MATTHAI 27
27
Bawrsâp Pilat hmaa Isu a ngîr
(Mk 15.1; Lk 23.1-2; Jn 18.28-32)
1Chun, zîngkâr a hung ni chun, thiempu lalhai le vântlâng upahai po po chu Isu sukhlum dingin a chungthuah an inrâwn a;
2chun, an khuop a, an ṭhuoi a, Bawrsâp Pilat kuomah an pêk tah a.
Juda thi thu
(Tt 1.18-19)
3 #
Tt 1.18-19 Chun, Juda ân mantîrtu khan Isu thiemnaw an inchangtir ti a hriet phingleh ân sîr a; tangka sâwmthum kha thiempu lalhai kuoma chun a hung chawi nâwk a,
4“Mi thiem thisen kân mantir kha thil ka suksuol a nih,” a ta. Anni ruok chun, “Chu chu kan ta dingin ieng am pawi a ta? Nangin i thaw thawin thaw rawh,” an ti san a.
5Chun, ama chun tangka chu hmun inthienga chun a pei lût a; a fe hmang a, a vân âwkhlum tah a.
6Chun, thiempu lalhai chun tangka chu an lâk a, “Hi hi thawlâwm bâwma sie a thieng nawh ie, thisen man a ni sih a,” an ta.
7Chuongchun, an inrâwn a, mikhuolhai phûmna dingin bêlhemtu hmun chu an inchâwk tah a.
8Chu lei chun a nih, chu hmun chu tu chena, “Thisen Hmun,” an ti chu.
9Chu lai chun, zâwlnei Jeremiain hieng thu a hril hi a hung tlung tah a:
“Chun, tangka sâwmthum,
An isak man,
Israel thla tuhaiin amanih an isak man chu,
An lâk a;
10 #
Zek 11.12-13
Lalpain a mi tiem angin,
Belhemtu hmun man dingin an pêk a,”
ti hi.
Isu Pilat hmaah a ngîr
(Mk 15.2-5; Lk 23.3-5; Jn 18.33-38)
11Chun, Isu chu Bawrsâp hmaa chun a ngîr a. Chun, Bawrsâp chun, “Judahai lal i ni?” tîn ân dawn a. Chun, Isûn, “I hril ang chun ka nih,” a ta.
12Chun, thiempu lalhai le upa- haiin an hêk laiin iengkhawmin a dawn nawh a.
13Chuongchun, Pilatin a kuomah, “An hêkna zozai che hi i hriet naw am a nih?” a ta.
14Chun, bau khat khawmin a dawn nawh a; chuongchun, Bawrsâp chun mak a ti hleh a.
Isu thi ding an rêl
(Mk 15.6-15; Lk 23.13-25; Jn 18.39—19.6)
15Chun, Bawrsâpin ruoiṭhe ni chun, mi intâng pakhat an dit taphawt mipuihai chu ân suopêk hlak a.
16Chun, chu lai chun, mi intâng hming inthangtak Barabba an ti chu an nei a.
17Chuongchun, an hung inkhâwm chun, Pilatin an kuomah “Tu am in- suopêk lang cheu in nuom a? Barabba am, Isu, Krista an ti chu?” a ta.
18Thîkna leiin ama chu an inmantir ti a hriet sih a.
19Chun, rorêlna ṭhungphaa ân ṭhung lai chun, a nuhmeiin, “Kha mi feltak chunga khan iengkhawm thaw naw rawh; vawisûn hin ama leiin mangah thil tamtak ka tuor a nih,” tiin ân chah a.
20Chun, thiempu lalhai le upa- haiin Barabba hnia, Isu sukhlum dingin mipuihai chu an thlêm a.
21Bawrsâp ruok chun anni chu a biek a, “Anni pahni chu a tu lem am insuopêk lang cheu in nuom a?” a ti nâwk a. Anni chun, “Barabba” an tih a.
22Pilatin an kuomah, “Isu, Krista an ti hi iengtin am thâwng ka ti leh?” a ta. An rêngin, “Krawsah inhemdêtir rawh,” an tih a.
