MATTHAI 26

Isu sukhlum ding thu an rêl

(Mk 14.1-2; Lk 22.1-2; Jn 11.45-53)

1Chun, Isûn chuong thu po po chu a hril zoin, a închûktir hai kuomah,

2 # Ex 12.1-27 “Ni hni chenah Fekân ruoi a hung um ding a nih ti in hriet a, Mihriem Naupa hi hemde dingin an inmantir ding a nih,” a ta.

3Chu lai chun, Thiempu laltak Kaiapha an ti in inhuon sûnga chun thiempu lalhai le vântlâng upahai an inkhâwm a;

4Isu chu zâwra mana, an sukhlum theina dingin an inrâwn a.

5Nisienlakhawm, “Ruoiṭhe sûng chu ni naw sien la, chuong naw chun vântlâng lai buoina hung um rawi a tih,” an ta.

Bethania Isu hriek nâla a um

(Mk 14.3-9; Jn 12.1-8)

6Chun, Isu Bethaniah inphâr Simon inah a um lai chun,

7 # Lk 7.37-38 nuhmei pakhat alabastar bûra hriek rim inhnik totak chawiin a kuomah a hung a, a buthlêng awt laiin a luah a buok a.

8Nisienlakhawm, inchûktirhaiin chu chu an hmu chun an lunginsen a.

9“Iengdinga hienga a sukhmang- thai mei mei am a na? Hi hriek hi man tamtaka zawra, pasiehai kuoma pêk thei a ni sih a,” an ta.

10Isu ruok chun chu chu a hrietin an kuomah, “Nuhmei hi iengdinga in sukbuoi am a na? Ka chunga hin thil ṭhatak a thaw a nih.

11 # Dt 15.11 Pasiehai chu kumkhuoa in kuoma um an nih annâwm, kei ruok chu kumkhuoa in kuoma um ding ka ni nawh.

12Hi hriek rim inhnik ka taksaa a ibuok hi, phûm dinga mi buotsai dingin a thaw a ni hi.

13Titakzetin ka hril cheu hi, khawvêl po poah khâwlai khawm hi Chanchin Ṭha hi an hrilna poah, hi nuhmei thil thaw khawm hi ama hriet zingna dingin hril ve pei an tih,” a ta.

Judain Isu inmantir a tum thu

(Mk 14.10-11; Lk 22.3-6)

14Chu hnunga chun sâwm le pahni laia mi pakhat, Juda Iskariot an ti chu, thiempu lalhai kuomah a fe a,

15“Ama chu inmantir ka ti cheu a ieng am mi pêng in ta?” a ta. Chun, tangka sâwmthum an bûkpêk tah a.

16Chu chena inthawk chun in- mantirna remchâng a zawng tah a.

Fekân ruoi

(Mk 14.12-21; Lk 22.7-14,21-23; Jn 13.21-30)

17Chun, Chawlṭhanglo Bei Ruoi- ṭhe ni, ni hmasataka chun, inchûk- tirhai chu Isu kuomah an hung a, “Fekân ruoi bu fâkna dingin khâwlai am buotsai pêk inlang che i nuom a?” an ta.

18Ama chun, “Khawpuiah tu amani kuomah fe unla, a kuomah, ‘Inchûktirtu chun, ka hun a hnai tah a; ka închûktirhai leh Fekân ruoi i inah ṭhêng kan tih, a tih,’ va ti ro,” a ta.

19Chun, Isûn an kuoma a ti ang chun inchûktirhai chun an thaw a, Fekân ruoi ding chu an buotsai tah a.

20Chun, khuo a hung inhnu chun, inchûktir sâwm le pahnihai leh buthlêng an awt a;

21chun, an fâk laiin ama chun, “Titakzetin ka ti cheu hi, in laia mi pakhat hin mîn mantir a tih,” a ta.

22Chun, an lungngai ta bêk bêk a, a kuomah, “Lalpa, kei am ka nih?” an ti ta seng a.

23 # Sm 41.9 Ama chun, “Thlênga mi purpui- tu ngei chun mîn mantir a tih.

24Mihriem Naupa hi a chanchin an ziek angtak khan a fe ding a nih, nisienlakhawm, Mihriem Naupa inman- tirtu ding mipa chung chu a rik! chu mihriem chu insieng naw sien la, a ta dingin ṭha lem a tih,” tiin a dawn a.

25Chun, ân mantirtu ding Juda chun a dawn a, “Rabbi, kei am ka nih?” a ta. Ama chun a kuomah, “în ti zing chu teh,” a ta.

Lalpa zânbu phunna

(Mk 14.22-26; Lk 22.15-20; 1 Kor 11.23-26)

26Chun, an fâk laiin Isûn bei a lâk a, mal a sâwmpêk a, a khawi a; chun, inchûktirhai kuomah a pêk a, “La unla, fa ro, hi hi ka taksa a nih,” a ta.

