MARKA 4

1Cun rili kamah a cawnpiak ṭhân hna. Mibu kha a sinah an ra, cucaah ti cung i tilawng ah â cit i a ṭhu, cun mibu kha ti kamah rili lei hoih in an um. 2Cuticun tahchunhnâk in bia tampi a cawnpiak hna i hitihin a chimh hna. 3“Ngai u law! zohhmanh u, thlaici vorhtu thlaici vorh ah a kal. 4A vorhmi cu a cheu lam kamah an tla i vate nih an char dih. 5A cheu cu lungpher hmun, lei pannâk hmunah a tla i lei a chah lo caah a keu cawlh; 6Asinain ni a tlan tikah car lakin a emh, hram a ngeih lo caah a lo tlau. 7Cheukhat hling a ngeimi hramh lakah a tla, hramh cu a ṭhang i lo lakin a zelh i theitlai a chuah manh lo. 8A cheu tu cu lei ṭhatnâk ah a tla, a keuh i a ṭhan tikah, theitlai a chuah; a let sawmthum, a let sawmruk, a let zakhat hna in a karh,” tiah a ti. 9Cun “Theihnâk dingah hna a ngeimi pauh nih thei hna seh,” tiah a ti hna. 10Amah lawngin a um lioah, hleihnih hna le cheukhat nih tahchunhnâk sullam kha an hal. 11Anih nih, “Pathian pennâk biathli theih cu nannih caah cun sian a si, asinain lênglei mi hna caah cun zeizong vialte hi tahchunhnâk in chim a si; 12An hmuh ko nain a ruahawk an hngalh nâkhnga lo le hna in an theih ko nain a sullam an hngalh nâkhnga lo; culoahcun an i mer lai i an sualnâk ngaihthiam an si sual hnga,” tiah a ti. 13Anih nih, “Hi tahchunhnâk bia hi nan hngal kho lo maw? Cuti a si ahcun zeitindah tahchunhnâk dang vialte cu nan hngalh khawh kun hnga? 14Thlaici vorhtu nih a vorhmi cu bia a si. 15Lam kam i vorhmibia cu hihi a si. Bia an theih le cângkâ Satan a ra zau i an lungthin i vorhmi bia kha a lâkpiak tawn hna. 16Cubantukin lungpher cung i vorhmi cu: bia an theih le cângkâ lungtho tein a cohlang cawlhmi an si; 17asinain anmah ah hram a ngei lo i cân tawite chung lawng a nguh. A rauh hlanah, bia ruang i harnâk siseh, serhsatnâk siseh a um tikah an tlu ṭhân tawn. 18Cun hling ngeimi hramh i vorhmi cu hi bantuk hi an si; cu hna nihcun bia cu an theih cang ko, 19cun vawlei thil kongah, rum duhnâk le, thil dangdang duhnâk kha a rak lut tikah, bia cu theitlai chuah kho loin an dih chih tawn. 20Asinain leiṭha i vorh cu hibantuk hi an si; bia cu thei in a pom i a let sawmthum, a let sawmruk, a let zakhat i theitlai a chuahmi hna an si,” tiah a ti. 21Hi zong hi a chimh hna, “Meiin hi khawkur chungah siseh, ihkhun tang i chiah awkah siseh an vâng bal maw? 22Zeitintiah phuan lo ding i thuhmi zeihmanh a um lo, asiloah ceunâk ah chuahpi lo dingin a thlithup in thuhnawhmi zeihmanh a um lo. 23Theihnâk dingah hna a ngeimi nih thei hna seh,” tiah a ti. 24Cun an sinah, “Nan theihmi hi ṭha tein ruat u, nan tahnâk relin an in tah ve hna lai, a theitu hna cu tam chinchin pek nan si lai. 25Zeitintiah a ngeimi pauh cu tamdeuh chapchih an si lai, a ngei lomi pauh cu a ngeihchun zong lâkpiak an si lai,” tiah a ti. 26Anih nih, “Pathian pennâk cu hibantuk hi a si: mi nih leiah thlaici vorh sehlaw, 27zanah i hngilh in chunah tho tawn sehlaw, thlaici a keuhning le a ṭhanning a hngal kho lomi bantuk a si. 28Zeitintiah lei nih amah tein theitlai a chuah tawn, a hmaisa ah a hnah, a changtu ah a vui, cuhnuah a vui ah athei a rak um tawn. 29A thei a hmin tikah, ṭuan cân a cut cang caah, fa-ah an hman tawn,” tiah a ti. 30Anih nih, “Pathian pennâk cu zeihedah ka tahchunh hnga? Zeibantuk tahchunhnâk in dah ka fianter hnga? 31Anṭam ci bantuk hi a si, lei i vorh a si lio ah, thlaici vialte lakah a hme bik a si, 32asinain vorh hnu ah a ṭhang lengmang i thlai dang vialte nâkin a ngan deuh, nge ngan pipi kha a ngei i vanva nih bu tiangin an ngeih tawn,” tiah a ti. 33Cubantuk tahchunhnâk hna hmangin an theih thiam khawh nâkhnga an sinah a chim tawn. 34Tahchunhnâk dah tilo cun an sinah bia a chim lo. Anmah te lawng an um lio tu ah a lamkaltu sinah zeizong vialte a fianter tawn. 35Cuni zanlei sangah, “Va ral ah kai u sih,” tiah a ti hna. 36Cuticun mizapi kha kaltâk in, Amah cu a umnâk hmun in tilawng in an kalpi. Tilawng dang zong an um ve. 37Cun thli fak piin a hrang i tilet kha tilawng chungah an lut i tilawng cu ti in khah hnik â tim cang. 38Anih tu cu tilawng mei lei ah a um i chantling i tlinh in â hngilh. An va hlauh i a sinah, “Cawnpiaktu, kan lohtlau dih lai hi poi na ti lo maw?” tiah an ti. 39Anih cu â hlau i thli kha a sîk, tilet sinah, “I din law, dai tein um,” tiah a ti. Cun thli cu a dai i king ringriang tein a um. 40Cuticun an sinah, “Zeicadah kha tluk khan nan thin a phân? Zumhnâk nan ngei hrimhrim lo maw?” tiah a ti hna. 41An ṭihtuk hringhran i, “Hipa hi mizeidah a si hnga? thli le ti hmanh nih a nawl an ngaih ko ê” tiah pakhat le pakhat an i ti.

Currently Selected:

MARKA 4: HAKABSI

Highlight

Copy