23Chun, ama chun, “Iengdingin am ie? Ieng am a suksuol leh?” a ta. Nisienlakhawm, anni rawi chun “Krawsah inhemdêtir rawh,” tiin an khêk rak rak a.
24 #
Dt 21.6-9 Chuongchun, Pilatin ieng- khawm thaw thei loa buoi tieu tieu ding a nih ti a hrietin, tui a lâk a, mipui hmaa chun a kut a sâwp a, “Hi mi fel thisena hin kân thieng; nang- nîn in thaw thawin thaw ro,” a ta.
25Chun, vântlâng po po chun, “A thisen chu keini chunga le, kan nauhai chungah um raw se,” tiin an dawn a.
26Chu zoa chun Barabba chu ân suopêk tah a; Isu ruok chu a vuok a, krawsa hemde dingin a pêk tah a.
Sipaihaiin Isu an deusâw
(Mk 15.16-20; Jn 19.2-3)
27Chu zoa chun, Bawrsâp sipaihai chun Isu chu lal inah an ṭhuoi lût a, an pâwla mi po po a kuomah an ko khâwm a.
28Chuongchun, a puonhai dâm an hlîppêk a, puon sen an insiltir a.
29Chun, hling lukhum an phier a, an inkhumtir a, a kut changtieng luong an inchawitir a; a hmaah an dingṭhaṭhuon a, “Chibai, Judahai lal,” tiin nuiza siemnain an hmang a.
30Chun, chil an sâk khum a, luong chu an lâkpêk a, a lua chun an vuok a.
31Chun, nuiza siemnaa an hmang zoin, puon chu an hlîppêk a, ama puonhai chu an insiltir nâwk a; krawsa hemde dingin an ṭhuoi tah a.
Isu hemdea a um
(Mk 15.21-32; Lk 23.26-43; Jn 19.17-27)
32Chun, an fe suok laiin Kurini khuoa mi, a hming Simon an hmuh a; chu mipa chu a kraws put dingin an man a.
33Chun, Golgotha an ti hmun an hung tlung a, (chu chu, “Luru hmun,” tina a nih)
34uoin thûr, thil kha le pawl, a dâwn dingin an pêk a, nisienla- khawm ân tem phingin a dâwn nuom ta nawh a.
35 #
Sm 22.18
Chun, krawsah an hemde zoin, aisânin a silfênhai chu an insem a.
36Chun, chutaka chun an ṭhung a, an vêng a, a hêkna —
37“HI MIPA HI ISU JUDAHAI LAL A NIH,” tia ziek a lu chungah an bel a.
38Chun, ama ruol chun, suom- hmang pahni an hemde veh a, a changtieng pakhat a vawitieng pakhat.
39 #
Sm 22.7; 109.25 Chun, mi inlawn taphawt chun an lu thinin, an tiel a,
40 #
Mt 26.61; Jn 2.19 “Nang Pathien biekin ṭhiek a, ni thuma bâwl nâwktu, insukdam rawh, Pathien Naupa i ni chun, krawsa kha hung ṭum ta la,” tiin.
41Chuong ang bawkin thiempu lalhai chun, Dân inchûktirtuhai le upahai leh tielin,
42“Mi dang hman a sukdam hlak a; ama le ama ân sukdam thei si nawh a. Israel lal a nih annâwm, tuhin krawsa inthawkin hung ṭum ta sien la, chuongchun, ama awi nâwm ei ni!
43 #
Sm 22.8
Pathien a awi annâwm, ama hi a nuom chun tuhin sandam raw se, ‘Pathien Naupa ka nih,’ a ti sih a,” an ta.
44Suomhmang an hemde vehai khawm chun, chuong ang bawkin an ti el veh a.
Isu thina thu
(Mk 15.33-41; Lk 23.44-49; Jn 19.28-30)
45Chun, nisa indinga inthawka zânbu suong pha chenin khawvêl a hung inthim ta vawng a.