27Chun, no a lâk a, lâwmthu a hril a, an kuomah a pêk a, “In rêngin dâwn ro;

28 # Jer 31.31-34; Ex 24.8 hi hi ka thisen, suolhai ngai- damna dinga mi tamtak ta dinga suok ding, thuthlungna#Ziekna ṭhena “thuthlung thar” ti a nih chu a nih

29Nisienlakhawm, ka hril cheu hi, ka Pa rama nangni le a thar ka dâwn ni a tlung hmakhat chun tuta inthawkin grêp hrui raa hi dâwn nâwk ta naw ning,” a ta.

30Chun, hla an sak zoin an suok a, Oliv tlânga chun an fe tah a.

Peterin ân phat ding thu hrillâwkna

(Mk 14.27-31; Lk 22.31-34; Jn 13.36-38)

31 # Zek 13.7 Chun, Isûn an kuomah, “Vawizân hin in rêngin ka chung- thuah lungnilovin um vawng in tih, ‘Berâm vêngtu chu vuong ka ta, berâm ruol chu indar an tih,’ ti ziek a ni sih a.

32 # Mt 28.16 Nisienlakhawm, ka thonâwk hnungin Galili ramah in hmaah fêng ka tih,” a ta.

33Peter ruok chun a kuomah, “An rêngin i chungthuah lungnilovin um- hai sien khawm, kei chu lungnilovin um nâw tawp ka tih,” tiin a dawn a.

34Isûn a kuomah, “Titakzetin ka hril che, vawizân hin âr a khuong hmain, nangin vawithum mîn phat i tih,” a ta.

35Peterin a kuomah, “I thinaa chun thi ve ding ni lang khawm inphat naw tawp ka ti che,” a ta. Chuong ang bawk chun, inchûktirhai po po chun an ti ta seng a.

Gethsemane huona a ṭawngṭai

(Mk 14.32-43; Lk 22.39-46)

36Chu zoa chun Isu annihai le chun, hmun pakhat Gethsemane an ti chu an tlung a, chun, ama chun a închûktirhai kuomah, “Sawtaka ka va ṭawngṭai sûng po hitaka hin lo ṭhung ro,” a ta.

37Chun, Peter le Zebedai nauhai pahni chu a ṭhuoi a, a lungngaiin a lunginzîng ta bêk bêk a.

38Chun, an kuomah, “Ka lungril a lungngai bêk bêk a; thina khawp rau a nih. Hitaka hin um unla mi vêngpui ro,” a ta.

39Chun, tlâwmtên hma tieng a va fe dep a, a bawkkhup a, “Aw Pa, a thei chun, hi no hin mi khêl hrâm raw se; nisienlakhawm, keima thu ni loin, nangma thu thu ni lem raw se,” tiin a ṭawngṭai a.

40Chun, inchûktirhai kuoma chun a hung a, anni chu inin a hung hmuh a, Peter kuomah, “E khai! nangnîn dârkâr khat khawm in mi vêngpui thei naw a ni maw?

41Thlêmnaa in lût nawna dingin inring zingin ṭawngṭai ro; thlarau chun chu a pei a, tisa ruok chu a hrât naw a nih,” a ta.

42Chun, vawi hninaah a va feh a, a ṭawngṭai nâwk a, “Aw Pa, ka dâwn loa hi no hin a mi khêl thei lul naw chun, nangma thu thu ni raw se,” a ta.

43Chun, a hung nâwk a, anni chu inin a hung hmu nâwk a, an îmu a suok hle sih a.

44Chun, a fe san nâwk a, a vawi thumnaah a thu hril ngai hrilin a ṭawngṭai nâwk a.

45Chu zoa chun, inchûktirhai kuomah a hung nâwk a, an kuomah, “Tuhin chu in unla châwl ta ro! Ngai ta u; a hun chu a hung tlung tah a, Mihriem Naupa hi mi suolhai kutah an inmantir ding a ni hi.

46Tho unla, fêng ei tiu, a mîn mantirtu ding chu a hung hnai ta hi,” a ta.

Isu an manna thu

(Mk 14.43-50; Lk 22.47-53; Jn 18.2-11)

47Chun, a la hril lai zingin Juda, sâwmpahni hai laia mi pakhat chu, a hung tlung tah a, ama ruol chun thiempu lalhai le upahai kuoma inthawkin mipui nasatak, kâwlhnâm le hembâwk chawiin an hung tlung bawk a.

48Chun, ân mantirtu ding chun inchikna ding a lo hrillâwk hieu a, “Ka ifâwp taphawt chu ama nîng a tih, man el ro,” tiin.

49Chuongchun, Isu chu a va pan nghâl tah a. “Chibai, Rabbi,” tiin a fâwp ta ngâwi ngâwi a.

50Chun, Isûn a kuomah, “Ruola, i hungna san chu thaw rawh,” a ta. Chu phingleh Isu chu an chel a, an man tah a.

51Chun, ngai ta, Isu rawihai laia pakhat chun a kutin a ban a, a kâwl- hnâm a phawi a, Thiempu Laltak suok chu a sât a; a nakâwr a sât thlâkpêk a.

