, ram tinah a chanchin ân thang nghâl tah a.

Isûn Peter tarpinu a sukdam

(Mt 8.14-15; Lk 4.38-39)

29Chun, inkhâwmna ina inthawk- a an suok chun, Simon le Andri inah Jakob leh Johan leh an lût a.

30Chun, Simon tarpinu khaw- sikin a nah a, a lo zâl a; chuongchun, a umzie chu Isu an hril nghâl tah a;

31chun, ama chun, a kut a va chel a, a keitho tah a. Chuongchun, a khawsik chu a bo tah a, an rawng a bâwlpêk tah a.

Khawhri hnawt dawkna le mi tamtak sukdamna

(Mt 8.16-17; Lk 4.40-41)

32Chun, zântienga nisa tlâk hnung chun, damnaw po po le khaw- hri iman dâm a kuomah an hung ṭhuoi a.

33A khuo chun kawtkhâr bulah an hung inkhâwm tup el tah a.

34Chuongchun, mi tamtak natna tinrêng invawihai chu a sukdam a, khawhri tamtak a hnawt suok bawk a; khawhrihai chun ama an hriet leiin an ṭawng a phal nawh a.

Isu thuhril dingin an zin suok

(Lk 4.42-44)

35Chun, zîngkâr inhmatakin, khawvar hma daiin a tho a, a suok a, hmun fienrielah a va feh a, chutaka chun a ṭawngṭai a.

36Chun, Simon le a ruolhai chun an hnawtzui a;

37ama an va hmu chun, a kuomah, “Mi po poin an zawng che i sawnnâwm ie,” an ta.

38Ama chun an kuomah, “Hmun danga khaw hnaiahai dâm chun fêng ei tiu, chuonga hai khawm chun thu ka hril theina dingin, hi lei taka hung ka ni nghâl a,” a ta.

39 # Mt 4.23; 9.35 Chuongchun, thu hrila, khaw- hrihai khawm hnawt suok peiin Galili ram po poa an inkhâwmna inahai chun a lût pei a.

Phâr sukdamna

(Mt 8.1-4; Lk 5.12-16)

40Chun, a kuomah phâr a hung a, “I nuom chun i mi sukthieng thei,” a ta, a hmaah a dingṭhaṭhuon a, a ngên rak el a.

41Ama chun a lo lunginsiet bêk bêk a; a hei ban a, a them a, “Ka nuom ie, sukthiengin lo um ta rawh,” a ta.

42Chuongchun, kârloin ân phârna chu a bo nghâl el tah a, a hung inthieng tah a.

43Chun, ama chu hril lo dingin a tiem tlat a, ân fetir tah a;

44 # Lev 14.1-32 a kuomah, “Tu kuoma khawm iengkhawm va hril dêr naw raw kha; nisienlakhawm, thiempu kuomah vân entir la, an hriet fel theina dingin Mosie thil ruothai kha i înthienna dingin vân hlân rawh,” a ta.

45Nisienlakhawm, ama chu a suok a, tlânginsamin chu thu chu a phuong dar phut el tah a; chuongchun, Isu chu inphuongtakin khuo a lût thei ta nawh a; thlalêr hmunahai a um lem tah a; chun hmun tina mi a kuomah an hung hlak a.

Currently Selected:

MARKA 1: HMARCLBSI

Highlight

Copy