MATTHAI 20
20
Grêp huona sinthawtuhai tekhithu
1“Vân ram chu in neitupa, a grêp huona sinthawtuhai ruoi dinga zîngkâr inhmataka suok ang chu a ni sih a.
2Chun, ama chun, sinthawtuhai le chun ni khata dulil#Denarion hlaw dinga an inrem phingleh, huona chun a tir tâwl tah a.
3Chun, vairik lai vêlin a va suok a, mi dang dâwr hmuna ngîr mei meihai a hmuh a;
4an kuomah, ‘Nangni khawm grêp huonah va fe ta u, a mawi tâwk ang pei pêng ka ti cheu,’ a ta. Chuongchun, an fe tah a.
5Chun, nisa inding vêl le zân bu suong pha vêl lai chun a va suok nâwk a; chuong ang bawkin a thaw nâwk a.
6Chun, zântieng chun a va suok a; mi dang lo ngîrhai chu a hmu a; an kuomah, ‘Iengdinga sûnnithlâka hitaka ngîr mei mei cheu am?’ a ta.
7Anni chun a kuomah, ‘Tu- khawmin an mi ruoi naw leiin,’ an ta. Ama chun an kuomah, ‘Nangni khawm grêp huonah va fe ta u,’ a ta.
8 #
Lev 19.13; Dt 24.15 “Chun, khuo a hung inhnu chun, grêp huon neitupa chun a sum en- kawltu kuomah, ‘Sinthawtuhai kha ko la, a nuhnungtaka phutin a hma- satak chenin an hlaw pe rawh,’ a ta.
9Chun, zântienga a iruoihai chu an hung chun duli an hmu seng a.
10Chun, a hmasatakhai an hung chun hmu tam deu an inring a; nisienlakhawm, anni khawm chun duli bawk an hmu seng a.
11Chuongchun, an lâk lai chun, in neitupa chungah an chier a,
12‘Hieng a nuhnungtakhai hin darkâr khat chau an thawh a, keini sûn rinum le khawsa dotuhai tlukin i siem sih a,’ an ta.
13Ama ruok chun anni laia mi pakhat kuomah, ‘Ruola, i chungah iengkhawm ka suksuol lêm; duli hlaw dingin ei inrem naw am a nih?
14I ta kha la la fe el rawh; nang ka ipêk che ang bawk kha, hi a nuhnung tak kuoma khawm hin ka pêk nuom a nih.
15Ka ta nâknâk chu ka nuom ang anga ka thaw a thieng naw am a nih? Annawleh, kei ka ṭhat leiin nangin i thîk am a nih?’ tîn a dawn a.
16 #
Mt 19.30; Mk 10.31; Lk 13.30 Chuongangin a nuhnungtak- hai chu a hmasatak la nîng an ta, a hmasatakhai khawm chu a nu- hnungtakhai la nîng an tih,” a ta.
Isûn a thi ding thu a hrillâwk vawithumna
(Mk 10.32-34; Lk 18.31-34)
17Chun, Isu Jerusalema a hang fe laiin, inchûktirhai sâwm le pahni chu a tumin a ṭhuoi a, lampuia chun an kuomah,
18“Ngai ta u, Jerusalemah ei fe ding a ni hi. Mihriem Naupa hi thiempu lalhai le Dân inchûktirtuhai kutah inmantirin a um ding a nih; chun, anni chun thi dingin a chungah thu sukthlûng an ta;
19nuiza siemna dinga hmang ding le, vuok ding le krawsa hemde dingin Jentailhai kuomah pêng an tih; chun, ni thum niin keithoin um a tih,” a ta.
Jakob le Johan nu thil hni
(Mk 10.35-45)
20Chu lai chun, Zebedai naupa- salhai nu chu, a naupahai ṭhuoiin a kuomah a hung a, chibai a bûk a, ieng amanih a hnih a.
21Chun, ama chun a kuomah, “Ieng am i dit a?” a ta. Ama chun a kuomah, “Hieng ka naupahai pahni hi i ramah i changtiengah pakhat, i vawitiengah pakhat an ṭhung theina dingin thu pe ta la,” a ta.
22Isu ruok chun “In hni hi in hriet naw a nih, ka no dâwn ding chu in dâwn thei am a nih?” a ta, a dawn a. Annîn a kuomah, “Thei e,” an ta.
23Ama chun an kuomah, “Ka no chu dâwn ngei in tih; nisienlakhawm, ka changtieng le ka vawitienga ṭhung ding thu chu keia pêk ding a ni nawh a, ka Pa ibuotsaipêkhai ta ding ni lem a tih,” a ta.
24Chun, sâwm hai chun chu chu an lo hrietin unau pahni hai chunga chun an lunginsen tah a.
25Isu ruok chun anni chu a ko a, “Jentailhai chunga rorêltuhai chu an chungah an inlal bêk bêk hlak a, an mi lienhai chun an chungah thu an nei bêk bêk hlak ti in hriet.
26 #
Lk 22.25-26 Nisienlakhawm, nangni laia chu chuong ang chu ni naw ni, tukhawm nangni laia mi lien ni nuom phawt chu in rawngbâwltuin a um ding a nih,
27 #
Mt 23.11; Mk 9.35; Lk 22.26 tukhawm nangni laia a hma- satak ni nuom taphawt chu in sie- hlawin a um bawk ding a nih;
28Mihriem Naupa hi rawng- bâwlpêka um dinga hung a ni nawh a, rawngbâwl ding le mi tamtak intlan- na dinga, a hringna pe lem dinga a hung ang hin,” a ta.
Mitdel pahni sukdam thu
(Mk 10.46-52; Lk 18.35-43)
29Chun, Jerikoa inthawka an suok laiin mipui nasatakin ama an zui a.
30Chun, ngai ta, mitdel pahni lam sîra ṭhunghai chun Isu a fe ti an hriet phingleh, “Lalpa, David Naupa, mi lunginsiet rawh,” tiin an khêk a.
31Chun, mipui chun to dingin an hal a; nisienlakhawm, anni chun “Lalpa, David Naupa, mi lunginsiet rawh,” tiin an khêk nâwk zuol a.
32Chun, Isu a ngîr a, anni a ko a, “In chungah ieng ang am ka thaw in nuom a?” a ta.
33Anni chun a kuomah, “Lalpa, mit var kan nuom,” an ta.
34Chuongchun, Isûn a lunginsiet bêk bêk a, an mit a them a; chuongchun, an hmu thei nghâl tah a, ama chu an zui tah a.
Currently Selected:
MATTHAI 20: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