52Chun, Isûn a kuomah, “I kâwl- hnâm kha a sienaah sie nâwk rawh, kâwlhnâm ruoituhai po po chu kâwlhnâm bawkin an thi ding a ni sih a.

53Tukhawm hin vântirko sâng ruk#Legion. Rome sipai, 6,000 pâwl hming a nih hmun sâwm le hmun hni nêka tam lem mi hung tirpêk dingin ka Pa kuomah ngên thei naw dingin in mi ring am a nih?

54Nisienlakhawm, ngên ang lang, iengtin am Pathien Lekha Thu-hieng anga hung um ding thu hi-tlung thei a ti leh?” a ta.

55 # Lk 19.47; 21.37 Chu lai chun, Isûn mipuihai kuoma chun, “Kâwlhnâmhai, hem- bâwkhai châwiin suomhmang man ding ang elin a mi man dingin in hung suok a ni maw? Pathien biekinah ni tin inchûktirin ka ṭhung hlak a, in mi man si nawh a.

56Nisienlakhawm, zâwlnei lekha thuhai a tlung theina dingin hieng po po hi a hung tlung tah a ni hi,” a ta. Chu lai chun, inchûktirhai po po chun ama an thlathlam a, an tlân hmang ta vawng a.

Thiempu lal hmaa Isu a ngîr

(Mk 14.53-65; Lk 22.54-55,63-71; Jn 18.12-14,19-24)

57Chun, Isu mantuhai chun, Thiempu Laltak Kaiapha ina Dân Inchûktirtuhai le upahai um khâwmnaa chun ama chu an ṭhuoi tah a.

58Nisienlakhawm, Peterin hla- taka inthawkin ama chu a zui a, Thiempu laltak in inhuonna sûng tuol chenin; chun, a va lût a, a tâwpna hmu dingin siehlawhai lai chun a ṭhung ve a.

59Chun, ama an sukhlum theina dingin thiempu lalhai le rorêltuhai po po chun Isu hêkna an zawng a;

60hretu tehlêm tamtak hung hai sien khawm an hmu si nawh a. A nakie ruok chun mi pahni an hung a,

61 # Jn 2.19 “Hi mipa hin, ‘Pathien biekin hi ṭhiek a, ni thum sûnga bâwl nâwk thei ka nih,’ a tih,” an ta.

62Chuongchun, Thiempu Laltak chu a ngîr suok a, a kuomah, “Iengkhawmin i dawn naw maw? Hienghaiin an hêkna che hi iengtizie am a na?” a ta. Isu ruok chu a to zing a.

63Chun, Thiempu Laltak chun a kuomah, “Pathien hring hmingin ka vau che, Krista, Pathien Naupa chu i ni am a nih? mi hril rawh,” a ta.

64Isûn a kuomah, “I hril ang chun ka nih; chu nawa khawm, ka hril cheu hi, hi hnung leh Mihriem Naupa hi thilthawtheina changtienga ṭhunga, vân sûm chunga hung in la hmu ding a nih,” a ta.

65Chun, Thiempu Laltak chun a silfênhai a keithlêr a, “Pathien a hrilsiet tah; hretu dang iengdingin am ngai tâng ei ta? Ngai ta u, Pathien a hrilsietzie chu tuhin in hriet tah. Iengtin am in ngai a?” a ta.

66Anni chun, “Thi tlâk a nih,” tiin an dawn a.

67Chun, a hmaiah chil an sâk a, kutin an hnawk a;

68chun, aṭhen chun, “Nang Krista, tuin am a ben cheh a? mi hril rawh,” tiin an ben a.

Peterin Isu ân phat

(Mk 14.66-72; Lk 22.56-62; Jn 18.15-18,25-27)

69Chun, Peter chu in inhuon sûng tuollaia chun a ṭhung a; chun, nunghâk pakhat a kuomah a hung a, “Nang khawm, Isu, Galili rama mi kuoma um kha i ni hi,” a ta.

70Ama ruok chun, “I thu hril chu ka hriet dêr nawh,” tiin an rênga hmaah ân phat a.

71Chun, tuol kawt bula chun a va suok phingleh nunghâk dangin ama chu a hmuh a, chutaka umhai kuoma chun, “Hi mipa khawm hi Isu Naza- reth mi kuoma um kha a ni hi,” a ta.

72Chun, “Chu mihriem chu ka hriet nawh,” tiin inkhâmin ân phat nâwk a.

73Chun, sâwt nawte hnungah a kâwla ngîrhai chun Peter kuomah, “Nang khawm an laia mi i ni ngei el, i ṭawngah ân hriet annâwm,” an ta.

74Ama chun, “Chu mihriem chu ka hriet nawh” tîn ṭawngsie inphur rauin ân khâm tah a. Chun âr a khuong nghâl tah a.

75Chun, Peter chun, Isûn “âr a khuong hmain nangin vawi thum mîn phat i tih,” a ti kha a hung hriet nâwk tah a. Chun, a suok a, a ṭap ta ngâwi ngâwi a.

Currently Selected:

MATTHAI 26: HMARCLBSI

Highlight

Copy