46 #
Sm 22.1
Chun, zânbu suong pha vêl chun, Isu chu râwl inringtakin, “Eli, Eli lama sabakthani” tiin a khêk suok a. (Chu chu, “Ka Pathien, ka Pathien, iengdinga i mi mâksan?” tina a nih.)
47Chun, a kâwla ngîr ṭhenkhathai chun chu chu an hrietin, “Hi mipa hin Elija a ko a nih,” an ta.
48 #
Sm 69.21 Chun, an laia mi pakhat a tlân nghâl tah a, sponj a lâk a, uoin thûr ân chie sip a, hmawlah a târ a, a hang indâwntir a.
49Chun, mi danghai chun, “Um raw se, ama la dingin Elija a hung am en ei tiu,” an ta.
50Chun, Isu chu râwl inringtakin a khêk nâwk a, a thlarau ân thla tah a.
51 #
Ex 26.31-33
Chun, ngai ta, Pathien biekina puonzâr chu a chung tienga in- thawkin a hnuoi tieng chenin, a lo tlêr suok tah a; chun, simkhawleihnuoi dâm ân hnîng a, lungpuihai an hung kawi a;
52thlânhai an hung inhawng a; mi inthieng in tahai taksa tamtak khawm keithoin an um tah a;
53chuonghai chu a thonâwk hnunga chun, thlâna inthawka hung suokin khaw inthienga chun an lût a, mi tamtak kuomah an inlâr tah a.
54Chun, sipai za hotu le a kuoma Isu vênga um vehai chun, simkhaw- leihnuoi inhnîng le thil umziehai chu an hmu chun an ṭi ta bêk bêk a, “Hi mipa hi Pathien Naupa a ni ngei el,” an ta.
55Chun, chutaka chun nuhmei tamtak, a rawngbâwlpêk pum peia Galili rama inthawka Isu hung zuituhai chu an um a; hlatakah an thlîr a;
56chuonghai lai chun Mari Magdalin hai, Mari, Jakob le Josef nu hai, Zebedai naupahai nuhai rawi an ṭhang a.
Isu phûma a umna
(Mk 15.42-47; Lk 23.50-56; Jn 19.38-42)
57Chun, zântieng a hung ni chun, mi hausa, a hming Josef, Arimathaia mi a hung a, ama ngei khawm chu Isu inchûktir a ni bawk a.
58Chu mipa chu Pilat kuomah a va feh a; Isu ruong chu a hnih a. Chun, Pilatin pêk din gin thu a pêk a.
59Chuongchun, Josef chun ruong chu a lâk a, puon zai inhmi fâitakin a tuom a;
60ama thlân thar, lung a iverkuoa chun ân zâl a, thlân kawtkhâr chu lung lientakin ân del a, a fe tah a.
61Chun, chutaka chun, Mari Magdalin le Mari dang chu an um a, thlân hma zâwna chun an ṭhung a.
Thlân vêng thu
62Chun, a zînga chun (chu chu Inringlâwk ni zo tûk a nih) thiempu lalhai le Pharisaihai chu Pilat kuomah an um khâwm dup a,
63 #
Mt 16.21; 17.23; 20.19; Mk 8.31; 9.31; 10.33-34; Lk 9.22; 18.31-33 “Pu, chu hlêmtu chun, a dam lai khan ‘Ni thum chenah thonâwk ka tih,’ a ti kan hriet zing a.
64Chuongchun, thlân chu ni thum ni chen vêng ṭha dingin thu pe rawh, chuong naw chun a inchûktirhai chu hungin, ama chu inru hlau an ta, vântlâng kuomah, ‘Mithi laia in- thawkin a thonâwk ta a nih,’ ti rawi an tih; chuongchun, hlêmna nuhnung lem chu a hmasa nêk khan ṭha naw nâwk zuol a tih,” an ta.
65Pilatin an kuomah, “Vêngtu sipaihai in nei annâwm, fe unla in thei ang angin invêngṭhattir ta unla,” a ta.
66Chuongchun, vêngtu sipaihai leh an feh a, thlân chu an invêng ṭhattir a, lung chu an inchik a.
Currently Selected:
MATTHAI 27: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
