MATTHAI 19
19
Nuhmei mâk thua inchûktirna
(Mk 10.1-12; Lk 16.1-8)
1Chun, Isûn chuong thu chu a hril zo phingleh Galili rama inthawk a suok a, Jordan vadung râla Judai rama chun a va feh a;
2chun, mipui nasatakin an zui a; chutaka chun anni chu a sukdam tah a.
3Chun, Pharisaihai a kuomah an hung a, ama fie dingin, “Ieng lei khawmin mîn a nuhmei a mâk a thieng am?” an ta.
4Chun, ama chun, “Hi thu hi in tiem ngai naw am a nih? A tîra inthawka anni siemtu khan nuhmei le pasalin a siem le,
5 #
Gen 1.27; 5.2; 2.24 ‘Hi lei hin pasalin a nu le pa mâksan a ta, a nuhmei chel a tih; chuongchun, an pahni chun tisa pumkhat ni tâng an tih,’ ti hi.
6Chuongchun, pahni an ni ta nawh a, tisa pumkhat an ni ta lem a nih. Chuleiin, Pathienin a izawm ta chu mihriemin ṭhe naw raw se,” a ta, a dawn a.
7 #
Dt 24.1-4; Mt 5.31 Anni chun a kuomah “An leh iengdinga Mosien inmâkna lekha pêka mâk ding thu a pêk si am a na?” an ta.
8Ama chun an kuomah, “Mosiein in lungril ngar leiin annâwm in nuhmeihai mâk a phal; nisienla- khawm, a tîra inthawkin chuong ang a ni si nawh.
9 #
1 Kor 7.10-11
Kei chun ka ti cheu hi, tukhawm tlangvâl dit lei ni loa, nuhmei maa, mi dang nei taphawt chu a uire a nih; mâk hnung chu nei taphawt khawm a uire a nih,” a ta.
10Inchûktirhai chun a kuomah, “Nuhmei kawngah pasal thu chuong ang a ni si chun, innei a ṭha nawh ie,” an ta.
11Ama ruok chun an kuomah, “Chu thu chu mi nazawngin an pawm thei nawh, a ipêkhai chau naw chun.
12Mi tillâk an nu phîng sûnga inthawka chuong anga insieng hrim an um a; mi tillâk mihriem kuta lâk khawm an um bawk a; mi tillâk vân ram leia tillâka insiem fâwm khawm an um bawk a. Tukhawm a pawm thei taphawt chun pawm raw se,” a ta.
Isûn naupangtehai mal a sâwm
(Mk 10.13-16; Lk 18.15-17)
13Chun, an chunga a kut innghat a a iṭawngṭaipêk dingin a kuomah naupangtêhai an hung ṭhuoi a; chun, inchûktirhai chun an lo hal a.
14Isu ruok chun, “Naupangtêhai ka kuomah inhungtir unla, khap naw ro; vân ram chu hieng ang mi ta a ni sih a,” a ta.
15Chun, an chungah a kut ân nghat a, chutaka inthawk chu a fe tah a.
Tlangvâl hausa chatuon hringna zawngtu
(Mk 10.17-31; Lk 18.18-30)
16Chun, mi pakhat a hung a, a kuomah, “Inchûktirtu, kumkhuoa hringna ka nei theina dingin thil ṭha ieng am thâwng ka tih a?” a ta.
17Chun, ama chun a kuomah, “Thil ṭha thu iengdinga i mîn dawn? Ṭha chu pakhat chau a um, ieng- khawm ni sienla, hringnaa lût i nuom chun thupêkhai chu zâwm rawh,” a ta.
18 #
Ex 20.15-16; Dt 5.19-20 Ama chun a kuomah, “A ieng tak am ie?” a ta. Isûn, “ ‘Tuol i that ding a ni nawh, i uire ding a ni nawh; în rûk ding a ni nawh, hrietpuina inkhêl i pêk ding a ni nawh,
19 #
Ex 20.12; Dt 5.16; Lev 19.18 I nu le pa chawimawi rawh,’ tihai le, ‘Nangma în hmangai angin i vênghai i hmangai ding a nih,’ ti hi,” a ta.
20Tlangvâl chun a kuomah, “Chuong thu po po chu ka zâwm hlak, ieng am ka la bâk a?” a ta.
21Isûn a kuomah, “Ṭha famkima um i nuom chun, fe la, i nei chu zawr la, pasiehai kuomah pe rawh; chuongchun, vânah ro nei i tih; chun hung la, mi hung zui rawh,” a ta.
22Tlangvâl ruok chun chuong thu chu a hrietin lungngaitakin a fe hmang tah a; sum tamtak nei a ni leiin.
23Chun, Isûn a inchûktirhai kuoma chun, “Titakzetin ka hril cheu hi, mi hausa ta dingin vân rama lût chu intak tak a nih.
24Ka hril nâwk cheu hi, mi hausa Pathien rama a lût nêkin, sang- hâwngsei ṭhimnaa a lût thleng a awl lem,” a ta.
25Chun, inchûktirhai chun chu chu an hriet chun, mak an ti nasa bêk bêk a, “Tu am sandam ni thei a ta?” an ta.
26Chun, Isûn anni chu a en a, an kuomah, “Chu chu mihriem dingin thaw ruol a ni nawh a; Pathien ding ruok chun iengkim thaw thei a nih,” a ta.
Vân rama inchûktirhai ngirhmun ding
27Chun, Peterin a kuomah, “Ngai ta, keinin iengkim mâksanin kan zui ta cheh a; ieng am hmûng kan ta le?” a ta, ân dawn a.
28 #
Mt 25.31; Lk 22.30; Mt 20.16 Isûn an kuomah, “Titakzetin ka hril cheu hi, siemtharnaa chun, Mihriem Naupa a ropuina ṭhung- phaah a ṭhung phaleh nangni a mi zuituhai rawi hi, Israel hnam sâwm le hnam hnihai chu ngaituoin, lalṭhungpha sâwm le pahniah la ṭhung vêng in tih.
29Chun, mi tin inhai amanih, unauhai amanih, farnuhai amanih, pa amanih, nu amanih, nauhai amanih, ramhai amanih, ka hming leia fesan taphawt chun, a let za hmûng an ta, kumkhuoa hringna chang bawk an tih.
30 #
Mt 20.16; Lk 13.30 “Nisienlakhawm, mi tamtak, a hmasatakhai chu, a nuhnungtakah la um an ta; a nuhnungtakhai khawm a hmasatakah la um an tih.
Currently Selected:
MATTHAI 19: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
